Գյումրեցի 10 անօթեւանի հանձնվեց բնակարանների գնման վկայագիր
Գյումրու անօթեւանների համար Բնակարանների գնման վկայագիր ծրագրի մեկնարկը տրվեց այսօր: Մարզպետ Ֆելիքս Ցոլակյանն առաջին10 ընտանիքի ներկայացուցիչների հանձնեց վկայագրերը՝ հորդորելով հնարավորինս արագ կատարել բնակարանների ընտրությունը եւ համապատասխան փաստաթղթերով ներկայանալ մարզպետարան:
Պայմանագիր կնքած շահառուին երկու ամիս ժամանակ է տրվում փաստաթղթային հարցերի կարգավորման եւ վեց ամիս՝ բնակարան գտնելու համար: Սակայն, ինչպես նշեց Ֆելիքս Ցոլակյանը, լավագույն տարբերակն այդ բոլոր նախապատրաստական աշխատանքները 5-ամսյա ժամկետում ավարտելն է, քանի որ վեցերորդ ամսում, եթե շահառուն չհասցնի բնակարան գտնել, կզրկվի վկայագրից:
Շահառուներից Սիլվարդ Բեկջանյանը երկրաշարժին կորցրել է երեք սենյականոց բնակարան: Անօթեւանների հերթացուցակի 1019-րդ համարն է: Ասում է, որ նախկինում չի կարողացել օգտվել ոչ մի ծրագրից: Հույս ունի, որ տրամադրած գումարով կկարողանա բնակարան ձեռք բերել Անի թաղամասում:
«Ինձ տվել են երեք սենյականոց բնակարանի վկայական, գումարը 7մլն 100 հազար դրամ է: Եթե չկարողանամ այդ գնով ձեռք բերել՝ ստիպված եմ լինելու բանկից վարկ վերցնել»,-նշեց Սիլվարդ Բեկջանյանը:
Մեկ այլ շահառու, Վարսենիկ Սահակյանն եւս երկրաշարին երեք սենյականոց բնակարան է կորցրել եւ հիմա, 26 տարի անց կրկին երեք սենյականոց ձեռք բերելու հնարավորություն է ստացել, թեպետ ընտանիքը մեծացել է եւ նախկին 4 անձի փոխարեն այժմ 8 անձ են:
«Մենք էլ պիտի փորձենք Անի թաղամասում բնակարան ձեռք բերել: Երկու ամիս է բնակարան ենք փնտրում այդ թաղամասում: Հիմա դժվար թե տեղավորվենք երեք սենյականոցում, հավանաբար կփորձենք 4 սենյակ ձեռք բերել, բայց դրա համար էլ գումար պիտի ավելացնենք, որովհետեւ 7 մլն դրամով անհնար է մեր ուզած սենյակների քանակով տուն գնել: Անի թաղամասում ամենաէժան երեք սենյականոցը, որ տեսել ենք, 20 հազար ամն դոլար են ուզել ու դեռ ռեմոնտի կարիք էլ կա»,-հայտնեց շահառուն:
Գաղտնիք չէ, որ հիմնական բնակֆոնդը, որտեղից ընտրություն են կատարելու վկայագիր ստացած շահառուները, գտնվում է Մուշ թաղամասում: Սակայն այստեղ խնդիր կա: Գլենդել Հիլզի կողմից կառուցված եւ շահագործման հանձնված 1756 բնակարանը բնակիչները մինչեւ օրս չեն կարողանում սեփականաշնորհել, քանի որ կառուցապատող շինկազմակերպությունը բնակարանները չի հանձնել քաղաքաշինության նախարարությանը: Շիրակի մարզպետ Ֆելիքս Ցոլակյանին քաղաքաշինության նախարարությունից վստահեցրել են, որ մինչեւ դեկտեմբերի կես այդ հարցը կլուծվի եւ այն բնակիչները, ովքեր ցանկություն ունեն վաճառելու, կկարողանան արագ սեփականաշնորհել բնակարանները:
«Հույս ունենանք, որ այդ հարցը լուծվելուց հետո, մարդիկ առիթից չեն օգտվի եւ բնակարանների գները չեն բարձրացնի»,-նկատեց մարզպետը:
Մեկնաբանել