Քննարկվել են Հայաստանում պրոբացիոն ծառայության համակարգի ներդրման աշխատանքները
Արդարադատության նախարարության քրեակատարողական վարչության (ՔԿՎ) պետ, գեներալ-մայոր Արթուր Օսիկյանի գլխավորությամբ այսօր` հոկտեմբերի 22-ին, տեղի ունեցավ հանդիպում «Աջակցություն Հայաստանում պրոբացիոն ծառայության ստեղծմանը» ծրագրի ղեկավար Հայկ Խեմչյանի և Միացյալ Թագավորության ներկայացուցիչ, առաջատար խորհրդատու Մարթին Սեդդոնի հետ: Այս մասին տեղեկացնում է ՔԿՎ հանրային կապերի բաժինը:
Հանդիպման ընթացքում կողմերն անդրադարձել են համակարգի ներդրման համար իրականացված և կատարվելիք աշխատանքներին, փորձնական ծրագրին և անհրաժեշտ փորձի փոխանակմանը: Ա. Օսիկյանը, կարևորելով սերտ համագործակցությունը նշել է, որ քաջատեղյակ է այդ ուղղությամբ տարվող աշխատանքներին, ինչպես նաև անդրադարձել համակարգի ներդրման առանցքային նշանակություն ունեցող խնդիրներին:
Ա. Օսիկյանի հետ կայացած հանդիպումից հետո պրոբացիոն համակարգի փորձագետները համակարգի ներդրման հետ կապված քննարկումները շարունակել են ՀՀ ԱՆ քրեակատարողական վարչության սոցիալ-հոգեբանական և իրավական աշխատանքների բաժնի և այլընտրանքային պատիժների կատարման բաժնի աշխատակիցների հետ:
Մեկնաբանել