Գումարի պահանջով հերթական դատական հայցն ընդդեմ Գյումրու քաղաքապետարանի
Սամվել Բալասանյանի քաղաքապետ ընտրվելուց անմիջապես հետո մի շարք կազմակերպություններ դատական հայցերով հանդես եկան ընդդեմ Գյումրու քաղաքապետարանի՝ պարտքերի վճարման պահանջով: Զուգահեռ ստուգումներ էին սկսվել ֆինանսների նախարարության մասնագետների կողմից՝ կուտակված պարտքերի իսկությունը բացահայտելու նպատակով:
Հերթական դատական հայցերը քաղաքապետարանի դեմ ներկայացրել են «Եղիկյան եղբայրներ» եւ «Լուսափայլ քաղաք» ՍՊԸ-ները, որոնք 2012 թ-ին իրականացրել են Գյումրու աղբահանությունը, սակայն իրենց պնդմամբ չեն վճարվել տարեվերջին իրականացրած ծառայությունների դիմաց:
Գուրգեն Մալխասյանն, ով դատարանում ներկայացնում է Գյումրու քաղաքապետարանի շահերը, հրավիրած մամլո ասուլիսի ժամանակ պարզաբանեց, որ իրականում քաղաքապետարանը չի հրաժարվում գումարները վճարել: Ստուգումների արդյունքում պարզվել է, որ ՍՊԸ-ներին 1 մլն դրամի չափով հավելագրում է կատարվել:
Հայցապահանջով դատարան ներկայացած կազմակերպություններին նախկին քաղաքապետարանը պարտավորված է եղել վճարել 7-ական մլն դրամ, սակայն ստուգումների արդյունքում գումարը պակասել է 1 մլն դրամով: Իրենց հայցապահանջում «Եղիկյան եղբայրներ» եւ «Լուսափայլ քաղաք» ՍՊԸ-ները ընդհանուր հաշվով պահանջել են 30 մլն դրամ:
Գյումրիում աղբահանությունն իրականացնում էին չորս կազմակերպություն, որոնցից երկուսը 2013թ-ի հունվար-փետրվար ամիսներին պայմանգրային իրենց պարտավորությունները չէին իրականացրել՝ ծանր կացության մեջ դնելով քաղաքապետարանին:
«Մենք ստիպված ենք եղել այդ ժամանակ մեր ուժերով իրականացնել աղբահանությունը,- հայտարարեց ֆինանսատնտեսական բաժնի պետ Լենա Ջիլավյանը,- աղբատար մեքենաներ ենք վարձել, մարդիկ, որ կարողանանք աղբը հեռացնել: Արել ենք հավելյալ ծախսեր եւ դեռ հարց է, թե ով ում է պարտք մնացել»:
«Մենք անակնկալի եկանք, որովհետեւ տեխնիկական ու մարդկային ռեսուրսներ չունեինք,- հավելեց Գուրգեն Գինոսյանը,- կոմունալ բաժնի պետը հաշվարկներ է արել եւ պարզել պայմանագրային պարտավորությունը չկատարած կազմակերպությունների պատճառով քաղաքապետարանի կրած վնասի չափը»: Ասուլիսի կազմակերպիչները պնդեցին, թե հայցապահանջով ներկայացած կազմակերպություններն իրենց նշած ժամանակահատվածի համար կատարած աշխատանքներն ապացուցող ակտեր չունեն:
Գյումրու քաղաքապետարանը հանդես է գալու հակընդդեմ հայցով եւ պահանջելու է նշված կազմակերպություններին փոխհատուցել 2 մլն դրամ վնասը, որ կրել են նրանց փոխարեն սեփական ուժերով աղբահանություն կազմակերպելու պատճառով:
Մեկնաբանել