Ախալքալաքի շրջանի Կարծախ գյուղի բնակչությունն ավանդաբար հուլիսյան վերջին օրերից մեկը նվիրում է հայ մեծ աշուղ Ջիվանու մեծարմանը: Ջավախքի ընդհանուր առաջնորդական փոխանորդության մամլո դիվանը հայտնում է, որ հուլիսի 26-ի առավոտյան Սուրբ Կարապետ եկեղեցում մատուցվեց սուրբ և անմահ պատարագ, որի ավարտին կատարվեց հոգեհանգստյան կարգ: Պատարագի ավարտին հյուրերը Վիրահայոց թեմի առաջնորդ Տեր Վազգեն եպիսկոպոս Միրզախանյանի, հոգևոր դասի և ժողովրդի ուղեկցությամբ ծաղիկներ դրեցին Ջիվանու հուշարձանին:

Մեծն Ջիվանու ավանդական տոնին իրենց մասնակցությունն էին բերել հյուրեր Հայաստանից և Վրաստանից: Վիրահայոց թեմի առաջնորդն իր գնահատանքն ու օրհնությունը բերեց Ախալքալաքի տեղական ինքնակառավարման մարմիններին՝ բարձր գնահատելով նրանց կատարած աշխատանքը: Վիրահայոց թեմի առաջնորդը տոնական միջոցառման ժամանակ իր խոսքում ասաց. «Ջիվանու ստեղծած արվեստով մենք ապրում ենք։ Այն, ինչ ստեղծել է նա, որը կոչվում է արվեստ, մշակույթ, անմահ է։ Նրա արվեստը հարյուրամյակներ որպես խոհափիլիսոփայություն, որպես կյանքի ուղենիշ առաջնորդում է մեզ»:

Ջիվանու մեծարմանը նվիրված տոնահանդեսին՝ վերստին տարածվեց նրա երգն ու երաժշտությունը: Բեմում Հայաստանի Հանրապետության Հանրային ռադիոյի «Սայաթ Նովա» անսամբլն էր ջիվանական երգ ու տաղով։