HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Վահե Սարուխանյան

«Էյր Արմենիան» այս պահին մարդատար օդանավ չունի

Հայկական ավիափոխադրող «Էյր Արմենիայի» «Airbus A320» տիպի երկու օդանավերը դուրս են գրվել հայկական գրանցումից: Սա նշանակում է, որ դրանց շահագործողն այլեւս «Էյր Արմենիան» չէ:

EK-32039 եւ EK-32050 գրանցման համարներով ինքնաթիռները, ինչպես գրել ենք, ձեռք էին բերվել հոլանդական «AerCap» ընկերությունից: EK-32039-ը Հայաստան բերվեց 2013-ի նոյեմբերին: Ինքնաթիռը վարձակալվել էր 5 տարով: EK-32050-ը նույն ընկերությունից վարձակալվեց 2014-ի հուլիսին:

Ինչպես հայտնի է, անցյալ տարվա աշնանը ռուսական կողմի հետ ունեցած ֆինանսական խնդիրների պատճառով խուճապ առաջացավ ընկերության ուղեւորների շրջանում, շատերը վերադարձրեցին գնված տոմսերը, «Էյր Արմենիայից» օգտվողների մեծ մասը հրաժարվեց նրա ծառայություններից: Զուգահեռաբար, ինչպես տեղեկացրեց փոխադրողը, նշված երկու ինքնաթիռները տեխնիկական սպասարկման ուղարկելու խնդիր առաջացավ, ընդ որում՝ մեկը՝ արտապլանային: Դրանից տուժեց չվացուցակի իրականացումը:

Երկու ինքնաթիռներն էլ ուղարկվել էին Հոլանդիա՝ Վունսդրեխտ, որտեղ կայանված են 2014-ի հոկտեմբերի 2-ից մինչ օրս: Բանից պարզվում է՝ Հոլանդիայում սեփականատեր «AerCap»-ը փոխել է օդանավերի գրանցման համարները՝ տալով իռլանդական գրանցում: Սա չպետք է զարմացնի ընթերցողին, քանի որ հոլանդական լիզինգային այս հոլդինգը ոլորտի խոշորագույններից է աշխարհում եւ իր ինքնաթիռները գրանցում է տարբեր երկրներում՝ ԱՄՆ, Հոլանդիա, Իռլանդիա, Ֆրանսիա, Ավստրիա: Տակավին վերջերս՝ փետրվարի 25-ին, EK-32039-ը ստացել է EI-CWU, իսկ EK-32050-ը՝ EI-CWV համարները: Այսինքն՝ մինչ այդ դրանք արդեն դուրս էին գրվել ՀՀ օդանավերի ռեգիստրից: ՀՀ քաղավիացիայի գլխավոր վարչության մամուլի քարտուղար Ռուբեն Գրդզելյանը մեզ հետ զրույցում հայտնեց, որ «Airbus A320»-ները հայկական ռեգիստրից դուրս են գրվել դեռեւս անցած տարեվերջին: Ասել է թե՝ «Էյր Արմենիայի» ու հոլանդական սեփականատիրոջ պայմանագիրը խզվել է:

Իռլանդական գրանցումը ժամանակավոր բնույթ է կրել, քանի որ շատ շուտ «AerCap»-ը գտել է նոր վարձակալ այս երկու ինքնաթիռների համար: Ըստ ավիացիոն տեղեկատուների՝ այս ամսին իսպանական «Iberia Express»-ը լիզինգով ձեռք կբերի «Էյր Արմենիայի» նախկին օդանավերը: Ընդ որում՝ դրանք արդեն իսպանական գրանցում են ստացել՝ EC-MEG եւ EC-MEH:

«Iberia Express»-ն Իսպանիայի ազգային փոխադրող «Iberia»-ի դուստր ընկերությունն է, որն իրականացնում է կարճ եւ միջին տարածությունների չվերթներ Մադրիդի օդանավակայանից: «Iberia»-ն եւ «British Airways»-ը 2011-ի հունվարից միավորվել են «International Airlines Group»-ի (IAG) մեջ: Հենց այս ձեռնարկությունն էլ 2011-ի հոկտեմբերին հիմնադրել է «Iberia Express»-ը, որը թռչել սկսել է 2012-ի մարտից:  

«Էյր Արմենիայի» կողմից շահագործվող երրորդ ինքնաթիռը՝ EK-73797 գրանցման համարով «Boeing 737»-ը, չնայած շարունակում է մնալ հայկական ռեգիստրում, սակայն այլեւս չի շահագործվում այս ընկերության կողմից: Ներկայում դրա օպերատորը «Տարոն-Ավիա» ՍՊԸ-ն է: Հիշեցնենք, որ այս օդանավի սեփականատերը ամերիկյան «ILFC» կորպորացիան է, որն իր հերթին պատկանում է հոլանդական վերոնշյալ «AerCap»-ին:

«Էյր Արմենիային» արգելվել է օտարել բաժնետոմսերը

Անցյալ տարվա աշնանը տեղի ունեցածից հետո «Էյր Արմենիան» հոկտեմբերի 29-ին հայտարարեց, որ ստեղծված պայմաններում ղեկավարությունը որոշում է կայացրել «կտրուկ քայլերով իրականացնել կազմակերպության ֆինանսների ռեստրուկտուրիզացիա, բարեփոխել չվացուցակը մինչեւ դեկտեմբերի 20-ը՝ շեշտադրում անելով մեծ պահանջարկ ունեցող հիմնական ուղղություններով թռիչքների կազմակերպման վրա: Ընթացիկ ժամանակահատվածում նախատեսվում է ներգրավել ֆինանսական միջոցներ, կատարել աշխատանքներ «Էյր Արմենիային» պատկանող երկու «Airbus A320» օդանավերը վերադարձնելու ուղղությամբ եւ դեկտեմբերի 20-ից սկսած իրականացնել բոլոր թռիչքներն ըստ նախկինում հայտարարված ձմեռային չվացուցակի»:

Սակայն դեկտեմբերի 19-ին՝ լրագրողների հետ հանդիպման ժամանակ, ընկերության գլխավոր տնօրեն Արսեն Ավետիսյանը հայտարարեց, որ չվերթները կվերսկսեն մարտ ամսից, քանի որ հունվար-փետրվարը պասիվ սեզոն են: Նա նաեւ տեղեկացրեց, որ դեկտեմբերի 12-ին ընկերության 49 տոկոսի բաժնետեր է դարձել «East Prospect Fund»-ը՝ պարտավորվելով կատարել 50 մլն դոլարի ներդրում: Այս ընկերությունը գրանցված է Բրիտանական Վիրջինյան կղզիներում, որն օֆշորային գոտի է: Հիմնադրամի կառավարիչ Վլադիմիր Բոբիլյովը հայտարարեց, որ ընկերության պորտֆելը 2,5 մլրդ դոլար է ու ներառում է ներդրումներ Ուկրաինայի մի շարք ձեռնարկություններում:

Ըստ Բոբիլյովի՝ հիմնադրամի սկզբնական ներդրումը «Էյր Արմենիայում» կկազմի 30 մլն դոլար: Նշվեց, որ ընկերության չվերթների ուղղությունները կպահպանվեն, ծրագրվում են նաեւ նոր ուղղություններ դեպի արաբական եւ ասիական շուկաներ, բացի դրանից՝ ընկերությունը ներդրումների արդյունքում կունենա մոտ 5 օդանավ:  

Չնայած հայտարարվածից անցել է շուրջ 3 ամիս, իրավաբանական անձանց էլեկտրոնային ռեգիստրում «Էյր Արմենիայի» բաժնետերերի վերաբերյալ որեւէ փոփոխություն չկա: Ըստ այդմ՝ ՓԲԸ-ի բաժնետերեր են շարունակում մնալ կառավարության աշխատակազմի ղեկավար-նախարար, ՀՀԿ-ական Դավիթ Հարությունյանի եղբայրը՝ Վահան Հարությունյանը, եւ գլխավոր տնօրեն Արսեն Ավետիսյանի մայրը՝ Ռուզաննա Թովմասյանը՝ 50-ական տոկոս բաժնեմասերով:  

Պարզաբանենք. ըստ պետռեգիստրի՝ անցյալ տարվա հոկտեմբերից «Էյր Արմենիան» գտնվում է դատական քաշքշուկներում: Ընկերության դեմ խոշոր գումարների հայցեր են ներկայացվել, ՓԲԸ-ի գույքի եւ դրամական միջոցների վրա տարբեր չափերով արգելանք է դրվել (իբրեւ հայցի ապահովման միջոց), պարտապանին արգելվել է օտարել բաժնետոմսերը: 

Ինքնաթիռներից զրկվելու եւ նոր բաժնետիրոջ գրանցման հարցերի շուրջ չկարողացանք զրուցել Արսեն Ավետիսյանի հետ: Ընկերության աշխատակիցը նախ հայտնեց, որ նա ժողովի է, ապա զանգերին պատասխանող չեղավ: Տեղում չէր նաեւ մարքեթինգի բաժնի ղեկավար Սիրական Համբարձումյանը:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter