Նախախորհրդարանը հայտնում է, որ վերջին 24 ժամվա ընթացքում հրկիզել են Հիմնադիր խորհրդարանի պատգամավորության թեկնածուներ Շահեն Պողոսյանի, Վարդան Հակոբյանի, Վարուժան Ավետիսյանի և Սուսաննա Մելքոնյանի, նաև Նախախորհրդարանի աջակից Սամվել Սարգսյանի և քաղաքացիական ակտիվիստ Կարեն Հարությունյանի ավտոմեքենաները, ինչպես նաև փորձել են հրկիզել Հիմնադիր խորհրդարանի պատգամավորության թեկնածու Կարո Եղնուկյանի ավտոմեքենան: Այս բոլոր ավտոմեքենաներին վերաբերող ընդհանուր հանգամանքն այն է, որ դրանք մասնակցել են «100-ամյակը առանց ռեժիմի» իրազեկման ավտոերթերին՝ բացառությամբ Կարեն Հարությունյանի ավտոմեքենայի: Այս դեպքերի առթիվ Շարժման կազմակերպած մամուլի ասուլիսի ընթացքում Վարուժան Ավետիսյանը և Վարդան Հակոբյանը տեղեկացրեցին իրենց դիրքորոշման և կատարվածի մանրամասների մասին:
«Վերջին 24 ժամվա ընթացքում ամբողջությամբ կամ մասամբ հրկիզվել են 7 ավտոմեքենա։ Սա մենք որակում ենք հստակ ուղերձ՝ ուղղված «100-ամյակը առանց ռեժիմի» ավտոերթերի դեմ»,- նշել է Վարուժան Ավետիսյանը:
«Վնաս կրած բոլոր ավտոմեքենաների համար «Իրավունք և աջակցություն» հիմնադրամը կազմակերպում է դրամահավաք։ Կոչ ենք անում բոյկոտել ռեժիմի կողմից վերահսկվող և կազմակերպվող դրամահավաքները և գումարները տրամադրել ռեժիմի անօրինական քայլերից տուժած անձանց»,- հավելել է Վարդան Հակոբյանը:
Մեկնաբանել