HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Աֆրիկյանների տունը Գագիկ Խաչատրյանի ու որդիների բիզնեսի շղթայի մի օղակն է

Քաղաքացիների ջանքերը՝ փրկել պատմամշակութային հուշարձան ճանաչված Աֆրիկյանների ակումբը, արդյունք չի տալիս: Ինչու արդյունք չի տալիս, որովհետև դրա ետևում  կանգնած է Հայաստանի մեծահարուստ պաշտոնյաներից մեկը՝ ՀՀ ֆինանսների նախարար, պետեկամուտների կոմիտեի նախկին նախագահ Գագիկ Խաչատրյանը: Գագիկ Խաչատրյանն, իհարկե, պաշտոնապես չի երևում, ինչպես իր մնացած բոլոր բիզնեսներում, բայց «խաղահրապարակում» իր հետ փոխկապակցված անձինք են:

Աֆրիկյանների տունը

 Լուսանկարը՝ wikipedia.org-ից

Ավելի ուշ այն վերածվել է բազմաբնակարան շենքի, ուր բնակություն է հաստատել մոտ 30 ընտանիք։

Տերյան 11 հասցեում գտնվող Աֆրիկյանների ակումբը կառուցվել է 19-րդ դարի վերջին՝ մեծահարուստ Աֆրիկյան եղբայրների կողմից։ Եղբայրները եղել են քաղաքային դումայի անդամներ, ունեցել տարբեր գործարաններ, ձեռնարկություններ:  Ակումբի շենքը եղել է հավաքատեղի քաղաքի նշանավոր մարդկանց և վերնախավի համար։

1913թ. շենքը եղել է քաղաքային ակումբ և պատկանել է Առաքել Աֆրիկյանին։ 1926թ. շենքը պետականացվել է խորհրդային իշխանությունների կողմից և տրամադրվել Ազգային անվտանգության ծառայությանը։  

Գագիկ Խաչատրյանի բիզնեսի «բանալին» Սայաթ-Նովա 20, բնակարան 53-ում է

Աֆրիկյանների ակումբն այժմ ապամոնտաժում է «Միլենիում կոնտրակշեն» ՍՊԸ-ն: Ընկերությունը հիմնադրվել է 2009թ. «Դվին Հոլդինգ» ՍՊԸ-ի կողմից, սակայն այժմյան 100-տոկոսանոց բաժնետերը Հարություն Համլետի Թադևոսյանն է:

«Միլենիում կոնտրակշեն» ընկերությունը գրանցված է Երևանի Սայաթ-Նովա 20, բն. 53 հասցեում: Այցելեցինք նշված հասցե՝ տնօրեն Թադևոսյանի հետ հանդիպելու ակնկալիքով: Մուտքի զանգին (դոմոֆոնին) պատասխանեց տարեց մի կին: Ասաց՝ հասցեն բնակելի է: Տիկինը որևէ կազմակերպության և այդ հասցեում դրա գրանցման մասին տեղյակ չէր: Հավաստիացրեց, որ Հարություն Թադևոսյան անվամբ մարդ չի ճանաչում, իսկ բնակարանը Սեդրակ և Նինա Ջավադյաններինն է: Ինքը Նինա Ջավադյանի մայրն է:

Սեդրակ Ջավադյանը «Ակբա-Կրեդիդ Ագրիկոլ բանկի»-ի գլխավոր հաշվապահն է, «Ակբա ապահովագրական բրոքեր» ՍՊԸ-ի 10 տոկոս բաժնեմասի բաժնետերը: Մեզ հետ զրույցում Սեդրակ Ջավադյանը նշեց, որ ինքն Աֆրիկյանների շենքի ճակատագրով մտահոգվող անձանցից մեկն է և որևէ առնչություն չունի «Միլենիում կոնտրակշեն» ՍՊԸ-ի հետ: Բնակարանը ձեռք է բերել 2012թ. մայիսին, որտեղ այժմ ապրում է զոքանչը: Իսկ բնակարանը գնել է Տիգրան Շահրամանյանից, ով աշխատում է «Մեգա Ֆուդ» ընկերությունում:

ՀՀ պետական ռեգիստրի տվյալների համաձայն՝ «Մեգա Ֆուդ» ընկերությունում մինչև 2012թ.  բաժնեմաս են ունեցել Գագիկ Խաչատրյանի որդիները՝ Գուրգեն և Արտյոմ Խաչատրյանները: Այժմ փաստացի բաժնետերը ընկերության տնօրեն Արամ Խաչատրյանն է՝ Գագիկ Խաչատրյանի հորեղբոր որդին: Տիգրան Շահրամանյանը «Մեգա Ֆուդ» ընկերությունում զբաղեցնում է Արտաքին կապերի բաժնի ղեկավարի պաշտոնը: «Ես ավելորդ քոմենտարիաներ իրավասու չեմ տալու: Կան որոշակի հարցեր, որը որ...եթե Ձեզ ինչ-որ ինֆորմացիա է հետաքրքրում, Ձեր համարը կարող եք թողնել, ես կխնդրեմ՝ պատասխանատու մարդ Ձեզ կզանգի, բացատրություններ կտա»,- եղավ Տիգրան Շահրամանյանի պատասխանը մեր հարցին, թե ինչ կապ ունի «Միլենիում կոնտրակշեն» ընկերության հետ, որը գրանցված է եղել իր բնակարանում: Մինչ հոդվածի հրապարակումը «պատասխանատու անձը» այդպես էլ չզանգեց:  

«Մեգա Ֆուդ» ընկերության իրավաբանական հասցեն նույն Հարություն Թադևոսյանի գրանցման հասցեն է՝ Մարգարյան 20/3, բնակարան 2: 

Հարություն Թադևոսյանը Գագիկ Խաչատրյանի անվանն առնչվող մեկ այլ՝ «Մեգաթոյ» ՍՊ ընկերության բաժնետերն է: Այս ընկերության տնօրեն Աննա Ավետիսյանը մեզ հետ զրույցում ասաց, որ Հարություն Թադևոսյանը երկրում չէ, Հայաստանում կլինի հուլիսի 10-ից հետո: Աննա Ավետիսյանն այսօր փոխանցեց Հարություն Թադևոսյանի էլեկտրոնային հասցեն` ասելով, որ հարցերը կարող ենք այդ հասեցով ուղարկել: Հարցերն արդեն ուղարկել ենք, պատասխանները ստանալուց հետո հոդվածում կավելացնենք Հարություն Թադևոսյանի պատասխանները: 

«Ակբա»-ի գլխավոր հաշվապահ Ս. Ջավադյանը դեռ տեղյակ չէ, որ իր գնած բնակարանում՝ Սայաթ-Նովա 20, բն. 53 հասցեում (հիշեցնենք՝ «Միլենիում կոնտրակշեն» ՍՊԸ-ի գրանցման հասցեն է) Գագիկ Խաչատրյանի հետ փոխկապակցված անձանց այլ ընկերություններ էլ են գրանցված: «Ապեյրոն», «Մեգամոթորս» և «Գալաքսի Կոնցեռն» ՍՊԸ-ները, որոնց 50/50 բաժնեմասի սեփականատերերը Գագիկ Խաչատրյանի որդիներն են՝ Արտյոմը և Գուրգենը, իրենց պետռեգիստրի տվյալներում գործունեության և իրավաբանական հասցե նշել են Սայաթ-Նովա 20, բն. 53-ը:

Լուսանկարը՝ Դավիթ Բանուչյանի

Հուշարձանի ոչնչացման նախապատմությունը

ԽՍՀՄ-ից ժառանգած օրենքներն «արդիականացնելու» և համապատասխան մեխանիզմներ մշակելու ճանապարհին, ավելի քանի 4 տարի՝ 2000-2004թթ., Երևան քաղաքը չի ունեցել պատմության և մշակույթի հուշարձանների ցանկ: Եվ օգտվելով դրանից՝ այդ տարիներին էլ հիմնականում հուշարձանների նկատմամբ գերակա շահ է ճանաչվել, և դրանք օտարվել են առևտրային ընկերություններին, իսկ հուշարձանները քանդողները որևէ պատասխանատվություն չեն կրել:

«Պետական կարիքների զոհեր» ՀԿ-ի նախագահ Սեդրակ Բաղդասարյանը կարծում է, որ Երևանի քաղաքապետարանը դա միտումնավոր է արել: «Սևան հյուրանոցը, Դումայի շենքը (այժմյան «Կոնգրես» հյուրանոցը) այդպես քանդեցին: Այս ընթացքում Հյուսիսային պողոտայի, Գլխավոր պողոտայի ծրագիրը սկսեցին, որպեսզի հուշարձանները քանդեն և ինչ ուզենան անեն»,- ասում է Սեդրակ Բաղդասարյանը:

Ի վերջո, 2004թ. կառավարության որոշմամբ՝ հավելվածում Աֆրիկյանների ակումբը մտցվել է տեղափոխման ենթակա պատմամշակութային հուշարձանների ցանկում, ի թիվս 13 այլ հուշարձանների: 2005թ., երբ Աֆրիկյանների ակումբն արդեն ճանաչվել էր որպես հուշարձան, քաղաքապետ Երվանդ Զախարյանը որոշում է կայացրել այն տրամադրել «Դվին Հոլդինգ» ՓԲԸ-ին: Ընկերությունը դիմել է Երևանի քաղաքապետարան այդ հասցեում բնակելի շենք կառուցելու թույլտվություն ստանալու նպատակով: Երևանի քաղաքապետարանը «Դվին Հոլդինգին» տվել է ճարտարապետահատակագծային առաջադրանքը՝ «Տերյան փողոցի կողմից նախատեսվող մասնաշենտքը նախատեսել 10 հարկանի՝ 10-րդ հարկը նահանջող»: Մինչդեռ «Դվին Հոլդինգը» այդպես էլ չի իրականացրել բնակելի շենք կառուցելու նախագիծը, և իր բաժնեմասը փոխանցել է «Միլենիում կոնտրակշեն» ՍՊԸ-ին, որն այժմ նախատեսում է հյուրանոց կառուցել:

Լուսանկարը՝ Նարեկ Ալեքսանյանի

ՀՀ մշակույթի նախարարության պատմության և մշակույթի հուշարձանների պահպանության գործակալությունը հունիսի 23-ին Հարություն Թադևոսյանին և ոստիկանությանն ուղղված գրություններով հայտնել էր, որ շինարարների կողմից ներկայացրած փաստաթղթերը թերի են, բացակայել են ապամոնտաժման աշխատանքների վարման մատյանը, հեղինակային և տեխնիկական հսկողության, գիտական ղեկավարման վերաբերյալ համապատասխան փաստաթղթերը, ինչի վերաբերյալ գործակալության մասնագետների դադարեցման հրահանգը չի կատարվել: Մինչ նշված փաստաթղթերի առկայության ապահովումը՝ հրահանգվել էր դադարեցնել շինարարությունը: Սակայն երկու օր անց այն նորից վերսկսվել էր: Մշակույթի նախարարությունն արգելքը վերացրել է:

Աֆրիկյանների ակումբի ճակատագիրը կանխորոշված է: Ոտքի է հանված պետական ողջ մեքենան, ոստիկանությունը հիմնական դերկատարն է: Եթե անհրաժեշտություն լինի, Վլադիմիր Գասպարյանը ներքին զորքերն էլ կհանի: Գագիկ Խաչատրյանին ոչ ոք չի համարձակվի կանգնեցնել կես ճանապարհին: 

Մեկնաբանություններ (4)

raf
Thanks for the info, sadly we Armenians in diaspora cannot do much to help except for boycotting any kind of business in Armenia related to these gangs. I would really appreciate if Hetq can actually make a list of all these businesses owned by these criminals, I am sure that there are a lot of Armenians in diaspora who just like me will avoid using their services during their visits to Armenia. I, for one, will never stay in a hotel owned by this guy or do shopping form Yerevan City owned by the other criminal.
Mihran
Can someone tell me is he the brother or relative of former governor of Syunik region Suren Khachatryan?
wb
մի բուռ երկրի մի կիսավեր տնտեսությունը գտնվում է մի 10-20 ընտանիքի ձեռքում... որոնք երկրի ու ժողովրդի հետ վարվում են ըստ իրենց մակարդակի, տրամադրության ու հայեցողության
Վարազ Սյունի (Ամստերդամ)
Երևանը բարբարոս «մայրա»քաղաք է՝ իր պատմական հուշարձանները ոչնչացնող: Իսկ հայը ցածր ազգ է:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter