Տեսանյութեր
Լուսանկարներ
Գյումրին 11-րդ անգամ նշեց քաղաքի տոնը
Գյումրու տոնը 11-րդ անգամ նշվեց գուցե ոչ շատ մեծ շուքով, սակայն նախորդ 10 տոնակատարություններից տարբերվեց իր ժողովրդականությամբ: Այս անգամ տոնն իսկապես համաքաղաքային էր եւ նրան մասնակցություն ունեին գյումրեցիները՝ փոքրից մեծ: Գուցե պատճառներից մեկն էլ բարձրաստիճան հյուրերի բացակայությունն էր, որ հնարավորություն տվեց մարզային ու քաղաքային իշխանություններին անկաշկանդ շփվել քաղաքի բնակիչների ու միջոցառման մասնակիցների հետ: Ամենամարդաշատ վայրը Վարդանանց հրապարակն էր, ուր ռետրո մեքենաների ցուցադրություն էր կազմակերպվել:
Իր մարդաշատությամբ չէր զիջում նաեւ Գյումրու հայտնի «Կիրովը»՝ Ռիժկովի ճեմափողոցը, որտեղ արհեստագործներն իրենց աշխատանքներն էին ցուցադրում՝ հույս ունենալով նաեւ որոշ բաներ վաճառել: «Հացի փառատոնը» գյումրեցիներին ու հյուրերին միավորել էր Հովհաննես Շիրազի անվան տուն-թանգարանի բակում: Փառատոնին մասնակցում էին նաեւ մարզի Արեգնադեմ, Շիրակավան եւ Ձիթհանքով համայնքներն՝ իրենց բնորոշ ուտեստեներով:
Վարդան Աճեմյանի անվան դրամատիկական թատրոնում տեղի ունեցավ Գյումրու պատվավոր քաղաքացիների եւ մարզիկների պարգեւատրման հանդիսավոր արարողությունը:
Երգարվեստում ունեցած իր ավանդի համար Արա Գեւորգյանը պարգեւատրվեց Գյումրու քաղաքապետի ոսկե հուշամեդալով:
Եվ օրվա վերջում գյումրեցիները վայելեցին տոնի ամենագեղեցիկ նվերը․ երգող շատրվանների գույներն ու խաղը մարդկանց քաղաքի բոլոր հատվածներից կրկին բերեց-միավորեց Վարդանանց հրապարկում:
Մեկնաբանություններ (1)
Մեկնաբանել