Գյումրու ավագանու հերթական նիստի օրակարգը բավական հագեցած էր: Ընդգրկված էր 30 հիմնական եւ 2 լրացուցիչ հարց: Մինչ նիստը սկսելը` քաղաքապետ Սամվել Բալասանյանն առաջարկեց հոկտեմբերի 5-ին նշանակված «Քաղաքի օր» տոնակատարությունը հետաձգել անորոշ ժամանակով՝ պայամանավորված անձրեւային եղանակներով: Բոլոր միջոցառումները բացօթյա են եւ օդերեւութաբանների կանխատեսումներին վստահող քաղաքապետը գյումրեցիների տոնը «չհարամելու» մտավախությամբ է նման քայլի գնում:

«Եթե ավագանին որոշի, որ նշանակված օրը մնալու է անփոփոխ, ես իհարկե կենթարկվեմ, բայց նայել ենք, եւ այդ օրը անձրեւոտ է լինելու,- նշեց քաղաքապետը,- ըստ մեր ձեռքի տակ եղած տեղեկությունների՝ հոկտեմբերի 22-ից լինելու են անձրեւային եղանակներ եւ մենք կարող ենք քաղաքի օրը նշել ամսի 25-ին կամ 26-ին»: Ավագանին որոշեց «Գյումրու օր» ամենամյա տոնակատարությունը հետաձգել անորոշ ժամանակով:

Ավագանու նիստի քննարկմանն էր ներկայացված Գյումրի համայնքում տեղական ինքնակառավարմանը բնակիչների մասնակցության կարգը: Փաստաթղթի կազմմանը եւ մշակմանը մասնակցել էր ավագանիներից Լեւոն Բարսեղյանը:

«Հատուկ օրենքով նախանշվում է, որ ավագանին պետք է ընդունի իր համայնքում քաղաքացիների տեղական ինքնակառավարմանը մասնակցելու կարգ: Սա բխում է Եվրախորհրդի տեղական ինքնակառավարման խարտիայից եւ նրա լրացուցիչ արձանագրությունից՝ ընդունած 2009 թ-ին, որի մեջ պարզապես ասվում է, որ պիտի քաղաքացիներին ամեն կերպ խրախուսել, որ նրանք մասնակցեն տեղական ինքնակառավարմանը,-հայտարարեց Լեւոն Բարսեղյանը,- այլ խոսքով  ՏԻՄ մասնակցությունը չպիտի սահմանափակվի միայն ընտրություններով: Բոլոր կետերին չեմ անդրադառնա, բայց կնշեմ կարեւորներից մեկը: Սրանով հնարավորություն է ընձեռվում 16 տարին լրացած քաղաքացիների համար ավագանու նիստի օրակարգին ուղիղ հարց ներկայացնել։ 10 հազարից ավելի բնակչություն ունեցող համայնքի դեպքում չափահաս բնակչության 1 տոկոսի ստորագրությունը բավարար կլինի, որ ցանկացած հարց ընդգրկվի ավագանու օրակարգ,- պարզաբանեց Լ. Բարսեղյանը,- Գյումրի քաղաքի պարագայում բավարար է, որ տվյալ հարցի կամ առաջարկի տակ լինի հազար հոգու ստորագրություն: Մեկ ամսվա ընթացքում բնակչությանը հուզող հարցը քաղաքապետը պիտի ներկայացնի ավագանու քննարկմանը: Ստորագրահավաքի հեղինակներից մեկն իրավունք ունի նիստի ժամանակ հարցն անձամբ ներկայացնելու»:

Սամվել Բալասանյանը եւս կարեւորեց քաղաքացիների՝ ավագանու նիստերին մասնակցության հարցը: Նիստերի անցկացման ներկա տարածքը փոքր է եւ հնարավորություն չի տալիս բոլոր ցանկացողներին՝ ներկա գտնվելու: Առաջիկայում, երբ հիմնանորոգվի նիստերի առավել ընդարձակ դահլիճը, հնարավորություն կընձեռվի ավագանու նիստերին մասնակցության հայտ ներկայացրած բնակիչներին հրավիրել քաղաքապետարան՝ իհարկե նախապես հերթագրելուց հետո:

Ավագանին քննարկեց եւ հաստատեց Հայաստանի եզդիների ազգային միությանը դրամական օգնություն տրամադրելու հարցը: Որոշվեց համայնքային բյուջեից մեկ մլն դրամ փոխանցել եզդիների միությանը: Ավագանին հաստատեց նաեւ ակադեմիկոս, սրտաբան, ծնունդով գյումրեցի Կառլեն Ադամյանին, ըմբշամարտիկ Լեւոն Արսենի Ջուլֆալակյանին, երգիչ Ալիկ Գյունաշյանին Գյումրու պատվավոր քաղաքացու կոչում շնորհելու առաջարկները:

2014 թ-ին Չինաստանում կայացած պատանիների օլիմպիական խաղերում բարձր արդյունքների հասած եւ մեդալներ նվաճած գյումրեցի մարզիկներին, նրանց մարզիչներին սպորտային պարգեւներ շնորհելու մասին հարցը եւս արժանացավ ավագանիների հավանությանը: Ավագանու անդամ Արմեն Բադեյանն առաջարկեց 1 մլն դրամ դրամական աջակցությանն ավելացնել եւս 600 հազար դրամ: Քաղաքապետը թեեւ սկզբում ընդվզեց՝ պատճառաբանելով բյուջեի սուղ հնարավորությունները, սակայն չընդդիմացավ որ հարցն այդ տեսքով դրվի ավագանու քննարկմանը:

Ավագանին որոշեց նաեւ անհատույց օգտագործման իրավունքով 13 հա տարածք տրամադրել «Կումայրի» պատմամշակութային արգելոց թանգարան ՀՈԱԿ-ի «Քանդակագործության ազգային պարկ-թանգարան» մասնաճյուղին: Ավագանին հաստատեց Գյումրու նախկին երկաթուղայինների մշակույթի պալատի վթարային շենքի տարածքը ռուս-հայկական մշակութային համագործակցության հասարակակն ակադեմիայի «Արաքս» կազմակերպությանը տրամադրելու հարցը:

Ավագանու որոշմամբ՝ այսուհետ Գյումրու փողոցներից մեկը, որտեղ գտնվում է մեծանուն գրող Հովհ. Շիրազի տուն-թանգարանը, կկոչվի նրա անունով: