Metallica. ուրիշ ոչինչ էլ կարևոր չէ
Նաիրա Հայարպետյան
1992թ. ամերիկյան հայտնի «Metallica» խումբը թողարկեց իր երրորդ սինգլը համանուն՝ «Metallica» ալբոմից: «Nothing else matters». այսպես էր կոչվում երգը, որը մինչ օրս խմբի պատմության մեջ համարվում է աշխարհում ամենահայտնի և լավագույն երգերից մեկը: Այն ծնվեց պատահաբար, կարելի է ասել ինքն իրեն, երբ խմբի վոկալիստ և կիթառահար Ջեյմս Հեթֆիլդը հեռախոսով զրուցում էր ընկերուհու հետ: Ոչ մեղեդին և ոչ էլ բառերը երաժշտի մտքում միանգամից չհնչեցին, ինչպես երբեմն լինում է: Նա համերգային շրջագայության մեջ էր. տնից ու սիրելիից շատ հեռու և այդ պահին, երբ նրանք զրուցում էին, Հեթֆիլդը՝ մի ձեռքում հեռախոսի լսափողը, մյուսում կիթառը, զուգահեռ նոտաներ էր հնչեցնում: Զրույցի ընթացքն ու փոխանցած զգացողություններն աննկատ սահում էին կիթառի լարերի վրայով: Քիչ անց, թեկուզ մեկ ձեռքով, նրանք նվագեցին խմբի ապագա երգը՝ լավագույններից մեկը ոչ միայն նրանց երգացանկում, այլև ռոք բալլադային ստեղծագործություններում:
«Ինձ համար սա ինքնաբացահայտման և սեփական անձիդ հանդեպ անկեղծության իսկական վկայությունն է ,- ասում է Ջ. Հեթֆիլդը,- համարձակվել ամբողջությամբ բացել սիրտդ՝ հաշվի առնելով, որ այդ արկածախնդրությունը միաժամանակ վտանգավոր է. չէ՞ որ կամ ինչ-որ մեկը կարող է մեխեր խրելով քայլել սրտիդ վրայով, կամ էլ՝ իր սիրտը դնել քոնի կողքին: Իսկ դու երբեք նախապես չես իմանա դրա մասին, քանի դեռ չես փորձել: Իմ կարծիքով՝ սա ամրապնդեց այն համոզմունքը, որ մենք ճիշտ գործ ենք անում. ստեղծագործել սրտի խորքից, այնպես, ինչպես զգում ես և միայն այդ դեպքում դու երբեք չես սխալվի»:
Սկզբում նա երգը նույնիսկ մտադիր էլ չէր ցույց տալ ընկերներին, նվագել նրանց համար: Հարցազրույցներից մեկում Հեթֆիլդը մեկնաբանում է, որ այն ժամանակ նա «Metallica» -ի ողջ էությունը տեսնում էր այնտեղ, որտեղ խմբի չորս անդամներն էին. իսկ նրանք երաժշտության ռիթմին համընթաց թափահարվող գլուխների բազմության մեջ էին՝ ինչ-որ բաներ քանդելու, փշրելու և ոչնչացնելու մասին երգերով: Երգեր կյանքի ըմբոստ, գորշ և երբեմն ագրեսիվ անկյուններից, ոչ թե ծտերի և արագասլաց ավտոմեքենաների մասին, չնայած՝ հենց սրանցով էր հետաքրքրված նրանցից յուրաքանչյուրը: Եվ ահա այս մեկը՝ աղջկադ՝ սիրելիիդ մասին, ինչպե՞ս կարող էր այն տեղավորվել այս պատմության մեջ:
Պարզվեց՝ կարող է, և ի զարմանս երգչի՝ տեղավորվեց շատ հաջող առաքելությամբ: Այս լեգենդար հայտնության համար երաժշտասերները շնորհակալ պետք է լինեն նախ՝ խմբի թմբկահար Լարս Ուլրիխին, քանի որ հենց նա, երգը առաջին անգամ լսելուն պես, որոշեց, որ այն անպայման պետք է ներգրավվի ալբոմում: 1990թ. օգոստոսի 13-ին Ուլրիխի տանը՝ սեփական ստուդիայում, ձայնագրվեց «Nothing else matters»-ի նախնական՝ դեմո տարբերակը, իսկ մեկ տարի անց թողարկվեց «Metallica» (կոչվում է նաև «The Black Album») ալբոմի կազմում: Հենց այս ալբոմով սկիզբ դրվեց խմբի աստղային կյանքին, համաշխարհային փառքն ու հաջողությունը, ինչպես նաև նախկին «trash metal»-ի գոնե մեկ աստիճանով մեղմությունը պայմանավորելով "Enter Sandman", "The Unforgiven", "Nothing Else Matters", "Wherever I May Roam" և "Sad but True" երգերի հաջողությամբ:
«Nothing else matters» (Մնացյալը կամ ուրիշ ոչինչ կարևոր չէ) խոսքը, ըստ Հեթֆիլդի, երկարուձիգ մի ճանապարհի մասին է. այն մասին, թե ինչպես կարող ես կարոտել սիրածդ աղջկան, ով քեզնից շատ հեռու է: «Ինչպես ասում են՝ աղջիկները գալիս և գնում են, բայց երգը կարող է շատ բան նշանակել տարբեր մարդկանց համար,-ասել է Հեթֆիլդը, - ամեն մեկը յուրովի է պատկերացնում սիրո իմաստը. ոմանց համար դա ընդամենը անկողինն է, մյուսների՝ պարզապես ցանկություն իրենց կողքին մեկն ու մեկին ունենալու, իսկ ինձ համար սերը հնարավորություն է մշտապես ինչ-որ մեկին վստահելու, մանավանդ այն ժամանակ, երբ դու ճանապարհին ես: Այնտեղ դու իրականում կարող ես կորսվել»: Այս երգը այն քչերից մեկն է, որտեղ կիթառի սոլոն նվագում է ոչ թե Քըրք Հեմեթը, այլ հենց Ջեյմս Հեթֆիլդը:
Իր հրապարակման օրվանից այլ երգիչների և երաժիշտների կողմից «Nothing else matters»-ը կատարվել է ավելի քան 40 անգամ: Այդ քավըր տարբերակներից ամենահայտնին, թերևս, ֆիննական « Apocalyptica» խմբինն է՝ թավջութակների և մեթալ երաժշտության երկխոսությամբ:
«Nothing else matters»-ը շրջագայել է խմբի հետագա բոլոր համերգների ժամանակ, իսկ 1999թ. ամերիկացի դիրիժոր և կոմպոզիտոր Մայքլ Կամենը, սինթեզելով դասական երաժշտության հետ, ներկայացրեց երգի նոր մեկնաբանությունը Սան Ֆրանցիսկոյի սիմֆոնիկ նվագախմբի հետ համատեղ նախագծում, ապա՝ համանուն «S&M» ալբոմում:
Մեկնաբանել