Արշավ և ակցիա, այցելություն Թռչկան

Սիրելի ընկերներ, բարեկամներ, ՀՀ քաղաքացիներ, ձեզնից շատերն արդեն լսել են Թռչկանի ջրվեժի հիմնախնդրի մասին: Վտանգված է ՀՀ ամենաբարձր ու ամենաջրառատ ջրվեժը: Ջրվեժի տարածքում հենց այս պահին էլ որոճում են մի քանի վնասատու կենդանիներ (տրակտորներ, բեռնատարներ): Բնավիրման նախարարությունը կարծես ականջի հետև է գցել այս հիմնախնդրի կարգավորումը: Այս պարագայում «Պահպանենք Թռչկանի ջրվեժը» նախաձեռնությունը շարունակում է բարձրաձայնել ջրվեժին սպառնացող վտանգի մասին և կոնկրետ քայլեր ձեռնարկում ՀԷԿ-ի կառուցումը կանխարգելելու ուղղությամբ: Այսպիսով, շաբաթ օրը՝ հոկտեմբերի 22-ին, այցելում ենք Թռչկանի ջրվեժ:

Այցելության նպատակը՝ տեղում ծանոթանալ շինարարության ներկայիս ընթացքին, զրուցել շինարարների և բանվորների հետ՝ հորդորելով նրանց զերծ մնալ բնության հուշարձանին վնաս հասցվող աշխատանք կատարելուց, հանդիպել Նալբանդ, Շիրակամուտ և Մեծ Պարնի գյուղերի բնակիչների հետ՝ լսելու նրանց կարծիքն այս ամենի մասին և հայտնելու մեր զորակցությունը Թռչկանի ջրվեժի պահպանման համար մղվող պայքարում, ինչպես նաև ևս մեկ անգամ տեսնելու և հիանալու բնության այս հիասքանչ կոթողով:

Ջրվեժի մերձակայքում կատարելու ենք ծառատունկ, որի համար տնկիներ և մասնագետներ է տրամադրում «Հայաստանի ծառատունկ ծրագիրը»: Կատարվելու է նաև շինարարական փոսի խորհրդանշական լցոնում: Մեզ հետ կունենանք նաև ջրվեժի պահպանման վերաբերյալ կոչերով մի շարք պաստառներ: Նախատեսվում է նաև մշակութային ծրագիր: Ակցիային մասնակցելու է Գյումրիի Օրհուս կենտրոնը, բազմաթիվ հասարակական կազմակերպությունների և քաղաքացիական նախաձեռնությունների անդամներ:

Միացեք, միասին տեր կանգնենք Թռչկանի ջրվեժին...

Շարժվում ենք Ավ. Իսահակյանի արձանի մոտից, շաբաթ օրը՝ հոկտեմբերի 22-ին, ժ. 8:00

Հարկ է վերցնել մեկ օրվա ուտելիք, ջուր, տաք հագուստ:

Գրանցվելու և մանրամասների համար զանգահարել Էդգարին՝ 094 89 55 16 հեռախոսահամարով:

Գրանցման վերջնաժամկետը՝ ուրբաթ՝ 18:00: