Անահիտ Բաղդասարյան

ՀՀ Սյունիքի մարզի ընդհանուր իրավասության առաջին ատյանի դատարանի Գորիսի նստավայրում հուլիսի 24-ին շարունակվեց Գորիսի նախկին քաղաքապետ Սամվել Հարությունյանն ընդդեմ Սյունիքի նախկին մարզպետ Սուրիկ Խաչատրյանի գործով նախնական դատական նիստը: Դատական նիստին ներկա չէր ո́չ հայցվորը, ո́չ էլ պատասխանողը:

Դատավոր Մուրադ Հովակիմյանը տեղեկացրեց, որ հայցվոր Սամվել Հարությունյանը նախորդ դատական նիստի ժամանակ խնդրել էր, որ գործը քննվի իր բացակայությամբ, իսկ պատասխանող, հակըդդեմ հայցվոր Սուրիկ Խաչատրյանի ներկայացուցիչ Մարտին Զիլֆուղարյանը դատարանին դիմում է ներկայացրել, որով հայտնել է, որ հիվանդության պատճառով չի կարողանա ներկայանալ դատական նիստին եւ խնդրել է նախնական դատական նիստ նշանակել մեկ այլ օր: Ս. Խաչատրյանի ներկայացուցիչը նաեւ նշել է, որ հաջորդ դատական նիստում գրավոր ապացույցներ կներկայացնի:   

Դատարանը որոշեց հետաձգել դատական նիստը:

Հիշեցնենք, որ  Ս. Հարությունյանը դիմել է դատարան՝ խնդրելով պարտավորեցնել Սուրիկ Խաչատրյանին shamshyan.com լրատվական կայքի միջոցով ներողություն խնդրել` տարբեր լրատվամիջոցներում հրապարակված հարցազրույցներում իրեն «հոգեկան հիվանդ» անվանելու համար եւ փոխհատուցել նվազագույն աշխատավարձի 1000-ապատիկի չափով:

Նույն օրը տեղի ունեցավ նաեւ Սամվել Հարությունյանն ընդդեմ Սուրեն Բաղդասարյանի դատական նիստը: Նշված գործով հայցվոր Ս. Հարությունյանը պահանջում է lurer.com լրատվական կայքի միջոցով հրապարակայնորեն հերքել իր պատիվն ու արժանապատվությունը արատավորող փաստացի տվյալները եւ ներողություն խնդրել: Պահանջում է նաեւ զրպարտության միջոցով իր պատիվն ու արժանապատվությունը արատավորելու համար պատասխանողից բռնագանձել սահմանված նվազագույն աշխատավարձի 2000-ապատիկի չափով գումար, եւս նվազագույն աշխատավարձի 1000-ապատիկի չափով՝ վիրավորանքի միջոցով իր պատիվն ու արժանապատվությունը արատավորելու համար:

Մարտին Զիլֆուղարյանը, ով նաեւ պատասխանող Սուրեն Բաղդասարյանի ներկայացուցիչն էր,  դատարանին դիմում էր ներկայացրել` հետաձգելու դատական նիստը: