Երեքշաբթի, 25 սեպտեմբերի

«Քիմպրոմում» պահեստավորված են վտանգավոր նյութեր` ամոնիակ, ծծմբաթթու, ջրածին



Վանաձորի «Քիմպրոմ» ՓԲԸ-ին այդպես էլ չի հաջողվում  վճարել իր  700-ից ավելի աշխատողների շուրջ մեկ տարվա աշխատավարձը: Աշխատողները պահանջում են հանդիպում ընկերության սեփականատիրոջ հետ:

Ով է «Քիմպրոմի» սեփականատերը և ինչու է նա թաքնվում աշխատողներից: Լոռու մարզպետ Արթուր Նալբանդյանը հավաստիացնում է, որ ինքն անձամբ չգիտի, թե ով է ընկերության սեփականատերը: «Ես չգիտեմ նույնիսկ, թե մի հոգի է, թե մի քանիսը»,- ասում է մարզպետը:  

Վերջինս  երեկ  «Հետքին»  հայտնեց , որ  «Քիմպրոմը» աշխատավարձը չի վճարել վերջին 7-8 ամիսներին:  Գործարանի  օդի բաշխման հերթափոխի պետ  Ալբերտ Իսրայելյանը, սակայն, պնդեց, որ գործարանը  իրեն  չի վճարել  11 ամսվա աշխատավարձ: «Կան աշխատողներ, որոնց ընկերությունը մեկ տարուց ավելի աշխատավարձի պարտքեր ունի»,- հայտնեց  Ալբերտ Իսրայելյանը: 

«Քիմպրոմի» աշխատավարձի ընդհանուր պարտքը կազմում է 100 մլն. դրամ, բացի այդ՝ ընկերությունը  «Հայռուսգազարդին» պարտք է  շուրջ 1 միլիարդ դրամ,  մեկ  միլիարդ դրամ է կազմում նաև ընկերության էլեկտրաէներգիայի պարտքը: Ընկերությունը  հողի և  գույքահարկի մեծ պարտքեր ունի նաև Վանաձորի քաղաքապետարանին:

«Քիմպրոմը նաև լուրջ դատական պրոցեսների մեջ է, եթե արդեն կալանք դրված չէ, չի բացառվում, որ նաև վաղը կամ մյուս օրը  կալանք դրվի ընկերության ֆինանսական միջոցների վրա»,- ասաց Արթուր Նալբանդյանը:  Երեկ Լոռու մարզպետարանի  մոտ հավաքված «Քիմպրոմի» աշխատողներին, սակայն, մտահոգում էր  ոչ միայն  աշխատավարձի, նաև ըկերության բնապահպանական անվտանգության խնդիրները, որոնք հատկապես  սպառնալիք են մարզկենտրոն Վանաձորի համար:

«Մեկ շաբաթ հետո մեր պայմանագրերը լրանում են , այլևս իրավունք չենք ունենա աշխատելու: Ի՞նչ է սպասվում  ձեռնարկության ստրատեգիական  օբյեկտներին` ամոնիակի պահեստում 80-90 տոննա ամոնյակ ունենք,  դրա վտանգավորությունը մասնագետները գիտեն: Մենք նույնպես գիտենք՝ դա ինչ է նշանակում: Հինգ հարյուր տոննա ծծմբական թթու ունենք, ջրածին ունենք,  այրվող շատ թեթև գազ, որ  դա բաց թողեցին` տեղով ատոմային ռումբ է: Մի շաբաթ հետո, որ մենք գործարանը թողեցինք  ով պետք է այդ հարցերով զբաղվի»,- մարզպետին  հարցրեց «Քիմպրոմի» ամոնիակի սինթեզի արտադրամասի  հերթափոխի  պետ  Հրաչիկ Մարտիրոսյանը: 

Արթուր Նալբանդյանը «Քիմպրոմի» աշխատողներին լավատեսական որևէ լուր չհաղորդեց: «Համարյա թե բան չի փոխվել:  Նոր բան առայժմ չունեմ ասելու»,- ասաց մարզպետը: Աշխատողները մարզպետին հայտնեցին, որ աշխատավարձ չստանալու պատճառով հայտնվել են աղետալի վիճակում:

«Գոնե մի երկու կոպեկ տան, յոլա գնանք, սովից կոտորվում ենք»,- ասում է   ցուցարարներից Էդիկ Խարազյանը:  

«Ամբողջ կառավարությունն է զբաղվում, ես ձեզ  անկեղծ բան եմ ասում, ամբողջ կառավարությունը: Բայց խնդրի լուծման ճիշտ տարբերակը դեռ չեն գտնում:  Տեսնենք, սեփականատեր է փոխվում. չգիտեմ ինչ միջոցներ են ներդնում, այլ  ֆինանսական խողովակներ կան, որ կարող է ներդրում կատարվի: Էս պահին լուծումը չեն գտնում»,- ցուցարաներին տեղեկացրեց  Արթուր Նալբանդյանը:  

Ցուցարարները պատասխանեցին, որ մինչև  չստանան  դրական պատասխան, չեն ներկայանա աշխատանքի: «Սրա անունը,  պարոն մարզպետ, կարանք դնենք թրաֆիքինգ:  Մեր աշխատանքը շահագործել են, մեզ չեն վարձատրում: Սա գենոցիդ էլ ա, եթե իշխանությունը իրա ժողովրդին սովամահ ա անում, էդ ա նշանակում էլի:  Իշխանությունը եքա պետություն ա,  չի կարում էդ  սեփականատիրոջը գտնի բերի»,- վրդովված ասաց ցուցարարներից մեկը:

«Ինձ ասացին Մոսկվայում է, նույնիսկ ես ասացի՝ պատրաստ եմ մի օրով գնամ Մոսկվա, հետը հանդիպեմ, բայց չգիտես ինչու և ինչ պատճառներով Մոսկվայում էլ չկարողացանք մարդուն հանդիպել»,- ասաց Արթուր Նալբանդյանը:

Աշխատողներն էլ դժգոհեցին, որ դատական կարգով նույնպես չեն կարողանում ստանալ իրենց աշխատավարձը, քանի  որ դատարանը  մեկ տարուց ավելի ձգձգում է իրենց հայցերի քննարկումը:

Ըստ ցուցարարների՝ աշխատավարձի խնդրից ձեռքերը լվացել է նաև «Քիմպրոմ» ՓԲԸ-ի գործադիր տնօրեն Ա. Սնիգիրյովը: «Սնիգիրյովն ասում է՝ ինչ ուզում եք արեք»,- ասաց ամոնիակի սինթեզի արտադրամասի  հերթափոխի  պետ  Հրաչիկ Մարտիրոսյանը:

Անելանելի վիճակում հայտնված Լոռու մարզպետը հուսադրող որևէ լուր ստանալու  համար Հրաչիկ Մարտիրոսյանի հետ բարձրացավ իր աշխատասենյակ` կառավարության հետ խոսելու համար: 

Շուրջ 10 րոպե հետո Հրաչիկ Մարտիրոսյանը վերադարձավ և ցուցարարներին հայտնեց. « Մարզպետը չկարողացավ նրանց հետ խոսել, կոդը զբաղված էր, նրանք աշխատանքի մեջ են, մենք կարանք չաշխատենք»:

Ցուցարանները որոշեցին  հունիսի 25-ին առավոտյան ժամը 9-ին բողոքի ակցիան շարունակել «Քիմպրոմի» բակում: «Չորեքշաբթի գործարան ոչ մեկս չենք մտնի` գործարանի ղեկավարության հետ միասին: Մենակ պահակային ծառայությունը կմտնի և հերթապահները: Ոչ մի աշխատանքային գործունեություն չի կատարվի: Ու մենք էնտեղ էնքան կսպասենք մինչև նախագահի խորհրդական Արմեն Մովսիսյանը բարեհաճի գալ մեր հետ հանդիպման: Միակ կանալը, որ գործարանի սեփականատիրոջ հետ կարա մեզ կապի Արմեն Մովսիսյանն է»,- հայտարարեց  Հրաչիկ Մարտիրոսյանը:


Գլխավոր էջ



Մեկնաբանություններ (2)
1. Գայանե22:36 - 24 հունիսի, 2014
Ամոնիակ
2. GB06:20 - 30 հունիսի, 2014
Who is that big fat belly in the picture?
Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ