Եվրո 2016-ի եզրափակիչ փուլի սպասումով
Հայկ Դավթյան
Ֆուտբոլի Հայաստանի ազգային հավաքականը մի քանի օրից շվեյցարացի գլխավոր մարզիչ Բեռնար Շալանդի գլխավորությամբ կսկսի պատրաստվել Եվրո 2016-ի նախընտրական փուլի մեր հավաքականի առաջին հանդիպմանը: Մեր ընտրանին ընդգրկված է I խմբում, որտեղ Շալանդի սաների մրցակիցներն են լինելու Պորտուգալիայի, Դանիայի, Սերբիայի եւ Ալբանիայի հավաքականները: Ճիշտ է, տղաների համար խումբն ամենեւին էլ ամենահեշտը չէ, սակայն «մահվան» անվանել այն նույպես չի կարելի: Ոչ խաղային տեսանկյունից միակ դժվարությունը կայանում է նրանում, որ ի տարբերություն մյուս խմբերի` մեր հավաքականին բաժին հասած վերջին` I խմբում մեկ հավաքական պակաս է լինելու, ինչը տղաների գործը կարող է դժվարացնել այնքանով, որ եթե նրանք զբաղեցնեն 3-րդ հորիզոնականը, ապա լրացուցիչ արդյունքներով, ամենայն հավանականությամբ, կզիջեն մյուս խմբերի 3-րդ հորիզոնականները զբաղեցրած հավաքակններին:
Հայաստանի ազգային հավաքականի մարզիչ Բեռնար Շալանդի ու նրա խաղացողների առջեւ խնդիր է դրված նվաճել Եվրո 2016-ի ուղեգիր, ինչը համաձայնեք նման խմբում հեշտ առաջադրանք չէ: Հիշելով մեր ընտրանու վերջին 2-3 տարվա խաղն ու գրանցած արդյունքները, երկրպագուները ցանկանում են գոնե այս անգամ մեր հավաքականին տեսնել Ֆրանսիայում կայանալիք նման խոշոր ֆուտբոլային մրցաշարի եզրափակիչ փուլում:
Եվրո 2012-ի մասնակցելու համար Վարդան Մինասյանի սաներին խանգարեց մրցավարական սխալ որոշումը. մունդիալ 2014-ի մասնակցությունը կկայանար, եթե չլիներ Մալթայի դեմ մրցավեճում տղաների ցուցադրած անփույթ խաղը: Այժմ երկրպագուներին չեն բավարարի մրցավարական սխալ որոշման, անփույթ խաղի կամ «մեր հավաքականը դեռ երկար ճանապարհ ունի անցնելու` Եվրոին մասնակցելու համար» խոսքերն ու պատճառաբանությունները:
Ինչպես արդեն նշեցինք, Հայաստանի հավաքականը I խմբում ընգրկված է Պորտուգալիայի, Դանիայի, Սերբիայի եւ Ալբանիայի ընտրանիների հետ: Հավաքականի առաջին հանդիպումը կայանալու է սեպտեմբերի 7-ին, դանիացիների դեմ` Կոպենհագենում: Մինչ այդ Շալանդի սաները Լատվիայում ստուգողական հանդիպում կանցկացնեն այդ երկրի հավաքականի հետ: Խոսելով մեր հավաքականի մասին նշենք, որ Շալանդը վնասվածքների պատճառով չի կարող օգտագործել հավաքականի 2 առանցքային խաղացողների` Մոսկվայի Սպարտակի հարձակվող Յուրա Մովսիսյանին եւ նույն ակումբի աջ եզրային վինգեր Արաս Օզբիլիսին: Յ. Մովսիսյանին կարող են փոխարինել Արթուր Սարկիսովը կամ Մաուրո Գեւգեոզյանը, իսկ աջ եզրում կարող է խաղալ վնասվածքից բոլորովին վերջերս ապաքինված Եկատերինբուրգի Ուրալի ֆուտբոլիստ Էդգար Մանուչարյանը:
Ի հակադրություն այս կորուստների նշենք, որ հավաքականի ձախ եզրային վինգեր Գեւորգ Ղազարյանը համալրել է Հունաստանի ուժեղագույն ակումբի` Օլիմպիակոսի շարքերը եւ փայլուն մարզավիճակ է հավաքել թիմի հետ անցկացրած մինչմրցաշրջանային պատրաստության ընթացքում: Լավ մարզավիճակում են գտնվում նաեւ պաշտպաններ Ռոբերտ Արզումանյանն ու Իրանական Էսթեղլալ տեղափոխված Հրայր Մկոյանը: Դե իսկ ընտրանու առաջատար Հենրխ Մխիթարյանի մասին խոսելն ավելորդ է: Գրավելով Մյունխենի Բավարիայի դարպասն ու տիրանալով Գերմանիայի սուպերգավաթին` Հ. Մխիթարյանը բարձր տրամադրությամբ կմիանա ազգային հավաքականին:
Դանիացիների առաջատարներ Կրիստյան Էրիկսենը, Մարտին Բրեյթվեյթն ու Դանիել Ագգերը կազմ ու պատրաստ կլինեն խաղին: ՖԻՖԱ-ի հրապարակած հավաքականների վարկանիշային ցուցակում մեր հավաքականը գտնվում է 41-րդ, դանիացիները` 26-րդ հորիզոնակններում: Սեփական երկրպագուների աչքի առաջ Դանիայի հավաքականը կփորձի ռեւանշի հասնել ոչ վաղ անցյալում մեր տղաներից կրած 0-4 հաշվով պարտության դիմաց:
Հույս հայտնենք, որ Կոպենհագենում մեր տղաներին կաջակցեն Դանիայում բնակվող հայերն ու Հայաստանից մեկնած երկրպագուները, եւ արդյունքում հավաքականը տուն կվերադառնա իր ակտվում ունենալով 3 միավոր:
Մեկնաբանություններ (2)
Մեկնաբանել