Թե ինչու մինչ օրս որևէ մեկը չի պատժվել «Նաիրիտը» այս վիճակին հասցնելու համար, Հովիկ Աբրահամյանը պատասխան չուներ. «Պիտի ճշտենք, որ պատժենք»:

Վարչապետ Հովիկ Աբրահամյանը ճիշտ չի ասում, ավելին՝ նա «Նաիրիտի» կեղտոտ գործարքները քողարկողներից մեկն է: Երբ մեկ տարի առաջ մի քանի պատգամավորներ փորձում էին «Նաիրիտի» գործարքներն ուսումնասիրող հաձնաժողով ստեղծել, այն ժամանակ ԱԺ նախագահ Հովիկ Աբրահամյանն ամեն ինչ արեց, որպեսզի ձախողվի պատգամավորների այդ նախաձեռնությունը: Հանձնաժողով այդպես էլ չստեղծվեց: «Նաիրիտի» աշխատողներին Հովիկ Աբրահամյանն ասել է, թե երկու ամիս է` չեն կարողանում պարզել՝ ով է «Նաիրիտի» սեփականատերը:  

Հատուկ Հովիկ Աբրահամյանի համար ներկայացնում ենք հոդվածների շարքը, որտեղ մանրամասն տրված են նրան «հուզող» բոլոր հարցերի պատասխանները:

Եթե Հովիկ Աբրահամյանն ուզում է ավելին իմանալ, կարող է միջնորդել գլխավոր դատախազին, որ կալանավորեն նախագահի խորհրդական Արմեն Մովսիսյանին եւ Միջպետական բանկի Հայաստանի ներկայացուցիչ Վահան Մելքոնյանին: Վարչապետը եթե ուզում է, որ բացի իրենից՝ հանրությունն էլ տեղյակ լինի, թե իրականում ինչ է կատարվել «Նաիրիտի» հետ, թող Հանրային հեռուստատեսությամբ «Հետքին» մեկ ժամ եթեր տրամադրի: Մենք էլ հանրությանը կներկայացնենք այն հանցագործությունները, որ կատարել են պաշտոնյաները եւ մնացել անպատիժ: «Նաիրիտի» մասին նյութերը հավաքված են նաեւ Ոստիկանության քննչական գլխավոր վարչությունում: Ոստիկանապետ Վլադիմիր Գասպարյանի հրահանգով գործը կարճվել է:

Վարչապետը կարող է ծանոթանալ նաեւ կարճված քրեական գործերի նյութերին, այնտեղ կան ուշագրավ ցուցմունքներ: