Հայաստանի հրաձգության ֆեդերացիայի հայտնում են, որ Իսպանիայի Գրանադա քաղաքում սեպտեմբերի 6-20-ը ընթանում է հրաձգութան աշխարհի 51-րդ առաջնությունը, որը տեղի է ունենում 4 տարին մեկ՝ օլիմպիական խաղերի միջակայքում, որտեղ բացի մեդալներից` ստուգատեսին մասնակցող 94 երկրի 2000 հրաձիգներ պայքարում են նաև 2016թ. օլիմպիական խաղերին մասնակցելու 64 ուղեգրերի համար: Մասնակից հայ հրաձիգներից 7-ը, չնայած մասնակցում են երիտասարդական տարիքային խմբում, սակայն պատանիներ են: Աշխարհի առաջնությունը հրաձգության առաջին մրցաշարն է, որտեղ խաղարկվում են Ռիո 2016-ի օլիմպիական ուղեգրեր, և մեր պատանիները դեռ ժամանակ ունեն մեծահասակների հետ ուժերը չափելու և Ռիո 2016-ի ուղեգիր նվաճելու փորձ կատարելու:

Այսօր` սեպտեմբերի 16-ին, 10մ, վազող թիրախ (30+30 կրակոց) վարժության մարզիկները դանդաղ վազք հատվածն են կրակել, մյուս կեսը՝ արագ վազքը և եզրափակիչը տեղի կունենան վաղը՝ սեպտեմբերի 17-ին: Երիտասարդ տղաների պայքարում 12 մրցակիցներից Շանթ Սարգսյանը 283 միավորով 3 մրցակիցների հետ միևնույն արդյունքով կիսում է 2-5-րդ հորիզոնականները, Ռազմիկ Մինասյանը 276 միավորով 8-րդն է, Հովհաննես Խաչատրյանը 265 միավորով՝ 11-րդը: Նույն վարժության թիմային պայքարում մեր մարզիկներն առայժմ 2-րդ տեղում ընթացող Ռուսաստանի թիմին զիջում են 1 միավոր, և հնարավոր է՝ վաղը պատկերը փոխվի:

Նույն վարժության աղջիկների (20+20 կրակոց) պայքարում Լիլիթ Մկրտչյանը 183 միավորով առայժմ ընթանում է 2-րդ տեղում: Ամենաբարձր արդյունքը ցույց է տվել հունգարացի Վերոնիկա Մաջոռը, Լիլիթին հետևում են 178 միավորով գերմանացի Նինա Դանները և քաթարցի՝ Սաաիդա Թաաեեբը: Ինչպես տղաների մոտ, այնպես էլ աղջիկների՝ ամեն բան կախված է արագ վազքից: Եզրափակիչ կանցնեն լավագույն 4-ը:

Զավեն Իգիթյանը 50մ, ստանդարտ ատրճանակ (3x20 կրակոց), տղաների պայքարում 32 մրցակիցներից 537 միացրորով գրավել է 25-րդ տեղը:

Հրաչիկ Բաբայանը 50մ, հրացան, պառկած դիրքից (60 կրակոց) երիտասարդների պայքարում 61 մրցակցից՝ 606.1 միավորով գրավել է 49-րդ տեղը:

Հիշեցնենք, որ Հայաստանն ունի անհատական արծաթե և թիմային բրոնզե մեդալներ:

Հրաչ Բաբայանն 10մ, օդամղիչ հրացան վարժությունից արդեն նվաճել է արծաթե մեդալ: Պատանեկան օլիմպիական խաղերի և արդեն աշխարհի երիտասարդների առաջնության փոխչեմպիոն Հրաչիկ Բաբայանը ՀՀ սպորտի և երիտասարդության հարցերի նախարարության Երևանի հրաձգության մանկապատանեկան մարզադպրոցի սան է, անձնական մարզիչն է Անդրանիկ Այվազյանը: Ինչպես նաև 10մ, վազող թիրախ՝ խառը վազք (2x20 կրակոց), տղաների թիմային պայքարում հայկական եռյակը` Ռազմիկ Մինասյան, Հովհաննես Խաչատրյան և Շանթ Սարգսյան, արժանացել է բրոնզե մեդալի: Ռազմիկ Մինասյանի և Շանթ Սարգսյանի անձնական մարզիչն է Գագիկ Մելոյանը, գյումրեցի Հովհաննես Խաչատրյանի անձնական մարզիչն է Էդիկ Գաբրիելյանը:

Աշխարհի առաջնությանը Հայաստանը ներկայացնում են.

Մեր մարզիկները մասնակցում են Հայաստանի հրաձգության հավաքական թիմի գլխավոր մարզիչ Սեյրան Նիկողոսյանի, մարզիչներ Խորեն Իգիթյանի և Գագիկ Մելոյանի մարզչական ղեկավարությամբ: Աշխարհի առաջնության մրցելույթներին անձամբ հետևում և իր ներկայությամբ մազրիկներին ոգևորում է Հայաստանի հրաձգության ֆեդերացիայի նախագահ Արթուր Հովհաննիսյանը: Նման ուժեղ հավաքական Հայաստանն ունեցել է ԽՍՀՄ-ի օրոք. միջազգային կարգի սպորտի վարպետներ՝ Քրիստիան Լաուեր, Հրաչիկ Բաբայան՝ պատանեկան օլիմպիական խաղերի փոխչեմպիոն, սպորտի վարպետներ՝ Զավեն Իգիթյան՝ Եվրոպայի պատանիների առաջնության չեմպիոն, Լիլիթ Մկրտչյան՝ Եվրոպայի երիտասարդների առաջնության բրոնզե մեդալակիր, Ռազմիկ Մինասյան և Շանթ Սարգսյան (սպորտի վարպետի թեկնածու) ՝ Եվրոպայի երիտասարդների առաջնության թիմային կրկնակի բրոնզե մեդալակիրներ: 

Մրցելույթներին կարող եք հետևել Հրաձգային սպորտի միջազգայնին ֆեդերացիայի կայքում http://www.issf-sports.org/

Հայաստանի հրաձգության հավաքական թիմը հայրենիք կվերադառնա սեպտեմբերի 21-ին ժամը 14:00: Միասին դիմավորենք մեդալակիրներին: