HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Սառա Պետրոսյան

Ուրցաձորը ուտոպիա չէ

Ուրցաձոր համայնքի ղեկավար Ռաֆիկ Անդրեասյանը բարձրաձայն ընթերցում է համայնքի 2013-16 թթ·-ի քառամյա զարգացման ծրագրով պլանավորված գործողությունները` ներքին գազատարի անցկացում` 4 կմ, ասֆալատապատում, հանգստի գոտու ստեղծում, մարզադաշտի վերջնական տեսքի բերում, խաղահրապարակի վերանորոգում, դպրոցի դահլիճի գույքի ձեռքբերում....: Յուրաքանչյուր գործողություն թվարկելուց հետո ձայնի գոհունակություն արտահայտող տոնով հնչեցնում է՝ առկա է: Ապա որսալով իմ զարմացական հայացքը` թավ բեղերի տակից հաստատակամորեն ավելացնում է. «Չէ, սա ուտոպիա չէ, վերջին երկու քառամյա ծրագրերում դրված բոլոր խնդիրները լուծել եմ»:

Չհավատալու պատճառ չունեմ և ձեռնպահ եմ մնում ստուգիչ հարցերից, քանի որ մինչ այդ գործընկերներիս հետ շրջել էինք երկհարկանի մշակույթի տան բոլոր անկյուններում, հասցրել էինք և զարմանալ, և հիանալ մեր տեսածով: «Ինչպե՞ս եք կարողացել այսքան կարճ ժամանակամիջոցում այդքան աշխատանք կատարել»,- հարցնում եմ համայնքի ղեկավարին: «Նախորդ քառամյա ծրագրում ավելի շատ հարցեր էինք ընդգրկել և վախենում էի, որ չեմ կարողանալու իրականացնել, բայց բոլորը հասցրեցի»,- եղավ պատասխանը:

Ռաֆիկ Անդրեասյանը պաշտոնավարում է արդեն 15 տարի: «1999թ.-ին, երբ ընտրվեցի համայնքի ղեկավար, ոչ մշակույթի տուն ունեինք, ոչ գազ, ոչ ամբուլատորիա, ոչ էլ դպրոցն էր բարվոք վիճակում: Համայնքում կարևոր խնդիրներն արդեն լուծել ենք` առողջության առաջնային պահպանման կենտրոն ենք կառուցել` պետբյուջեի ֆինանսավորումով, «Վիվասելի» աջակցությամբ վերանորոգել ենք դպրոցը, Սոցներդրումների հիմնադրամի միջոցներով նորոգել ենք մշակույթի տունը, իսկ գույքը ձեռք ենք բերել «Քանութերփարթ ինթերնեշնլի» աջակցությամբ»,- ներկայացնում է Ռաֆիկ Անդրեասյանը:

2007թ· սկսած ամեն տարի պետական բյուջեով իրականացվող «Հրատապ ծրագրերի» շրջանակում գումարներ են հատկացվել գյուղին. կառուցվել է Ուրցաձորի առողջության առաջնային պահպանման կենտրոնը, հիմնանորոգվել է մանկապարտեզը, կառուցվել է մարզադաշտը, հիմնանորոգվել է Գևորգ Մարզպետունու ամրոցը, ասֆալտապատվել է գյուղ մտնող ճանապարհը և այլն:

Թվարկված բոլոր աշխատանքներն, իհարկե, կատարվել են դոնորների աջակցությամբ, սակայն դրանց մեծ մասում Ուրցաձոր համայնքի ներդրումը պարտադիր պայման է եղել: «Քանութերփարթ ինթերնեշնլը» մշակույթի տան գույքը ձեռք բերելու համար տրամադրել է գումարի 60%-ը, պահանջված գումարի 40%-ը պետք է ապահովեր համայնքը: Ներդրում ապահովելն այնքան էլ հեշտ բան չէ մի համայնքի համար, որն ունի 62 մլն դրամ բյուջե և տարվա մեջ մի քանի ծրագրում ներդրում պետք է ապահովի: Նման դեպքերում լուծումները տարբեր կարող են լինել, ամեն ինչ կախված է համայնքի ղեկավարի հնարամտությունից: «Շախմատի սենյակի կահույքն, օրինակ, մի սփյուռքահայ նվիրեց, շախմատ խաղացի հետը՝ կրեցի, այս գույքն առավ»,- ասում է նա ծիծաղելով:

Շախմատի խմբակը Պարի դասարանը

Ուրցաձորի մշակույթի տունը չորս տարի է, ինչ գործում է եւ այս կարճ ժամանակամիջոցում հաջողվել է տպավորիչ ձեռքբերումներ ունենալ· ոչ միայն արվեստի եւ արհեստի տարբեր խմբակների գործունեությունն է իրականություն, այլեւ երաշխավորված է ուսուցման որակը, որի շնորհիվ էլ ապահովված է ուսուցման շարունակականությունը:


Գոբելենների վաճառքից ստացված հասույթով թելեր են գնում, դերձակները պարարվեստի խմբակի համար տարազներ են կարում, ձեւավորում բեմական հերոսների կերպարները եւ այլն:

Երկհարկ շինության մեջ գործում են ոչ միայն արհեստի եւ արվեստի խմբակները, այլեւ ընդարձակ մի տարածք է զբաղեցնում համայնքապետարանը՝ աշխատանքային արդիական պայմաններով, գրադարանը՝ թարմացված գրականությամբ, որը հազվադեպ հանդիպող բան է գյուղական համայնքներում: Աչքիցս չեն վրիպում տեղեկատվական ցուցատախտակները, որում համայնքապետարանի աշխատանքների մասին հանրությանն իրազեկող բավականաչափ ինֆորմացիա կա:

Շենքում շրջայց կատարելիս համայնքի ղեկավարը կանգ է առնում առաջին հարկի սրահում կախված մի գեղանկարի առջեւ: «Նախկին մշակույթի տնից մի ժառանգություն եմ ստացել՝ կոլտնտեսուհիների նկարը»,- շեշտում է նա: Իրական կոլտնտեսականներին եւ գյուղի ոչ վաղ անցյալը սերունդներին է փոխանցվել լուսանկարներով: Այսպես կողք-կողքի, նախանձելի բծախնդիր ձեւավորումով ներկայացված են հինն ու նորը, ավանդականն ու ժամանակակիցը: Համայնքը կարող էր հաստատակամորեն հայտ ներկայացնել Եվրախորհրդի հայաստանյան գրասենյակի «Լավագույն գործելակերպի ծրագիր»-ն ընտրելու համար հայտարարված մրցույթին, եւ հանձնախումբը չտատանվեց «տեղական արվեստներ եւ արհեստներ» անվանակարգում լավագույնը ճանաչել Ուրցաձորին:


Ուրցաձորի ձեռքբերումների մասին հիացմունքով են արտահայտվում համայնքային խնդիրներով հետաքրքրված տեղական ու միջազգային կազմակերպությունները: Վերջիններս Ուրցաձորում սիրով են աշխատում եւ այնպիսի տպավորություն է, որ ծրագիրն ավարտելուց հետո ավելի շատ նրանք են մտածում նորն սկսելու մասին: Պատճառը միայն այն չէ, որ գյուղը գտնվում է Վեդի գետի հովտում, Ուրծի լեռների լանջերին, Խոսրովի արգելոցի հարեւանությամբ, որտեղ նաեւ Գեւորգ Մարզպետունու ամրոցն է գտնվում: Հիմնական պատճառն, իմ կարծիքով, համայնքի ղեկավարի պատրաստակամությունն է` գյուղի բարօրությունն ապահովելու, երեխաների կրթությունն ու դաստիարակությունը բարձր հիմքերի վրա դնելու ցանկությունը, բնակիչների կյանքը բարելավելու նախանձախնդրությունը:

Ուրցաձորի էկո-կրթական կենտրոնում, որը հիմնել է «Վայրի բնության եւ մշակութային արժեքների պահպանման հիմնադրամը», տեղաբնակների համար իրականացվում են բնական ռեսուրսների կառավարման եւ էկոտուրիզմի թեմաներով դասընթացներ: Նպատակը՝ երիտասարդ գյուղացիներին բնության պահպանության եւ էկոտուրիզմի զարգացման աշխատանքներում ներգրավելն է, ինչը հնարավորություն կընձեռի տուրիզմի միջոցով եկամտի լրացուցիչ աղբյուրներ ստեղծել նրանց համար, կրճատել արտագաղթը: Ծրագրի շրջանակներում գյուղում հիմնվել են քայլարշավների եւ ձիարշավների համար նախատեսված ուղիներ, մշակվել են տուրիստական երթուղիները, վերանորոգվել են տեղաբնակների տները` դրանք համապատասխանեցնելով հյուրատներին ներկայացվող պահանջներին:

Բացօթյա հանդիսությունների սրահը

«Այս կազմակերպության հետ արդեն երկարաժամկետ` 15 տարվա ծրագիր ենք իրականացնում: Ուզում ենք տուրիզմը զարգացնել եւ հյուրատները բարելավել: Մի քանի ընտանիքներ սոցիալական ծանր խնդիրներ ունեին եւ նրանց աջակցեցիք այս հարցում, որպեսզի հյուրեր ընդունեն եւ գումար վաստակեն: Այս տարվանից նաեւ այլընտրանքային էներգիայի աղբյուրների օգտագործման ծրագիր ենք իրականացնում՝ կենցաղային ծախսերն ավելի դյուրացնելու համար»,- ներկայացնում է համայնքի ղեկավարը:

Այսուհանդերձ, իրական տուրիստական բնակավայր դառնալուն դեռեւս շատ բան է պակասում Ուրցաձորին· համայնքի ղեկավարը նշում է, որ խմելու ջրի օրվա կարգավորիչ ջրամբարը վերանորոգման խիստ կարիք ունի, ներքին ցանցը մասնակի է փոխվել: «Լավագույն դեպքում օրվա մեջ 2 ժամ են ջուր տալիս, բնակչությունը ջուրը կուտակում է եւ օգտագործում: Համակարգն սպասարկում է «Հայջրմուղկոյուղին», գրություններ ենք ուղարկել, տարբեր մակարդակներում քննարկել ենք հարցը, սակայն դեռեւս բարելավում չի նկատվում»,- ասում է Ռ· Անդրեասյանը: Գյուղը նաեւ ոռոգման ջուր չունի` համակարգը վատ վիճակում է, իսկ ՋՕԵ-րը, նրա ասելով, ներդրում չեն անում:

Մեկնաբանություններ (3)

Марина
Браво то браво ...конечно .Здравствуйте,Рафик.Мы вот тут решили не далее ,как в октябре посетить Ваш благословенный край .И привлёк нас как раз экотуризм ,Мы пытаемся снять бунгало выстроенное в Вашем районе ,Но не тут то было ,Дозвониться практически невозможно .
Arevik
Շնորհավորում եմ. Միշտ առաջ. Հպարտ եմ, որ մարզում ունենք առաջ ընթացող համայնք` հանձինս կայացած համայնքի ղեկավար պարոն Անդրեասյանի.
Рома
Браво Рафик Андреасян, браво!

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter