Արմինե Ղուկասյան

Ամեն ինչ սկսվեց տարիներ առաջ, երբ Իտալիայի Ավիլիանա գյուղաքաղաքի բնակիչ, մասնագիտությամբ օդանավային ճարտարապետ Կարեն Կոկչյանը ժամանեց Հայաստան:

«Ունեի մեկ նպատակ` ճանաչել երկիրս, նրա մշակութային արժեքները: Ճանապարհները բերեցին նաեւ Սեւան: Տպավորություններս անկրկնելի էին,- ասում է Կոկչյանը,- իմ սիրտը մնաց Սեւանում, որն էլ ինձ ստիպեց կրկին գալ այստեղ արդեն ոչ թե զբոսաշրջիկ, այլ այս քաղաքի ու նրա մարդկանց որեւէ բանով պիտանի լինելու պատրաստակամությամբ»:

Սեւանի տեղական իշխանությունների հետ հանդիպումն էլ համայնքում կոնկրետ ձեռնարկների իրականացմանն էր միտված: Առաջինին հաջորդեց երկրորդը, ապա երրորդը: Ցանկության ու երազանքի ճանապարհին Կոկչյանը Սեւանում իրականացրեց հերթական ձեռնարկը, այս անգամ` մշակութային եւ ճանաչողական:

Դեռեւս ամիսներ առաջ Ավիլիանայում նա կազմակերպել էր «Հայաստան» խորագրով լուսանկարների ցուցադրություն: Հայաստանում արված նրա լուսանկարներով իտալացիները ճանաչել են հային ու Հայաստանը` իրենց համար բացահայտելով մի նոր իրականություն:

Հոկտեմբերի 20-ին Սեւանում` մշակույթի պալատի ճեմասրահի պատերին իտալական Ավիլիանան եւ Թուրինն էին հանգրվանել` լուսանկարներ դարձած: Վեց տասնյակի հասնող լուսանկարչական աշխատանքներն ակնթարթներ էին, որ ներկաներին մոտեցնում էին իտալական մշակույթին ու բնաշխարհին, կենցաղին ու մարդկանց:

«Թուրին-Ավիլիանա» լուսանկարների` սեւանյան ցուցադրության շնորհանդեսի առթիվ Սեւան էին ժամանել Ավիլիանայի քաղաքապետ Անջելո Պատրիցիոն, քաղաքապետի օգնական Առնալդո Ռեվիլիոն, ՀՀ-ում Իտալիայի դեսպան Ջիովաննի Ռիչչուլլին, որոնց ուղեկցում էր ցուցադրության հեղինակ Կարեն Կոկչյանը:

Ողջունելով ցուցադրության մասնակիցներին` քաղաքապետ Ռուդիկ Ղուկասյանը նկատեց. «Միմյանց ճանաչելու լավագույն ձեւերից մեկն է սա, որի ականատեսն ու մասնակիցն ենք բոլորս` շնորհիվ Կարեն Կոկչյան բարերարի, հիանալի մարդու, հայրենասերի: Մեծ ու առաքինի գործերը միշտ համախմբում են մարդկանց: Վստահաբար կարելի է ասել, որ Կ. Կոկչյանի իրականցրած բազմաբնույթ ձեռնարկների եւ հետագայում էլ իրականացվող աշխատանքների շնորհիվ հնարավոր է համախմբել երկու քաղաքները մեկ գաղափարի շուրջ, որը դառնալու է բարեկամության եւ համագործակցության մի նոր սկիզբ»: Սեւանի քաղաքապետը իր եւ Սեւան համայնքի բնակիչների անունից Կարեն Կոկչյանին պարգեւատրեց քաղաքապետի պատվոգրով` գնահատելով նրա կատարած աշխատանք:

Իրենց ելույթներում ՀՀ-ում Իտալիայի դեսպան Ջիովաննի Ռիչչուլլին, Ավիլիանայի քաղաքապետ Անջելո Պատրիցիոն գնահատեցին Կ. Կոկչյանի աշխատանքը, կարեւորեցին երկու ժողովուրդների եւ երկու քաղաքների բարեկամության, համագործակցության ճանապարհին նման ձեռնարկների անհրաժեշտությունը:

12 հազար բնակչություն ունեցող Ավիլիանա քաղաքում բավականին զարգացած է արդյունաբերությունը, մասնավորապես նավաշինությունը: Քաղաքի զարգացումը կապվում է նաեւ զբոսաշրջության հետ: Կարեն Կոկչյանի շնորհիվ Ավիլիանայի բնակչությունը պատկերացում ունի ե'ւ հայկական մշակույթի, ե'ւ ցեղասպանության մասին: Քաղաքապետ Պատրիցիոյի փոխանցմամբ` ներկայումս աշխատանքներ են տարվում Ավիլիանան բաց քաղաք դարձնելու ուղղությամբ, որը նպաստելու է տեղի բնակիչների բարօրությանը, համագործակցային կապերի հաստատմանը:

Սեւանի քաղաքապետ Ռուդիկ Ղուկասյանը հանդիպումը կարեւորեց, նախ` հայ-իտալական ժողովուրդների միմյանց լավ ճանաչելու, ապա ապակենտրոնացված համագործակցություն հաստատելու տեսանկյունից: «Սեւանում բարեգործական ծրագրեր իրականացրած Կոկչյանն այսօր էլ նպաստում է երկկողմ մշակութային արժեքների պահպանմանը, նաեւ երկու ժողովուրդների միմյանց ճանաչելուն, որը խոստումնալից սկիզբ է քույր քաղաքներ համագործակցության համար: Եթե Ավիլիանան ցանկանում է դառնալ բաց քաղաք, ապա մենք ցանկանում ենք ունենալ բաց հասարակություն, որպեսզի շփումները լինեն ազատ եւ հեռանկարային»,- նկատեց Սեւանի քաղաքապետը:

Ընդունելության ընթացքում Կոկչյանը ներկայացրեց 2015թ.-ին Ավիլիանայում տեղի ունեցող մշակութային իրադարձությունների ծրագիրը, որը նվիրված է լինելու Ցեղասպանաության 100-ամյա տարելիցին: Միջոցառումներին մասնակցելու հրավեր ստացավ նաեւ Սեւանի քաղաքապետը:

Անկրկնելի տպավորություններով հագեցած օրը շարունակվեց մինչ երեկո, իսկ «Թուրին-Ավիլիանա» լուսանկարների ցուցադրությունը կշարունակվի մինչեւ հոկտեմբեր ամսվա ավարտը: