Մաքենիսում համայնքապետի ընտրություններ են
Արփինե Մինասյան
Գեղարքունիքի մարզի Մաքենիս գյուղում` 24/1 ընտրատեղամասում, որտեղ համայնքապետի ընտրություններ են այսօր, մինչեւ ժամը 14:30-ը ակտիվություն չի նկատվել: «Մարտունու կանանց համայնքային խորհուրդ» հ/կ-ի դիտորդ Լուսինե Եղոյանը նշեց, որ ընտրությունները հանգիստ մթնոլորտում են անցնում: Մինչեւ ժամը 14:30 300 ընտրողից իր քաղաքացիական պարտքը կատարել է 97 ընտրող:
«Ընդամենը 1 թեկնածու է, մարդկանց հոսքը շատ չէր: Միայն առավոտյան մեկ դեպք եղավ, երբ մեկը փորձում էր տատիկ-պապիկի անձնագրով նրանց փոխարեն ընտրել, մենք նկատեցինք եւ հանձնաժողովին տեղեկացրինք: Այդ մարդը պատճառաբանում էր, թե տարեցներ են եւ անկողնային վիճակում են: Երբ մենք նկատեցինք, հանձնաժողովի անդամը վերադարձրեց անձնագիրը եւ ամեն ինչ շտկվեց»,- հայտնեց դիտորդը:
Հիշեցնենք, որ Մաքենիս գյուղում թիվ 24/1 ընտրատեղամասում առաջադրված է միայն համայնքի ղեկավար՝ ԲՀԿ կուսակցության անդամ Հարություն Մանուկյանը, ով գյուղապետարանում վաղուց է աշխատում: Մյուս թեկնածու անկուսակցական Գոռ Նաջարյանն ինքնաբացարկ էր հայտնել:
Մեկնաբանել