HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Գրիշա Բալասանյան

Արմավիրում հաղթեցին «մեծահարուստ» թեկնածուները

Արդեն հայտնի են Արմավիրի մարզի մի շարք համայնքներում երեկ կայացած համայնքի ղեկավարի ընտրությունների արդյունքները: «Ցնցումներ» չեղան: Երեկ ողջ օրվա ընթացքում տեղեկացրել ենք «առաջատար» թեկնածուների մասին, որոնք ոչ թե ընտրվեցին, այլ անմրցակից կամ ոչ իրական պայքարի արդյունքում ընտրվեցին համայնքապետի պաշտոնում:

Արմավիր. վերընտրված քաղաքապետը՝ ավազի հանքավայրի օգտագործող

8.169 ձայնով վերընտվել է Արմավիր քաղաքի միակ թեկնածու, ՀՀԿ անդամ Ռուբեն Խլղաթյանը: 28 421 ընտրողից ընտրությանը մասնակցել է 9 246-ը, որից Ռուբեն Խլղաթյանին դեմ է քվեարկել 810 արմավիրցի, իսկ անվավեր է համարվել 265 քվեաթերթիկ:

Ինչպես հայտնի է, համայնքի ղեկավարի թեկնածուները տարածքային ընտրական հանձնաժողովներ են ներկայացնում գույքի ու եկամուտների հայտարարագրեր:

Այսպես, ըստ հայտարարագրի՝ Ռուբեն Խլղաթյանն Արմավիր քաղաքում ունի երկու բնակելի տուն՝ համապատասխանաբար 634.6քմ և 250.9քմ մակերեսով: 2014թ. փետրվարի 2-ից մինչև այս տարվա նույն ժամանակահատվածը նրա եկամուտները կազմել են մոտ 5 մլն 783 հազար դրամ, որից մոտ 3 մլն 471 հազար դրամը քաղաքապետի աշխատավարձն է, իսկ մնացածը՝ «Լեգենդա» ՍՊԸ-ից ստացած փոխառության տոկոսը:

Նշենք, որ Ռուբեն Խլղաթյանն ու ԱԺ պատգամավոր Նահապետ Գևորգյանը եղել են «Լեգենդա» ՍՊԸ-ի հիմնադիրները:


Քաղաքապետին է պատկանում «Արմավիր-Շին» ՍՊԸ-ի բաժնետոմսերի 100%-ը: Ի դեպ, այս ընկերության հիմնադիրներից է եղել ՀՖՖ նախագահ Ռուբեն Հայրապետյանը:

«Արմավիր-Շին» ՍՊԸ-ին է պատկանում մարզի Գետաշեն համայնքի մոտակայքում գտնվող ավազի արդյունահանման թույլտվությունը:

Ինչ վերաբերում է դրամական միջոցներին, Արմավիրի քաղաքապետը փետրվարի 20-ի դրությամբ իր հաշվին ունեցել է 14 մլն դրամ և 110 հազար ԱՄՆ դոլար:

Նալբանդյան. բնակարան ու պահեստ՝ Դոնեցկում, շարժական գույք՝ Հայաստանում

Նալբանդյան համայնքում ձայների մեծ տարբերությամբ վերընտրվել է գործող համայնքապետ Գրիգոր Մկրտչյանը: 3266 ընտրողից ընտրությանը մասնակցել է 2062 մարդ, որից Գրիգոր Մկրտչյանի օգտին քվեարկել է 1218 ընտրող, իսկ Արգիշտի Հարությունյանի օգտին՝ 785: Անվավեր է համարվել 59 քվեաթերթիկ:

Գործող համայնքապետ Գրիգոր Մկրտչյանն, ըստ իր ներկայացրած հայտարարագրի, «սովորական» գյուղապետ չէ: Նա 78 քմ մակերեսով բնակարան և 140 քմ պահեստ ունի  Ուկրաինայի Դոնեցք քաղաքում, 230 քմ առանձնատուն և 21 հա հողամաս ունի Նալբանդյան գյուղում: Նշված անշարժ գույքը համայնքապետին է պատկանում որպես համատեղ սեփականություն:

Գրիգոր Մկրտչյանը ավտոմեքենաների պակաս ևս չունի: Հայտարարագրել է 2003թ. արտադրության «Մազդա 6», 2002թ. արտադրության «Մերսեդես C 240», 1991թ. արտադրության «ԳԱԶ 53», նույն թվականի արտադրության «T 25» մակնիշի տրակտոր, 1989թ. «E 302» խոտհնձող տրակտոր, ինչպես նաև 1991թ. արտադրության կոմբայն:

«Համեստ» են նաև Նալբանդյանի համայնքապետի եկամուտներն ու դրամական միջոցները: Նա մեկ տարվա ընթացքում ստացել է 22 մլն դրամի եկամուտ, որից 2 մլն դրամը՝ աշխատավարձն է, իսկ 20 մլն-ը՝ գյուղմթերքների վաճառքից ստացած եկամուտը:

Փետրվարի 20-ին նրա հաշվին եղել է 2 մլն դրամ:

Նոր Արմավիր. հաղթեց ճարտարագետը

Նոր Արմավիրում գործող համայնքապետ Կարեն Գրիգորյանը պարտվել է իր միակ մրցակցին՝ Արթուր Ավետիսյանին: 1497 ընտրողից իր քաղաքացիական պարտքը կատարել է 976-ը, որից Կարեն Գրիգորյանի օգտին քվեարկել է 460-ը, իսկ Արթուր Ավետիսյանի՝ 505: Անվավեր է համարվել 9 քվեաթերթիկ:

Նոր Արմավիրի համայնքապետի թեկնածու Արթուր Ավետիսյանը, ով աշխատում է «Ախուրյան-Արաքս» ջրառում որպես ճարտարագետ, հայտարարագրել է 98.9 քմ բնակելի տուն, տնամերձ հողամաս, 7000 քմ մակերեսով անասնագոմ և 3180 քմ մակերեսով կիսակառույց, 0,134 հա տնամերձ հողամաս, 0,430 հա սեփականաշնորհված հողամաս, 1, 37 հա հողամաս Նոր Արմավիր գյուղում:

Որպես շարժական գույք հայտարարագրել է 1986թ. արտադրության «Մազ 5334» մակնիշի բեռնատար ավտոմեքենա: Իսկ որպես եկամուտ Ա. Ավետիսյանը նշել է ամսական 100.000 դրամ աշխատավարձը, անասնապահությունից ստացած 3 մլն դրամ տարեկան եկամուտը, որը նշել է ձեռնարկատիրական գործունեություն, ինչպես նաև 6 մլն դրամ եկամուտ հողագործությունից:

Փետրվարի 23-ի դրությամբ Ա. Ավետիսյանի հաշվին եղել է 300.000 դրամ և 500 ԱՄՆ դոլար:

Թիվ 21 ընտրատարածքային հանձնաժողովի նախագահ Գայանե Սուքիասյանը մյուս թեկնածուների գույքի ու եկամուտների հայտարարագրերը չտրամադրեց: Հանձնաժողովի նախագահը պատճառաբանեց, թե նրանք չեն ներկայացրել, սակայն գործերը բացելիս կարդում էր նաև այլ թեկնածուների անուններ, ովքեր ներկայացրել են հայտարարագրեր:

«Մյուս թեկնածուները կարող են և չներկայացնել, դա պարտադիր չէ»,-ասաց Գայանե Սուքիասյանը՝ յուրովի մեկնաբանելով ՀՀ ընտանեկան օրենսգրքի՝ «թեկնածուները համապատասխան ընտրական հանձնաժողով են ներկայացնում հայտարարագիր` իրենց գույքի և եկամուտների մասին» պահանջը:

Թե ինչու հանձնաժողովի նախագահը չտրամադրեց մյուս թեկնածուների հայտարարագրերը՝ անհայտ է:

Հովտամեջ. 4.5 մլն դրամի եկամուտ «կարտոշկից, ցորենից»

Մարզի Հովտամեջ համայնքի ղեկավար Արմեն Սարգսյանը ևս վերընտրվել է: Ա. Սարգսյանի վերընտրվելը կանխատեսելի էր, նա նույնպես մրցակից չուներ և ինչպես համագյուղացիներն էին կատակում՝ «Արմենը մրցում է քվեաթերթիկի «դեմ»-ի հետ»:

909 ընդհանուր ընտրողից 336-ը ձայնը տվել է միակ թեկնածուին, նրան դեմ է քվեարկել 4 մարդ, անվավեր է համարվել 13 քվեաթերթիկ: Ընտրությանը մասնակցել է 353 մարդ:

Թիվ 20 ընտրատարածքային հանձնաժողովի նախագահ Գոռ Հովհաննիսյանը տրամադրեց Հովտամեջ և Հայկավան համայնքի ղեկավարի թեկնածուների հայտարարագրերը:

2004թ-ից պաշտոնավարող Արմեն Սարգսյանը հայտարարագրել է «0.11 հա մակերեսով բնակարան» և 0.16 հա վարելահող: Համայնքապետն ունի 2009թ. արտադրության «Հովեր» մակնիշի ավտոմեքենա:

Մեկ տարվա ընթացքում 1 մլն 645 հազար դրամի եկամուտ ստացել է աշխատավարձից, 4.5 մլն դրամ՝ «կարտոշկից, ցորենից»:

Փետրվարի 21-ի դրությամբ Արմեն Սարգսյանն ունեցել է 2 մլն 400 հազար դրամ:

Հայկավան. հաղթել է «Մերսեդեսի» սիրահար թեկնածուն

Հայկավանում 590 ձայնով համայնքապետ է ընտրվել ՀՀԿ-ի թեկնածու Ռուբեն Ղազարյանը, ում օգտին էլ երեկ ծառայեցվում էր վարչական լծակը: Նրա միակ մրցակից Արամ Մելքոնյանը ստացել է 59 քվե: Հայկավանում ընտրելու իրավունք ուներ 1114 մարդ, որից ընտրությանը մասնակցել է 660-ը: Այստեղ անվավեր է համարվել 11 քվեաթերթիկ:

Գործող համայնքապետ Մամիկոն Գևորգյանը չէր առաջադրվել:

ՀՀԿ-ի աջակցությունը վայելող Ռուբեն Ղազարյանը  հայտարարագրել է 250 քմ մակերեսով բնակարան Արմավիր և 50 քմ բնակարան Մեծամոր քաղաքներում և 0.1 հա հողամաս Հայկավանում: Նշված անշարժ գույքը Ռ. Ղազարյանին պատկանում է համասեփականության իրավունքով:

Նա հայտարարագրել է նաև 2001թ. արտադրության «Մերսեդես C 500», 1997թ. «Մերսեդես C 180» և 2008թ. արտադրության «Վազ 2121» նիվա մակնիշի ավտոմեքենա:

Փետրվարի 20-ի դրությամբ Ռուբեն Ղազարյանն իր հաշվին ունեցել է 800.000 դրամ, իսկ եկամուտը՝ «Գազպրոմ Արմենիա» ընկերությունից ստացած 2 մլն 100 հազար դրամ աշխատավարձն է:

Գործազուրկ Արամ Մելքոնյանն ունի տնամերձ և սեփականաշնորհված հողամաս Հայկավան գյուղում, համապատասխանաբար՝ 1200 քմ և 1700 քմ մակերեսով, ինչպես նաև կիսակառույց տուն նույն գյուղում:

Ա.Մելքոնյանը մարդատար ավտոմեքենա չունի: Նրա ունեցած միակ շարժական գույքը 991թ. արտադրության K-701 ավտոմեքենան է:

Փետրվարի 21-ի դրությամբ նրա հաշվին եղել է ընդամենը 200 հազար դրամ, իսկ տարվա կտրվածքով եկամուտը՝ 2 մլն դրամ, որը գոյացել է այգեգործությունից:

Ստացվում է, որ թիվ 21 ընտրատարածքային հանձնաժողովի նախագահը տրամադրել էր հիմնականում հաղթող թեկնածուների հայտարարագրերը: Գայանե Սուքիասյանը գուցե նախապես գիտե՞ր, թե ով է հաղթելու:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter