Գյումրեցի ակտիվիստների նամակը ՌԴ գլխավոր դատախազ Յ. Չայկային
Մի խումբ ակտիվիստներ այսօր որոշել էին Գյումրիում տեղակայված ռուսական հյուպատոսարանի միջոցով նամակ եւ շախմատ փոխանցել ՌԴ գլխավոր դատախազ Յուրի Չայկային: Նամակում մասնավորապես նշված էր հետեւյալը. «Ընդունեք այս նվերն ի նշան երկու երկրների բարեկամության, լցրեք ձեր պարապությունը կամ պատասխանեք ձեր հայ գործընկերոջ նամակին: Սխալ մտածված քայլերը կարող են լարվածություն առաջացնել հայ եւ ռուս ժողովուրդների բարիդրացիական հարաբերություններում»: Իսկ որպես նվեր ընտրել են շախմատը, որպես խելացի խաղի խորհրդանիշ, բացատրեց տնտեսագետ Կարեն Պետրոսյանը:
«Շախմատը շատ իմաստներ ունի, ամեն մեկը կարող է յուրովի մեկնաբանել, բայց բայց հիմնականը, որ մեր հետ պետք չէ խաղեր խաղալ, եւ մենք ասում ենք, ցանկացած սխալ քայլ, որ կանի ռուսական կողմը, ռուս իշխանավորը կարող է էապես վնասել հայ-ռուսական հարաբերություններին»,-նշեց Կարեն Պետրոսյանը:
Ավետիսյանների սպանությունից անցել է երեք ամիս ու գործի հետաքննության հետ կապված հանրության իրազեկվածությունն ընդամենը չնչին տեղաշարժ է արձանագրել: Գյումրիում հունվարյան դեպքերի ժամանակ հնչեցված հարցերն եւս մնացել են անպատասխան: Մասնավորապես Ավետիսյանների ընտանիքի անդամների սպանության մեջ կասկածվող Պերմյակովին հայկական կողմին հանձնելու պահանջը, որի պատասխանը մինչեւ օրս բացասական է:
Հյուպատոսարանից հրաժարվեցին ընդունել ակտիվիստների նվերը: Հանդիպման դուրս եկած փոխհյուպատոս Ալեքսանդր Կոչեգարովը համաձայնվեց վերցնել միայն նամակը: «Սա կաշառք չէ, շատ էժան բան ենք գնել, որ հանկարծ վատ չզգաք, ընդամենը խորհրդանշական նվեր է ռուս ազգին բարեկամ հայ ազգից»,-փորձեց համոզել Կարեն Պետրոսյանը, սակայն Կոչեգարովը մաց անդրդվելի: Նա շնորհակալություն հայտնեց նվերի համար, սակայն հեռացավ իր հետ տանելով միայն նամակը՝ ուղղված պարոն Չայկային:
«Մենք կսպասենք մինչեւ ապրիլի 24-ի հետ կապված միջոցառումներն ավարտվեն, իսկ հետո արդեն կգնանք ադեկվատ քայլերի: Հույս ունենք, որ այս ընթացքում մեր պատկան մարմինները կաշխատեն ազդել պարոն Չայկայի վրա, որպեսզի վերջինս պատասխանի մեր գլխավոր դատախազի ուղարկած նամակին: Այն ինչ մենք անում ենք, մենք սրանով փրկում ենք նաեւ մեր երկրի դեմքը, մեր իշխանավորներին»,-հայտարարեց Կարեն Պետրոսյանը:
Շախմատը ակտիվիստները նվիրեցին հայ զինծառայողներին, ովքեր պահպանություն են իրականացնում հյուպատոսարանի դիմաց:
Մեկնաբանել