Փաստաբանական նոր գրասենյակ Գյումրիում
Գյումրիում այսուհետ գործելու է ՀՀ փաստաբանների պալատի Շիրակի մարզային գրասենյակը, որի հանդիսավոր բացումը տեղի ունեցավ նոյեմբերի 10-ին: Փաստաբանական պալատի նախագահ Արա Զոհրաբյանի փոխանցմամբ` պալատի վարած մարզային քաղաքականության նպատակը մայրաքաղաքից դուրս գործող փաստաբանների վիճակի բարելավումն է: «Տհաճ է ականատես լինել, թե ինչպես է փաստաբանը աշխատանքի բերումով իր հանդիպումը վստահորդի հետ կազմակերպում դատարանի միջանցքներում միայն այն պատճառով, որ չունի նստավայր»,- նշեց փաստաբանական պալատի նախագահ Արա Զոհրաբյանը:
Գյումրու ոստիկանության նախկին վարչական շենքում կահավորված երեք սենյակներում տեղավորվելու են Շիրակի մարզում գործող հանրային պաշտպանները և այն փաստաբանները, ովքեր չունեն սեփական գրասենյակ: «Մենք արդեն մի քանի գրասենյակ բացել ենք այլ մարզերում և այսօր հերթը Շիրակի մարզին էր,- նկատեց Ա. Զոհրաբյանը,- գրասենյակի բացմանը ներգրավել ենք միայն փաստաբանական պալատի ռեսուրսները, որևէ օգնություն որևէ տեղից չենք ստացել»:
Նոր գրասենյակում իրենց գործունեությունը ծավալող փաստաբանները պարտավորություն ունեն ամիսը մեկ անգամ անվճար խորհրդատվություն կազմակերպել մարզի բնակիչների համար: Պատասխանատուները հայտարարեցին, որ սա փոխադարձ պայմանավորվածություն արդյունք է, և նպատակ ունի աջակցել սոցիալապես անապահով խավին իրավաբանական խորհրդատվությամբ:
Արա Զոհրաբյանը անդրադարձավ քաղաքացիների և փաստաբանների արդարադատության համակարգի նկատմամբ ունեցած անվստահությանը: Խոսեց նաև փաստաբանների նկատմամբ դրսևորվող ագրեսիվ վարքի մասին:
«Շատ դեպքերում մարդիկ փաստաբանին և վստահորդին նույնացնում են, հատկապես, եթե կատարվել է սպանություն: Մենք դեպք ունեցանք Կոտայքի մարզում մի երկու ամիս առաջ, երբ նավթը լցրել էին փաստաբանի վրա և ցանկացել այրել: Հիմա այդ անձը դատապարտվում է: Մենք շատ ուշադիր ենք ցանկացած միջադեպի նկատմամբ ու աշխատում ենք արագ արձագանքել: Հնարավորինս պաշտպանելով փաստաբանների` մենք նաև խիստ ենք նրանց նկատմամբ, ովքեր փորձում են համագործակցել նախաքննական մարմինների հետ: Վերջերս մեկին հեռացրել ենք, մեզ միջնորդ փաստաբաններ հարկավոր չեն»,- ասաց Արա Զոհրաբյանը:
Մեկնաբանություններ (2)
Մեկնաբանել