Բացակա 2-րդը կամ Սյունիքի մարզկենտրոնը Կապանը չէ
Փողը խոշորացույց է. բարին իր փողով օգնում է քեզ, իսկ ոչ-բարին՝ քեզ ստրկացնում: Պետությունն էլ նույնն է. լավ պետությունը օգնում է քեզ, իսկ վատը՝ քեզ ստրկացնում:
Հայը դարերով պետություն չի ունեցել ու նայել է վերևում նստած (հաճախ օտար) մե՛կին. ուղղահայաց/վերտիկալ (top-down) մտածելակերպը նստվածք է տվել հայի մեջ:
Այսօրվա Հայաստանը «1»-ի տիպիկ պետություն ու հասարակություն է. «շեֆը» հրահանգում է իր ենթաշեֆին, ենթաշեֆը՝ իր ենթաշեֆին, վերջինս էլ՝ իր ենթաշեֆին... ու այսպես մինչև մանկապարտեզի ամենավերջին դաստիրակը: Բոլորը նստած-սպասում են «շեֆին»: Հենց սրա՛ համար հային «ինչ-որ մեկը միշտ պիտի «փրկի»»:
Նույն իրավիճակն է Հայաստանի դատա-իրավական համակարգում, որտեղ անցումը ժյուրիով դատավարություններին վաղուց իրագործված պիտի լիներ:
Այսինքն՝ Հայաստանում չկա՛ պրոֆեսիոնալիզմ:
«1»-ի ցայտուն օրինակ է Հայաստանի միապալատ պառլամենտն ու (սահմանադրորեն) անատամ մարզերը:
Ուժեղ երկրները երկպալատ են ու դեսենտրալիզացված: Ուժեղ երկրները ֆեդերատիվ են. «2»-ի տեսակից:
Հայաստանում մարզերն (օրենսդրորեն) այնքան արհամարված են,որ նույնիսկ «մարզի մայրաքաղաք» անվան փոխարեն օգտագործվում է «մարզկենտրոն» բառը: Բոլոր լավ երկրներում օգտագործում են «մայրաքաղաք» (capital) բառը: Սյունիքի մարզկենտրոնը Կապանը չէ ու չի էլ կարող լինել, որովհետև Կապանը Սյունիքի կենտրոնում չէ, այլ հարավում: Նույնը՝ մյուս մարզերում:
Հայաստանի քաղաքական կյանքում մարզերն այսօր բացարձակ ոչինչ չունեն ասելու. ո՛չ մի էական լծակ չկա: Դեռ ավելին՝ նույնիսկ մարզի ներքաղաքական կյանքում նրանք բացակա են: Մարզերում այլևս քաղաքական (անկախ) միտք ու ինտելիգենցիա չկա: Սա քաղաքական ինքնասպանություն է. և՛ մարզի, և՛ պետության համար:
Եվ ինչպե՞ս մարզի ներքաղաքական կյանքում մարզերն ասելիք կարող են ունենալ, երբ ՀՀ Կուսակցությունների մասին օրենքի հակադեմոկրատական հոդված 5 (1)-ը թույլ չի տալիս տեղական անկախ կուսակցությունների ստեղծում: Ամեն ինչ պիտի հսկվի Երևանից («1»): «1»-ի մյուս ցայտուն օրինակն այն է,որ այսօր,օրինակ, Կապանում համարյա ամեն հաստատություն Երևանյան մասնաճյու՛ղ է: Եթե սրան գումարենք այն,որ մարզպետը չի ընտրվում ու չկա ժողովրդի կողմից ընտրվող «Մարզային Ժողով»,ապա պարզ է դառնում, թե մարզերն այսօր ինչու են քաղաքականապես մեռած: Եթե ձեզ թվում է,թե քաղաքականապես մեռած մարզերում տնտեսություն կարելի է զարգացնել,ապա իրոք սխալվում եք:
Հայաստանում բացակա է 2-րդը՝ «2»-ի մոդելը. ՀՈՐԻԶՈՆԱԿԱՆ մտածելակերպն ու գործելաձևը (team work), առանց որի Հայաստանը չի հզորանալու: Վաղու՛ց ժամանակն է, որ Հայաստանն էլ անցնի «2»-ի մոդելի՝ բոլոր բնագավառներում: Ուստի՝ նախ և առաջ.
1. Հայաստանի ֆեդերատիվ հանրապետություն,
2. Ժողովրդի կողմից ընտրովի «Մարզային Ժողով», որը կկարգավորի մարզի բոլոր ներքին խնդիրները,
3. Երկպալատ պառլամենտ, որի վերին պալատում պիտի նստեն «Մարզային Ժողովների» պատգամավորները,
4. Մարզերի թիվը դարձնել 5 (Արարատ, Շիրակ, Լոռի, Գեղարքունիք, Սյունիք՝ գումարած Երևան): Մարզերը պիտի ունենան սեփական ավտոնոմ բյուջե և սեփական դրոշ, գերբ, հիմն, որ մարդիկ է՛լ ավելի ամուր կապվեն իրենց մարզերին:
5. Կապանը դարձնել Հայաստանի 2-րդ մայրաքաղաք և ազատ առևտրի գոտի՝ որպես ստրատեգիական հարավում ամրոց: Իսկ Սյունիքի մարզի նոր մայրաքաղաք դարձնել Դաստակերտ քաղաքը:
Վարազ Սյունի
Ամստերդամ
28.07.2014
Մեկնաբանություններ (10)
Մեկնաբանել