Արցախի «Ազգային վերածնունդ» կուսակցությունն այսօր մտահոգություն է հայտնել Իրանի Իսլամական Հանրապետության հետ Լեռնային Ղարաբաղի հարաբերությունների ցածր մակարդակի մասին:

Ինչպես նշվում է կուսակցության հաղորդագրությունում, Իրանի հետ ակտիվ հարաբերություններն Արցախի համար նոր հնարավորություններ կարող են բացել տնտեսական, քաղաքական և մշակութային ոլորտներում՝ հաշվի առնելով նաև Իրանում առկա ակտիվ հայ համայնքը:

Կուսակցությունը կոչ է անում Արցախի իշխանություններին հրաժարվել վերջին տարիների որդեգրած պասիվ կեցվածքից և ավելի ակտիվ աշխատել հարևան երկրի հետ, Թեհրանում բացել Արցախի մշտական ներկայացուցչություն և ուղղակի կապեր հաստատել Իրանի ղեկավարության, քաղաքական, տնտեսական և մշակութային էլիտաների հետ: