Վիրահայերը նույնպես միացան Ցեղասպանության նահատակների սրբադասման արարողությանը
էմմա Պետրոսյան
Չնայած տեղատարափ անձրևին՝ Թբիլիսիի Սուրբ Էջմիածին եկեղեցու բակը երեկ սովորականից մարդաշատ էր: Հարյուրավոր վիրահայեր հավաքվել էին եկեղեցու բակում՝ մասնակցելու Հայոց ցեղասպանության 100-րդ տարելիցին ընդառաջ ցեղասպանության նահատակների սրբադասման արարողությանը և ուղիղ կապի միջոցով հետևելու Մայր Աթոռ Սուրբ Էջմիածնում տեղի ունեցող իրադարձություններին: Սրբադասման արարողությունից հետո եկեղեցու բակում հավաքված հայությունը շարժվեց դեպի Վակե այգի, որտեղից էլ արդեն ջահերը ձեռքներին, վանկարկելով՝ «Ճանաչում, դատապարտում, հատուցում», «Պայքար», «Թուրքիա՝ մարդասպան», հարյուրավոր վիրահայեր շարժվեցին դեպի Վրաստանում Թուրքիայի դեսպանատուն:
Երթն ընթացավ առանց միջադեպերի, դեսպանատան մոտ արդեն երթի մասնակիցներին սպասում էին ոստիկանները, ովքեր, սակայն, որևէ կերպ չխոչընդոտեցին բողոքի ցույցին:
Մեկնաբանել