Անցած շաբաթ Տնտեսական մրցակցության պաշտպանության պետական հանձնաժողովի նախագահ Արտակ Շաբոյանը ելույթ էր ունեցել Ազգային ժողովում, որից հետո, ըստ որոշ լրատվամիջոցների, հայտարարել էր նաև, որ ուսումնասիրություններ են կատարվել «Սեքյուրիթի դրիմ» ընկերությունում:

«Մենք ամեն դեպքում չենք ստացել չարաշահումների որևէ փաստ: Ուսումասիրություններ կատարվել է, խախատումներ չի հայտանաբերվել»,- ըստ aysor.am-ի` հայտարարել էր Արտակ Շաբոյանը: Իսկ լրագրողի այն հարցին, թե արդյոք ընկերության` ոլորտում ունեցած մենաշնորհը չի կարող վնասել տնտեսությանը, պատասխանել էր. «Մրցակցությամբ օրենսդրությամբ մենաշնորհների կամ խոշոր ընկերությունների գործունեությունը չի արգելվում: Ինչպես Հայաստանի Հանրապետությունում, այնպես էլ ամբողջ աշխարհում, մենաշնորհներ և խոշոր ընկերություններ կարող են գործունեություն իրականացնել: Խնդիրը վերաբերվում է չարաշահումներին, եթե կան չարաշահումներ, փաստեր ներկայացրեք և մենք կուսումնասիրենք դրանք»:

ՏՄՊՊՀ նախագահի մամուլի քարտուղար Գայանե Սահակյանին խնդրել էինք տեղեկացնել, թե ինչ ուսումնասիրություն է կատարվել «Սեքյուրիթի Դրիմ» ընկերությունում: Այսօր «Հետքի» հետ զրույցում նա ասաց, որ հանձնաժողովը «Սեքյուրիթի Դրիմ» ընկերությունում որևէ ուսումնասիրություն չի կատարել: Լրագրողները զուգահեռաբար մի քանի հարց են տվել, և Արտակ Շաբոյանի խոսքը, ըստ Գայանե Սահակյանի, վերաբերել է ոչ թե «Սեքյուրիթի Դրիմ», այլ «Փարկինգ Սիթի Սերվիս» ընկերությանը, որի վերաբերյալ ստացել են դիմում-դժգոհություն:

Դիմում-բողոքը վերաբերել է ընկերության կողմից սպասարկվող ավտոկանգառների վահանակներին, որտեղ նշված է եղել կատարված վճարման դիմաց մատուցվող ծառայության ժամկետը: Քաղաքացիները դժգոհել են, որ այդ վահանակները մոլորության մեջ են գցում. ընկերությունը հայտարարում է, որ մեկ տարվա համար վճարումը կազմում է 12 հազար դրամ, սակայն նշված չի եղել, որ այդ մեկ տարին վերաբերում էր օրացույցային տարվան:

«Այսինքն` մարդիկ վճարում են, ենթադրենք, հուլիսի 1-ին, և տեղեկացված չեն, որ տարին ավարտվում է դեկտեմբերի 31-ին և ոչ թե հաջորդ տարվա հուլիսին: Հանձնաժողովն իրականացրել է այդ ոլորտում ուսումնասիրություն, որից հետո խնդիրը կարգավորվել է, գովազդային վահանակները ավտոկանգառներում փոփոխության են ենթարկվել, և այնտեղ արդեն հստակորեն տեղեկատվությունը նշված է քաղաքացիների համար, թե քաղաքացիները վճարում կատարելով` ինչքան ժամանակի համար կարող են ստանալ ծառայությունը»,- նշեց Գայանե Սահակյանը:

Այն հարցին` արդյոք ՏՄՊՊՀ-ն պատրաստվում է կատարել ուսումնասիրություն «Սեքյուրիթի Դրիմ» ընկերությունում, Գայանե Սահակյանը պատասխանեց. ««Սեքյուրիթի Դրիմ» ընկերության հետ կապված հանձնաժողովը որևէ դժգոհություն, որևէ գրավոր դիմում-բողոք երբևիցե չի ստացել, երբևիցե չի եղել մրցակցային օրենսդրության հետ կապված որևէ խնդիր, ինչը հիմք կտար հանձնաժողովին` ուսումնասիրելու այդ ընկերության գործունեությունը»,- ասաց Գ. Սահակյանը:

Ճշտող հարցին միայն դիմում-բողոքների հիման վրա է կատարվում ուսումնասիրությունը, Գ. Սահակյանը ավեացրեց. «Ոչ, հնարավոր է` չլինի դիմում-բողոք, հանձնաժողովն իր նախաձեռնությամբ ևս իրականացնում է բազմաթիվ ուսումնասիրություններ, և կարող եմ ասել հիմնական ուսումնասիրությունները կատարում ենք հենց մեր նախաձեռնությամբ, սակայն դրա համար ևս պետք է լինեն համապատասխան հիմքեր, պետք է լինեն ռիսկային ոլորտներ, ռիսկային ընկերություններ»:

ՏՄՊՊՀ-ի` տարվա ընթացում ծրագրով նախատեսված առաջնահերթությունների մեջ «Սեքյուրիթի Դրիմ» ընկերությունը չի մտնում: Այս տարի, Գ.Սահակյանի խոսքով, ՏՄՊՊՀ-ի առաջնահերթությունների մեջ է պետգնումների գործընթացը շինարարության ոլորտում:

«Ամեն դեպքում բացի առաջնահերթություններից ուսումնասիրվում են նաև այն շուկաները, որտեղ կան խնդիրներ, օրինակ` ստացանք դիմում-բողոք կամ եղավ մամուլի հրապարակում: Եթե ոչ, մենք ունենք ծրագրով նախատեսված առաջանհերթությունները: Համենայն դեպս, «Սեքյուրիթի Դրիմ» ընկերությունը գործունեության օրվանից մինչև հիմա մեր տեսադաշտում չի հայտնել, որևէ հիմք, որևէ փաստ, որ ընկերությունը թույլ է տվել որոշակի խախտումներ, որ կդառնա հանձնաժողովի համար ուսումնասիրության հիմք, չկա»,- ասաց Գայանե Սահակյանը: