Լուսակերտցիների որոշ մասի համար միեւնույն է, թե ով կընտրվի համայնքի ղեկավար
Արդեն կեսօրին Լուսակերտ համայնքում տեղակայված թիվ 36/01 ընտրատեղամասում բավական մեծ ակտիվություն էր նկատվում: 487 ընտրողից ժամը 12:30-ի դրությամբ քվեարկությանը մասնակցել էր 150 ընտրող: Ընտրատեղամասից դուրս փորձեցինք պարզել, թե ինչ ակնկալիք ունեն լուսակերտցիները ՏԻՄ ընտրություններից, արդյո՞ք դրական են համարում ղեկավարի փոփոխությունը, թե կգերդասեն, որ համայնքը շարունակի ղեկավարել նախկին համայնքապետը:
Տարեց կանայք, անգամ որոշ երիտասարդներ նշեցին, որ իրենց համար միեւնույն է, թե որ թեկնածուն կընտրվի: Նրանցից եւ ոչ մեկը չմատնանշեց որեւէ խնդիր գյուղում, որ կցանկանային լուծում ստանար ՏԻՄ ընտրություններից հետո:
«Մեռնիմ ջանիդ, մեզի համար մեկ է, օրինակ իմ ու աղջկաս համար լրիվ մեկ է, թե ով կընտրվի, տարբերություն չկա,-շեշտեց լուսակերտցի Աղեկյան Արմենուհին,-բայց ես իմ ուզածին եկել, ընտրել եմ»:
Արտագնա աշխատանքից վերջերս գյուղ վերադարձած Ավետիս Սաֆարյանը մատնանշեց մանկապարտեզի բացակայությունը եւ ասաց, որ նոր ղեկավարից ակնկալում է հենց այդ խնդրի լուծումը: «Երբեք մանկապարտեզ չենք ունեցել, շատ լավ կեղներ, օր բացվեր, երիտասարդներն էլ ամուսնանային՝ մեկի տեղը 4 երեխա ունենային: Նորմալ դպրոցի շենք չունինք, ջահելությունը աշխատանք չունի, Ռուսաստանի պոչն է բռնել: Ձեր աչքով էլ կտեսնիք, օր ծերերը շատ են: Ով էլ ընտրվի, գուզենանք, օր կարեւոր պրոբլեմները գյուղի լուծի»,-նշեց Ավետիս Սաֆարյանը:
Մեկնաբանել