Էմմա Պետրոսյան

«Հայփոստի» Թումանյանի մասնաճյուղը, որը գտնվում է Ալավերդիում, լուծարվում է, որոշումը կայացրել է ընկերության ղեկավարությունը: Լուծարումից հետո մասնաճյուղի գործառույթների հիմնական մասն իրականացվելու է Սպիտակի մասնաճյուղում, իսկ Ալավերդիում մի քանի աշխատակիցներ են միայն մնալու, իհարկե, Սպիտակի մասնաճյուղի տնօրինության ենթակայությամբ:

8 աշխատակցի աշխատանքային գրքույկներ աշխատանքային պայմանագրի լուծման հետ միասին արդեն ուղարկել են: Աշխատակիցների մի մասին առաջարկվել է նույն պայմաններով աշխատանքի անցնել «Հայփոստի» Սպիտակի մասնաճյուղում, սակայն աշխատակիցներն այդ առաջարկը մերժել են` հաշվի առնելով աշխատավայրի հեռավորությունը, քանի որ նրանց համար դժվար է լինելու յուրաքանչյուր աշխատանքային օր Սպիտակ քաղաք հասնել, այն էլ այն դեպքում, երբ ստացված ամբողջ աշխատավարձը որպես ճանապարհածախս է ծառայելու: Իսկ բնակության վայրը փոխել և տեղափոխվել Սպիտակ Թումանյանի մասնաճյուղի աշխատակիցները չեն ցանկանում: Մասնաճյուղի գանձապահ Վարսիկ Դավթյանը 17 տարի է, ինչ այստեղ է աշխատում: Աշխատանքից հեռացվելու հանգամանքը շատ ծանր է տանում: «Ես մտածում եմ, որ ոչ մի ուրիշ տեղ չեմ կարա աշխատանք գտնեմ: 2 տարուց պետք է թոշակի անցնեի: Մեր տան միակ աշխատողն եմ, մի խոսքով` շատ անորոշ վիճակում եմ»,- ասում է Վարսիկ Դավթյանը:

Կրճատված աշխատակիցներից ոչ մեկը հույս չունի, թե կարողանալու է նոր աշխատանք գտնել Ալավերդիում: Կրճատումներ են իրականացվել դրամարկղային ու ադմինիստրատիվ գրեթե ամբողջ մասերում: Արդեն պայմանագրեր են խզվել 2 գանձապահի, 2 տեսակավարման օպրեատորի, 2 ՏՏ ադմինիստրատորների, 1 վարորդի, 1 փոստ-ուղեկցողի հետ: Նոյեմբերի 28-ին Թումանյանի մասնաճյուղ էին այցելել Երևանի և Սպիտակի ներկայացուցիչները, որոնցից ոչ ոք չցանկացավ որևէ ինֆորմացիա տրամադրել:

Մեզ հաջողվեց միայն ընկերության մամուլի խոսնակ Գևորգ Աբրահամյանից հեռախոսով տեղեկանալ, որ Թումանյանի մասնաճյուղի լուծարումն օպտիմալացման արդյունք է: Նամակների, թերթերի տեսակավորումը կատարվելու է Սպիտակում, որտեղից էլ առաքվելու են Թումանյանի մասնաճյուղի փոստային բաժանմունքներ: Նպաստների ու թոշակների բաշխումը կկազմակերպվի բանկերի միջոցով: