Դսեղի բյուջեն հիմնականում ծառայեցվել է սոցիալական օգնություններին
Լոռու մարզպետարանի վարչական հսկողություն իրականացնող հանձնաժողովը 2014թ.-ի 1-ին եռամսյակում վարչական հսկողություն է իրականացրել Դսեղ համայնքում: Հսկողությամբ բացահայտվել է, որ համայնքի ավագանու 2012թ. որոշումների արձանագրությունների մատյանը (հունվարի 1-ից մինչեւ նոյեմբերի 25-ը) չի պահպանվում: Հանձնաժողովն արձանագրել է նաեւ, որ համայնքի բյուջեի ծախսերի մեջ տեսակարար կշիռ են կազմում վճարված սոցիալական օգնությունները:
«2011թ.-ին այն կազմել է 11,7 մլն դրամ, որը բյուջեի ծախսերի 33%-ն է, իսկ 2014թ. բյուջեով սոցիալական օգնությունների համար նախատեսվել է 3,6 մլն դրամ»,- արձանագրել է վարչական հանձնաժողովը: Հանձնաժողովը Դսեղի համայնքապետ Նորիկ Քոչարյանին հանձնարարել է օգնությունները վճարել խիստ կարիքավորներին, նվազեցնել միանվագ վճարվող օգնության գումարների եւ ուսման վճարների չափերը եւ բյուջեի միջոցներն ուղղել ընդհանուր համայնքային կարիքները հոգալուն:
Հիշեցնենք, որ մարզպետարանի վարչական հսկողություն իրականացնող հանձնաժողովը 2011թ.-ին նույնաբովանդակ հանձնարարություն տվել էր նաեւ Դսեղի նախկին համայնքապետին, սակայն սոցիալական օգնությունների բաշխման հարցում Դսեղում առ այսօր ոչինչ չի փոխվել: Վերջին տարիներին Կառավարությունը համայնքապետերից անվերապահորեն պահանջում է 100% հավաքագրել բյուջեի եկամուտները: Հրահանգն ամեն գնով կատարելու համար Լոռու մարզի շատ համայնքներում (նաեւ` Դսեղ, Լորուտ), համայնքապետերի խնդրանքով, ուսանողների ուսման վարձերը որպես հողի հարկ գյուղացիները մուտքագրում են համայնքի բյուջե: Այս կերպ արհեստականորեն ապահովվում է հողի հարկի հավաքագրումը, սակայն այդ գումարները չեն օգտագործվում համայնքի կարիքների համար, այլ որպես սոցիալական օգնություն վերադարձվում են ուսանողներին:
Վարչական հանձնաժողովն արձանագրել է, որ դսեղցիներին վճարվել են անհամեմատ բարձր միանվագ սոցիալական նպաստներ: Ավագանու 2014թ.-ի փետրվարի 25-ի թիվ 11 որոշմամբ 200 հազար դրամ սոցիալական օգնություն է տրվել դսեղցի Վրույր Շաքարյանին, 120 հազար դրամ` Էմմա Հախվերդյանին: Ավագանու մեկ այլ որոշմամբ` 270 հազար դրամ դրամական օգնություն է ստացել Գագիկ Անտոնյանը, եւս 85 հազար դրամ վճարվել է վերջինիս աղջկան` Արուս Գագիկի Անտոնյանին: Դսեղցի Անժելա Չոփուրյանը ստացել է 240 հազար դրամ, Վանուհի Եղիկյանը` 210 հազար դրամ, Թամարա Մխիթարյանը` 125 հազար դրամ, Նելյա Սահակյանը` 110 հազար, Ժենյա Քոչարյանը` 130 հազար դրամ, Մանվել Հախվերդյանը` 100 հազար, Ռաֆիկ Հովակիմյանը` 90 հազար դրամ սոցիալական օգնություն եւ այլն:
Դսեղի ավագանին չի հիմնավորել օգնություն ստացողների սոցիալապես կարքավոր լինելու հանգամանքը: Վարչական հանձնաժողը Դսեղում հսկողություն իրականացնելիս շրջանցել է այս փաստերը, սակայն համայնքապետից պահանջել է նվազեցնել միանվագ սոցիալական վճարների գումարները եւ ուսանողների վարձերը:
Դսեղի համայնքապետն, արդյոք, չի՞ շարունակել սոցիալական օգնությունները բաշխելու Դսեղի հին ավանդույթները: Նորիկ Քոչարյանն այսօր մեզ հետ զրույցում հերքեց ուսանողների ուսման վարձավճարներն իբրեւ հողի հարկ համայնքի բյուջե մուտքագրելու մեթոդը կիրառելը:
Այսուհանդերձ, Դսեղի բյուջեի 2013թ. եկամուտների հավաքագրումը 2014թ.-ի հունվարի 1-ի դրությամբ կազմել է 89,5%: Այս ցուցանիշն ապահովելու համար, համայնքապետի առաջարկությամբ, Դսեղի ավագանին 2013թ.-ի մայիսի 6-ի թիվ 24 որոշումով համայնքի 2013թ.-ի բյուջեի գյուղատնտեսական նշանակության հողերի նախատեսված 11 մլն 994 հազար 6 հարյուր դրամ եկամուտները նվազեցրել է 3 մլն 850 հազար դրամով եւ բյուջեում հողի հարկի եկամուտները սահմանել է 8 մլն 144 հազար 600 դրամ: Վարչական հանձնաժողովը չի արձանագրել այս փաստը:
Թեեւ Դսեղում ընդերք չի օգտագործվում, իսկ բնապահպանական խնդիրները բացառապես կապվում են ապօրինի անտառահատումների հետ, այսուհանդերձ Լոռու մարզպետարանի վարչական հսկողություն իրականացնող հանձնաժողովը նպատակահարմար է համարել Դսեղում ուսումնասիրել նաեւ ընդերքօգտագործումը եւ դրանից բխող բնապահպանական խնդիրները: Այստեղ էլ վարչական հանձնաժողովն արձանագրել է, որ Դսեղի վարչական տարածքում սպառված հանքավայրեր չկան, բնապահպանական գործառույթներ էլ չեն իրականացվել:
Վերահսկողության արդյունքների վերաբերյալ Դսեղի համայնքապետ Նորիկ Քոչարյանն առարկություններ չի ներկայացրել:
Մեկնաբանություններ (1)
Մեկնաբանել