Ներքին Գետաշենում հանձնաժողովի անդամը կնիքով հեռացել է եւ դեռ չի վերադարձել
Արփինե Մինասյան
Ներքին Գետաշենի 24/1 ընտրատեղամասում ժամը 20:20-ի սահմաններում հանձնաժողովի անդամներից մեկը կնիքով հեռացել է ընտրատեղամասից եւ մինչ այժմ չի վերադարձել: Տեղամասում դիտորդություն իրականացնող «Մարտունու կանանց համայնքային խորհուրդ» հկ-ի ներկայացուցիչ Սուսաննա Մարկարյանը մանրամասնեց:
«Երբ նկատեցինք, որ կնիքներից մեկը չկա, դիմեցինք հանձնաժողովի նախագահին, ասեցինք, ուր է մյուս կնիքը, ասաց, որ փորացավի պատճառով հանձնաժողովի անդամը գնացել է, հիմա կգա: Բայց մինչեւ հիմա չկա»,- հայտնեց դիտորդը:
24/1 ընտրատեղամասում քվեաթերթիկների հաշվարկն արդեն սկսված է: Սուսաննա Մարկարյանի խոսքով մինչ այս պահը առաջատարը գործող գյուղապետ, ՀՀԿ ներկայացուցիչ Կարո Գեւորգյանն է: Նրա օգտին քվեներն ավելի շատ են:
Հիշեցնենք, որ Ներքին Գետաշենում առաջադրված էր 2 թեկնածություն` մեկը համայնքի ղեկավար Կարո Գեւորգյանը, մյուսը` անկուսակցական Սպարտակ Գորանցյանը:
Մեկնաբանել