HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Զորակոչին նվիրված խորհրդակցություն՝ Արցախում

Ինչպես տեղեկացնում է ԼՂՀ ՊՆ-ն, դեկտեմբերի 18-ին ԼՂՀ մշակույթի և երիտասարդության պալատում տեղի ունեցավ ծառայողական խորհրդակցություն` նվիրված 2014 թ. ամառային զորակոչի արդյունքների ամփոփմանը և 2014 թ. ձմեռային զորակոչի խնդիրների քննարկմանը:

Խորհրդակցությանը ներկա էին ՊԲ բարձրաստիճան սպայակազմը, ԼՂՀ կառավարության անդամներ, ուժային կառույցների և տեղական ինքնակառավարման մարմինների ղեկավարներ:

Խորհրդակցությունը բացեց և ներածական խոսքով հանդես եկավ ԼՂՀ ՊՆ, ՊԲ հրամանատար, գեներալ-լեյտենանտ Մովսես Հակոբյանը: Նախարարի ներածական խոսքին հաջորդեց հանրապետության գլխավոր զինկոմի զեկույցը, որում մանրակրկիտ վերլուծության ենթարկվեցին ընթացիկ տարվա ամառային զորակոչի արդյունքները, շեշտվեցին արձանագրված ձեռքբերումներն ու թերացումները, իսկ այնուհետև ներկայացվեց գալիք տարվա ձմեռային զորակոչի նախապատրաստման ուղղությամբ իրականացված աշխատանքների համալիրը:

Նախորդ և սպասվող զորակոչին վերաբերող հարցերի շրջանակն էր ընդգրկում նաև ՊԲ կազմզորահավաքային բաժնի պետի զեկույցը: Բավարար գնահատելով ամառային զորակոչի ընթացքում կատարված աշխատանքների արդյունքները, ելույթ ունեցողը խորհրդակցության մասնակիցների ուշադրությանը ներկայացրեց նաև զորամասերում և ստորաբաժանումներում` նոր համալրման ընդունման ուղղությամբ իրականացված ու իրականացվող նախապատրաստական գործընթացների ընդհանուր վիճակը:

Խորհրդակցությունն ավարտվեց ԼՂՀ պաշտպանության նախարարի ամփոփիչ խոսքով: Օրակարգային հարցերի շուրջ իր նկատառումները ներկայացնելով խորհրդակցության մասնակիցներին՝ հանրապետության պաշտպանության նախարարը մեկ անգամ ևս ներկաների ուշադրությունը հրավիրեց նախատեսվող գործընթացների ճիշտ և անթերի կազմակերպման վրա և դրանց կատարման ուղղությամբ տվեց համապատասխան հանձնարարականներ:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter