Անահիտ Բաղդասարյան

Սյունիքի մարզի ընդհանուր  իրավասության դատարանի Գորիսի նստավայրում  Արտակ Բուդաղյանի գործով դատաքննությունը շարունակվող դատական նիստում, ըստ վկաների հարցաքննության հաջորդականության, նոյեմբերի 26-ին հարցաքննվեց այս գործով վկա Զարզանդ Նիկողոսյանը: 2013թ. հունիսի 1-ին Սյունիքի նախկին մարզպետ Սուրիկ Խաչատրյանի առանձնատան մոտ տեղի ունեցածի հետեւանքով զոհվել էր Ավետիք Բուդաղյանը, ծանր վիրավորվել նրա եղբայրը` Արտակ Բուդաղյանը: Հիշյալ միջադեպի շրջանում Զարզանդ Նիկողոսյանը  մարզպետի թիկնապահն էր եւ մարզպետի որդու՝ Տիգրան Խաչատրյանի հետ կալանավորվեց դեպքից անմիջապես հետո: 

Լորետա Բարսեղյանի ներկայացուցիչ Ռուբեն Սահակյանը վկային հարցրեց, թե ինչ է տեղի ունեցել մեքենայում Սդղի գյոլից վերադառնալու ճանապարհին: Զ. Նիկողոսյանն ասաց, որ  «Սուրիկ Խաչատրյանի եւ Ավետիք Բուդաղյանի միջեւ խոսակցություն է եղել, Ավ. Բուդաղյանը ձեռքերով սկսել է խոսել, Ս. Խաչատրյանն էլ զգուշացրել է, որ կամաց խոսա, բայց նա շարունակել է, հետո Զ. Նիկողոսյանն է զգուշացրել եւ հետո երկու անգամ հարվածել է Ավ. Բուդաղյանին»: Ավ. Բուդաղյանը զորանոցի մոտ իջել է, իսկ իրենք եկել են Ս. Խաչատրյանի առանձնատուն:  Մի 5 րոպե հետո Ս· Խաչատրյանը գնացել է քնելու, իսկ ինքն ու Արագածը (Ս. Խաչատրյանի վարորդը) դուրս են եկել փողոց:

Ռ. Սահակյանի այն հարցին, թե ո՞ւմ է պատմել մեքենայում տեղի ունեցածի մասին, վկան ասաց,  որ խոհանոցում մի երկու նախադասությամբ պատմել է Լորետա Բարսեղյանին: Գործով տուժող ճանաչված Լ· Բարսեղյանի ներկայացուցիչը միջնորդություն ներկայացրեց նայել խոհանոցի տեսաձայնագրությունը, որպեսզի պարզեն, թե ինչ է ասում վկան:

Հայկ Ալումյանն ասաց, որ նույն տեսաձայնագրության վերծանումը կատարել է փորձագետը, կարող է այդ վերծանման հիման վրա հարցերը տալ:  Ռ. Սահակյանը կարդաց վերծանումից «էն Ավոյին հավայի տեղը խփին-մփին» արտահայտությունը եւ հարցրեց, թե այդպիսի արտահայտություն արե՞լ է վկան, վերջինս պատասխանեց, որ փորձագետը սխալ է մեկնաբանել իր ասածը, ինքն ասել է «խփինք-մփինք», մեքենայում ինքն է խփել, «դա իր խոսակցականն է, հոգնակիով է ասել»: Այնուհետեւ պատմեց, որ Ավետիք Բուդաղյանը եկել է Ս. Խաչատրյանի առանձնատուն, բայց նրան ասել են գնա, վաղը կգաս, քանի որ «քեֆը լավ էր»:  Երկրորդ անգամ Ավ. Բուդաղյանը, որ եկավ, նույն կերպ փորձում էին ճանապարհել,  ասաց, որ հեսա Արտակը կգա: Երբ Արտակ Բուդաղյանը եկավ՝ միանգամից սկսեց հայհոյանքներ,  սպառնալիքներ հնչեցնել, չնայած որ նախաքննական ցուցմունքում սպառնալիքների մասին չի ասել:

Տեղյա՞կ էր, արդյոք, Սուրիկ Խաչատրյանի տան առանձնատանը տեղադրված տեսախցիկների մասին, վկան պատասխանեց,  որ հետո է իմացել:

Արտակ Բուդաղյանի պաշտպան Հայկ Ալումյանը հարցրեց Զարզանդ Նիկողոսյանին, թե նախաքննության  ընթացքում եւ այժմ գիտակցե՞լ է, որ քրեական պատասխանատվությունից ազատվելն ուղղակիորեն կապված է, թե ինչքան ավելի անօրինական գործողություններ կվերագրվի Բուդաղյան եղբայրներին: Մեղադրող եւ տուժող կողմն առարկեցին,  բայց հարցը չհանվեց, եւ վկան ասաց, որ «գիտակցել-չգիտակցելն իրեն է վերաբերում եւ ինքը չի պատասխանի այդ հարցին»։ Հ. Ալումյանը միջնորդություն ներկայացրեց դիտել տեսաձայնագրությունները եւ լսել վկայի տեսակետը կոնկրետ կադրերի վերաբերյալ։

Հիշեցնենք, որ այս տարվա սեպտեմբերի 7-ին ՀՀ ՊՆ քննչական ծառայության ՀԿԳ քննչական բաժնի վարույթում կարճվեց հունիսի 1-ին Սյունիքի մարզպետ Սուրիկ Խաչատրյանի առանձնատան մոտ տեղի ունեցած դեպքի առթիվ հարուցված քրեական գործը: Քննչական մարմինը հաստատված էր համարել, որ Սուրիկ Խաչատրյանի որդու` Տիգրան Խաչատրյանի եւ  Զարզանդ Նիկողոսյանի գործողությունները համապատասխանել են անհրաժեշտ պաշտպանության հատկանիշներին եւ, որ նրանց արարքներում անհրաժեշտ պաշտպանության իրավաչափության բոլոր պայմաններն առկա են: Այսինքն` կիրառվել էր քրեական օրենսգրքի 42 հոդվածը, որի 2-րդ կետը սահմանում է. «Անձի կյանքի համար վտանգավոր բռնության կամ այդպիսի բռնության իրական սպառնալիքով զուգորդված ոտնձգությունից պաշտպանվելիս կարող է պատճառվել ցանկացած վնաս, այդ թվում` մահ»:

Դատական նիստը հետաձգվեց մինչեւ դեկտեմբերի 3-ը: