Այսօր ՏԻՄ ղեկավարի ընտրություններ են ընթանում նաեւ Արթիկի տարածաշրջանի Լուսակերտ (36/01 ընտրատեղամաս) համայնքում:

Հայտ ներկայացրած երեք թեկնածուներից անկուսակցական Մարտին Մեսրոպյանն ինքնառաջադրվելուց մեկ շաբաթ անց ինքնաբացարկ էր հայտնել: Տիմ ղեկավարի պաշտոնին հավակնող թեկնածուներից Սամվել Բալաբեկյանը Լուսակերտի գործող գյուղապետն է, իսկ Մուրադ Ոսկանյանը 1990-ականներին եղել է Լուսակերտի գյուղխորհրդի նախագահը: Երկու թեկնածուն էլ անկուսակցական են եւ ինքնառաջադրվել են:

Մոտ 800  բնակիչ ունեցող համայնքում ընտրելու իրավունք ունեն 487-ը: Ժամը 11:20-ի դրությամբ ընտրություններին մասնակցել է 81 ընտրող: Խախտումներ որպես այդպիսին չեն գրանցվել: Հիմնական խնդիրը, որ արձանագրվում է այս ընտրատեղամասում, ընտրության մասնակիցների սեփական հասցեականության չիմացությունն է: Մյուս խնդիրը, որին մերթընդմերթ բախվում են հանձնաժողովի անդամները նույն ընտանիքի ծեր անդամների միասին քվեախցիկում գտնվելու ձգտումն է:

Լուսակերտցի 83-ամյա Որոշ Աղեկյանը եւ 80-ամյա Մարիա Աղեկյանը, որքան էլ որ հանժնաժողովի անդամը փորձեց չթույլատրել, քվեարկությունը կատարեցին միաժամանակ: Որոշ պապը դժգոհեց, որ իրեն բաժանում են <հազար> տարվա կնոջից: <Ես ակնոց չունիմ, ինքն ակնոցով է, չեմ ուզե ուրիշ մարդ օգնե, թող ինքն օգնե, մարդ ու կնիկ չե՞նք: Համ էլ առիթ է, հազիվ իրար տեսել ենք>,-կատակեց Որոշ պապը՝ արդարանալով, որ իրենք կողմնորոշված տանից եկել են ու ոչ մի օրենք չեն խախտում: