ՈՒրբաթ, 21 սեպտեմբերի

Այս տարին սակավաջուր չէ, քան նախորդ սակավաջուր տարին էր



«Հիդրոմետ» ծառայությունը օրերս հայտարարեց, որ այս տարի ավելի ջրառատ կլինի, քան նախորդ տարին էր: «Անհիմն են լուրերը, թե ջրամբարները դատարկ են, եւ երաշտ է սպասվում: Պաշտոնապես հայտարարում եմ, որ այդ տեղեկատվությունը հիմված չէ փաստերի վրա եւ չի համապատասխանում իրականությանը ...»,- փետրվարի 11-ին լրագրողների հետ ունեցած հանդիպման ժամանակ հայտարարել է «Հիդրոմետ» ծառայության հիդրոլոգիայի կենտրոնի պետ Լեւոն Ազիզյանը:

Ջրային ոլորտի պատասխանատուները հայտարարում են, որ նախորդ տարին ջրառատ չէր, այս տարին նույնպես սակավաջուր է լինելու: Օրեր առաջ ներկայացրել էինք «Սեւան-հրազդանյան-ջրառ» ՓԲԸ-ի տնօրեն Սամվել Հովհաննիսյանի տեսակետը, ով հայտնում էր, որ նախորդ երկու տարիներին ջրամբարները չեն լցվել:

«Մենք խուճապի մեջ ենք, այս տարի էլ ջրամբարը չի լցվի: Հիմա Ազատի ջրամբարը 160,000 խմ ջուր ավել է լցվել անցյալ տարվանից, բայց դա թիվ չի, որովհետեւ ձյան շերտ չկա, հալոցք չի լինելու, որ ավելանա, այս տարի սպասելիք չունենք»,- հայտնել էր «Սեւան-հրազդանյան-ջրառի» տնօրենը:

Լ. Ազիզյանի խոսքով` վարարումների հոսքը կախված է նաեւ եղանակային պայմաններից: Ըստ նրա` եղել են տարիներ, երբ կուտակվել է մեծ քանակությամբ ձյուն, սակայն վարարումների ընթացքում ջերմային եւ խոնավության պայմաններով պայմանավորված հոսք չի ձեւավորվել, ու ջրամբարները չեն լցվել: Նա նշում է, որ 2003թ.-ին ջրամբարները չեն լցվել:

Սամվել Հովհաննիսյանն ավելացնում է, որ 2008թ.-ը դարձյալ սակավաջուր տարի է եղել: Ջրամբարները չեն լցվել նաեւ 2013-2014 թվականներին:

Անցյալ տարվա սակավաջրության մասին էր խոսել նաեւ «Ջրային տնտեսության  ծրագրերի  իրականացման գրասենյակի» արդեն նախկին տնօրեն Ադիբեկ Ղազարյանը: «Ոռոգման ենթակա ամբողջ հողերը ոռոգելու համար անհրաժեշտ է օգտագործել 1 միլիարդ 130 մլն խմ ջուր: Մենք հիմա ունենք ջրի դեֆիցիտ,  այդ իսկ պատճառով էլ, եթե որոշումը կայացվի՝  Սեւանից 150 մլն լիտր ջուր պետք է վերցվի: Այն ջրամբարները, որոնք սպասարկում են Արարատյան  դաշտավայրը`Ապարանի, Ազատի ջրամբարները  եւ գետերը,  այս տարի սակավաջուր են:  Ապարանի ջրամբարը մոտ 75 մլն  խմ ջուր  ավելի պակաս է հավաքել, քան սովորական տարիներին, իսկ Ազատի ջրամբարը` 10-12 մլն  խմ»,- լրագրողների հետ հանդիպման ժամանակ ասել էր Ադիբեկ Ղազարյանը:

Սակավաջրության խնդիրը լրատվամիջոցներում բուռն քննարկման թեմա է դառնում այն ժամանակ, երբ մոտենում է ոռոգման սեզոնը, եւ Կառավարությունը պետք է դիմի Ազգային ժողովին` Սեւանից պահանջված քանակի ջուր բաց թողնելու հարցով: Այստեղ էլ գործադիրին հակադրվում են բնապահպաններն ու ջրային ոլորտի մասնագետները:

«Խնդիրն այսօր գլոբալ սակավաջրությունն է: Եթե ջրամբարը չի լցվում` այդ ժամանակ ստիպված Սեւանից ենք վերցնում ջուրը, իսկ որպեսզի Սեւանի մակարդակը շատ չիջեցնենք` պոմպով ենք մղում, ուրիշ ելք չունենք: Անցյալ տարի պոմպերով 1 մլրդ խմ ջուր մղեցինք, որպեսզի Սեւանից ջուր չվերցնենք»,- «Հետքին» հայտնել էր Ս. Հովհաննիսյանը:

Տեխնիկական գիտությունների թեկնածու Քնարիկ Հովհաննիսյանի կարծիքով, եթե նախորդ տարիները չորային էին, դա չի նշանակում, որ Սեւանից պետք էր ջուր բաց թողնել: Ըստ Հովհաննիսյանի` ջրամբարների ջուրն այս տարի կբավականացներ մեզ, սակայն խնդիրն այն է, որ դրանք շատ քիչ են լցվել: Ջրաբանն ասում է, որ ոչ թե եղանակից, այլ ջրամբարները սխալ շահագործելու հետեւանք է դա: Որպես գլխավոր պատճառ նշվում է հէկերի ինտենսիվ կառուցումը ջրամբարներից դուրս եկող գետերի վրա, որոնք յուրացնում են գյուղացուն հասանելիք ջուրը:

Լրատվամիջոցները սակավաջրության մասին գրում են ներկայացնելով ոլորտի  պաշտոնյաների տեսակետները, ովքեր սակավաջրությունը դարձյալ հիմնավորում են իրենց թվերով ու փաստերով: Ճիշտ կլիներ, որ «Հիդրոմետ» ծառայության հիդրոլոգիայի կենտրոնի պետ Լեւոն Ազիզյանը` «թվերին ու փաստերին» չտիրապետելու մեղադրանքներն ուղղեր ոչ թե լրատվամիջոցներին, այլ «Ջրային տնտեսության պետական կոմիտեին», երբ նրանք սակավաջրության, Սեւանից նախատեսված քանակից ավել ջուր բաց թողնելու անհրաժեշտությունն են հիմնավորում: Եթե, իհարկե, համաձայն չեն նրանց թվերի հետ:

Պրն Ազիզյանի մնացած բացատրությունները, թե կլիմայական ինչպիսի փոփոխության պայմաններում ջրային հոսք չի ձեւավորվում, հազիվ թե կարեւոր լինի լրագրողների եւ ջրօգտագործողների համար, քանի որ երկուսն էլ գործ ունեն վերջնական իրողության հետ` ջրամբարները չեն լցվում:


Գլխավոր էջ



Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ