Հայաստանում եզդիական համայքնի ներկայացուցիչ Ռուստամ Բաքոյանը մամուլի հաղորդագրություն է տարածել, որում անդրադարձել է այսօր ԱԺ-ում ազգային փոքրամասնությունների մասին Հեռուստատեսության և ռադիոյի ազգային հանձնաժողովի նախագահ Գագիկ Բունիաթյանի արտահայտած տեսակետին:   

«Ազգային ժողովում այսօր ՀԱԿ խմբակցության պատգամավոր Նիկոլ Փաշինյանը Հեռուստատեսության և ռադիոյի ազգային հանձնաժողովի նախագահ Գագիկ Բունիաթյանից հետաքրքվեց՝ օրինակ, եթե հայկական հեռուստատեսությամբ ռուսերեն ֆիլմեր են ցույց տալիս, ապա ինչո՞ւ նաև եզդիերեն, ասորերեն ու հունարեն ֆիլմեր չկան եթերում:

Փաշինյանին էլ ի պատասխան՝ Բունիաթյանը ասել էր. «Ինչ վերաբերում է բացի ռուսերենից այլ լեզուներով ինչի՞ չեն ցուցադրվում ֆիլմեր, միայն կարող եմ ասել, որ բացակայության պատճառը պահանջարկի չլինելն է»:

Չեմ հասկանում՝ ո՞վ է Գագիկ Բունիաթյանը, որ խոսի եզդիների ու Հայաստանում ապրող ազգային այլ փոքրամասնությունների անունից ու անողնաշար հայտարարություններ անի՝ ասելով, թե այդ լեզուներով հաղորդումների պահանջարկ չկա: Հարգարժան  ՀՌԱՀ նախագահ, տեղեկացնեմ, որ փաստացի Հայաստանում կա 60,000 եզդի ժողովուրդ, այդ Դուք ե՞րբ այդ 60.000-ի կարծիքը հարցրիք, որ մի հատ էլ նման եզրահանգման եք եկել:

Իմ և բոլոր եզդիների անունից հայտարարում եմ, որ մենք՝ ապրելով ՀՀ-ում, լինելով ՀՀ լիիրավ քաղաքացիներ՝ միշտ էլ ցանկացել ենք, իսկ այժմ նաև ինչ-որ տեղ պահանջում ենք, որ այլևս ՀՀ հեռուստատեսությամբ ժամեր տրամադրվեն եզդիերեն հաղորդումներին, որ այլևս առիթ լինելու դեպքում չհայտարարեք, թե իբր համապատասխան պահանջարկ չկա:

Տեղեկացնեմ, որ ըստ Հեռուստատեսության և ռադիոյի մասին օրենքի հոդված 28-ի՝  Հանրային հեռուստառադիոընկերությունը կարող է եթերային ժամանակ տրամադրել Հայաստանի Հանրապետության ազգային փոքրամասնությունների լեզուներով հատուկ ծրագրերի և հաղորդումների հեռարձակման համար։ Նման հաղորդումների ընդհանուր ժամաքանակը չպետք է գերազանցի հեռուստատեսությամբ՝ շաբաթական մինչև մեկ ժամ, իսկ ռադիոյով՝ օրական մինչև մեկ ժամ ժամաքանակը», նշել է Ռուստամ Բաքոյանը:

Լուսանկարը՝ 1tv.am-ից