Շիրակի մարզի տարեվերջյան մարզխորհրդի նիստին բացի 119 համայնքների ղեկավարներից մասնակցում էին նաեւ մարզում գործող բոլոր կրթական, բժշկական եւ այլ պետական կառույցների ղեկավարներ: Մարզպետարանի համապատասխան վարչությունների պետերն ամփոփեցին անցնող տարում մարզի ձեռքբերումներն ու թերացումները:

Գյուղատնտեսության ոլորտում Շիրակի մարզն այս անգամ իր ձեռքբերումներով պարծենալու քիչ բան ուներ: Հուլիս եւ օգոստոս ամսին տեղացած աննախադեպ կարկուտը ի չիք էր դարձրել ցորենի առատ բերքի սպասումները: Կարկուտից տուժած մարզի 37 համայնքներին պետական աջակցությունը դրսեւորվել էր սերմ-վարկի տրամադրումով եւ նախորդ սերմ-վարկի պարտքը ժամանակավորապես սառեցնելով:

Քաղաքաշինության ոլորտում անցնող տարում եւս տեղաշարժ չէր արձանագրվել: Անօթեւանների համար նախատեսված բնակարանների կառուցումը կառավարության համապատասխան որոշումով փոխարինվեց Բնակարանների գնման վկայագիր ծրագրով:

«Սա հնարավորություն կտա, գոնե այս էտապում լուծել 430 անօթեւանի բնակարանի խնդիր, 116 հոգու հետ արդեն պայմանագիր ենք կնքել, մնացածի հետ էլ ընթացքի մեջ է»,-նկատեց մարզպետ Ֆելիքս Ցոլակյանը:

Մարզի դեմքը պարզ անողն ու պարծանքը մարզիկներն էին՝ այս ոլորտում իրենց գրանցած փայլուն ցուցանիշներով:

Հարկահավաքության ցուցանիշներն եւս գոհացուցիչ էին: Շիրակի մարզում սեփական եկամուտների գծով 95,6 տոկոս ցուցանիշ է գրանցվել: Նախատեսված 1 մլրդ 825 մլն եկամուտների դիմաց հավաքագրվել է 1 մլրդ 446 մլն դրամ եկամուտ: Հրապարակվեց վատագույն՝ 50 տոկոսից պակաս հավաքագրում ապահոված հինգ համայնքների անունները՝ Սալուտ 19,6 տոկոս, Սարակապ 28,5 տոկոս, Հողմիկ 35,9 տոկոս, Փոքր Սեպասար 49,0 տոկոս եւ Հովունի 48,9 տոկոս:

Մարզի 25 համայնքներում գրանցվել է հավաքագրման 100 տոկոս եւ բարձր ցուցանիշ: Առաջին տեղում սեփական եկամուտների հավաքագրման բարձր ցուցանիշով ինչպես միշտ առաջին տեղում Արթիկի տարածաշրջանն է՝ 97,5 տոկոս, իսկ վերջին տեղում Ամասիայի տարածաշրջանն է՝ 80,6 տոկոս: Զարմանալին այն էր, որ սեփական եկամուտների բարձր ցուցանիշ գրանցվել էր այն համայնքներում, որտեղ կարկուտ էր տեղացել, իսկ չտուժած համայնքներում հակառակ պատկերն էր: