Դդմաշենում գյուղապետ են ընտրում
Արփինե Մինասյան
Գեղարքունիքի մարզի Դդմաշեն, Մաքենիս եւ Ներքին Գետաշեն գյուղերում այսօր ՏԻՄ ղեկավարի ընտրություններ են:
Դդմաշեն համայնքում թիվ 23/1 ընտրատեղամասում առաջադրված է 2 թեկնածու համայնքի ղեկավար ՀՀԿ-ական Ավետիս Ավետիսյանը (նա գյուղապետ է ընտրվել 2010թ-ին) եւ Դդմաշենի գյուղապետարանում գլխավոր մասնագետ, անկուսակցական Բորիս Հակոբյանը: Երկուսն էլ ինքնաառաջադրվել են:
Ընտրություններն անցնում են Դդմաշենի միջնակարգ դպրոցում: 2862 բնակչություն ունեցող գյուղում գրանցված է 1957 ընտրող: Առավոտյան ժամը 9-ինընտրությանը մասնակցել էր15 ընտրող: 15-րդ ընտրողը համայնքի ղեկավար Ավետիս Ավետիսյանն էր: «Հետքը» նրանից հետաքրքրվեց, թե 4 տարվա ընթացքում ինչ խնդիրներ են լուծվել եւ ինչ անլուծելի խնդիրներ դեռ կան:
«Ճանապարհի շինարարություն է կատարվել, դպրոցի շենքի վերանորոգում, 2400մ փողոցային լուսավորության ցանցի անցկացում, խմելու ջրագծի ներքին ցանցի անցկացում, մանկապարտեզի շինարարություն, գյուղապետարանի շենքի վերանորոգում, ասֆալտաում»,-թվարկում է Ավետիս Ավետիսյանը` հավելելով, որ դեռ աշխատանքներ մնացել են: Նա նշեց, որ կոյուղու ցանցի խնդիրների պատճառներով մանկապարտեզի շենքի բացումն է ուշանում:
Ընտրատեղամասում առավոտյան ընտրողների պասիվություն էր նկատվում, ինչը 23/1 տեղամասային ընտրական հանձնաժողովի նախագահ, ՀՀԿ-ական Արթուր Շավարշյանը պայմանավորում է անձրեւային եղանակով:
«Դե ցեխ է, մարդիկ հավես չեն անում տներից դուրս գան, համ էլ իրանց գործերը երեւի չեն վերջացրել»,-ասաց նա:
Ընտրության եկած մյուս թեկնածուից` Դդմաշենի գյուղապետարանում գլխավոր մասնագետ, անկուսակցական Բորիս Հակոբյանից փորձեցինք հարցազրույց վերցնել, վերջինս խուսափեց հարցազրույցից` շտապելով դուրս եկավ ընտրասենյակից:
Տարեց մի մարդ փորձում էր հանձնաժողովի անդամների առաջ բաց քվեարկություն կատարել, բայց վերջիններս արգելեցին եւ պապիկն իր ընտրությունը կատարեց քվեախցիկում:
23/1 ընտրատեղամասում դիտորդական առաքելություն են անցկացնում «Թրանսփարենսի ինթերնեյշնլ հակակոռուպցիոն կենտրոնի» եւ «Իրավունքի Եվրոպա միավորման» ներկայացուցիչները: Նրանք մինչ այս ժամը խախտումներ չեն արձանագրել:
Մեկնաբանել