HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Բանակցությունների արդյունքում ցմահ դատապարտյալները դադարեցրել են հացադուլը

Այսօր ՀՀ արդարադատության նախարարի մամուլի խոսնակ Ծովինար Խաչատրյանը «Հետքին» փոխանցեց, որ ցմահ դատապարտյալները դադարեցրել են երեկ հայտարարած հացադուլը:

«ՀՀ արդարադատության նախարար Հովհաննես Մանուկյանի հորդորով ՀՀ ԱՆ Նուբարաշեն քրեակատարողական հիմնարկում պահվող ցմահ ազատազրկման դատապարտվածները դադարեցրել են հունիսի 30-ին հայտարարած հացադուլը: ՀՀ արդարադատության նախարարությունը հետամուտ է ցմահ ազատազրկվածների խնդիրներին, դրանք ուսումնասիրման և քարտեզագրման փուլում են: Սեղմ ժամկետներում խնդիրները կամփոփվեն, և հետագա անելիքները կներկայացվեն հանրությանը»,- փոխանցեց նախարարի մամուլի խոսնակը:

Հիշեցնենք, որ հունիսի 30-ին 29 ցմահ դատապարտյալ հայտարարել էր հացադուլ՝ պահանջելով իրենց գործերի, պատժաչափերի վերանայման հնարավորություն 2011թ. մայիսի 23 օրենսդրական փոփոխությունների տված հնարավորության հիմքով:

Ցմահ դատապարտյալները նշում են, որ ներկայում դատարաններն այդ օրենսդրական փոփոխությունից հետո ունեն ընտրության ավելի լայն հնարավորություն: Եթե 2011-ից առաջ դատարանները կարող էին ընտրել 15 տարվա ազատազրկման և պատժի առավելագույն չափի միջև, ապա այսօր կարող են կիրառել նաև 15-20 տարվա ազատազրկման միջակայքում գտնվող պատիժ: Ուստի, ցմահ դատապարտյալները գտնում են, որ քրեական օրենսգրքի հիշյալ փոփոխությունը մեղմացում է իրենց՝ պատժի առավելագույն չափի դատապարտվածների տեսանկյունից: Տրամաբանությունը հետևյալն է՝ եթե ցմահ դատապարտվածներից ոմանք դատապարտվեին մեր օրերում, ապա հնարավոր է` դատարանները նշանակեին ոչ թե ցմահ ազատազրկում, այլ 16, 17, 18…տարիների ազատազրկում, ինչպես թույլ է տալիս ներկայիս օրենքը:

Ցմահ դատապարտյալների հարազատները «Հետքի» հետ զրույցում նշեցին, որ կսպասեն նախարարության արձագանքին. «Ցմահ դատապարտյալների խնդիրները տարիների պատմություն ունեն, դրանք տարիներով չեն լուծվել: Հիմա սպասում ենք կոնկրետ գործնական քայլերի: 20 տարի սպասել ենք, 1 ամիս էլ կսպասենք: Նախարարությունից 1 ամիս խնդրեցին: Սկսած խայտառակ դատավարություններից, մինչև չափազանցված պատիժներ, անարդար դատավճիռներ, խոշտանգումներով ցուցմունքներ: Մեր պահանջը, որ վերանայվեն այդ կասկածելի գործերը, մարդկանց ազատության հնարավորություն տան»,-ասաց մահապատժի դատապարտված, 20 տարի անազատության մեջ գտնվող, Արցախյան պատերազմի մասնակից Տիգրան Ավետիսյանի քույրը:        

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter