Նոր սոցիալական կենտրոն՝ Գյումրու տնակային թաղամասերի անապահով ընտանիքների երեխաների համար
«Փարոս» հիմնադրամի եւ «Դեպի առաջ» բարեգործական ՀԿ-ի աջակցությամբ Գյումրիում այսօր բացվեց տնակային ավաններում բնակվող եւ սոցիալապես անապահով ընտանիքների երեխաներին արտադպրոցական կրթություն եւ անհրաժեշտ խնամք ցուցաբերելու զարգացման կենտրոն:
Այս կենտրոնում ավելի քան 100 երեխայի կտրվի անվճար արտադպրոցական ուսուցման, համապատասխան մասնագետների կողմից դասապատրաստման հնարավորություն: Հատուկ ուշադրության կենտրոնում են գտնվելու դպրոցից հետո ուսումը շարունակելու ցանկություն ունեցող բարձր դասարանների աշակերտները: Նրանց տրվելու է բուհական քննություններին պատրաստվելու անվճար աջակցություն:
«Դեպի առաջ» երեխաների կենտրոնում հաճախողներին օրվա մեջ մեկ անգամ կտրվի սնունդ, լողանալու եւ հիգենիայի պահպանության այլ հնարավորություններ:
«Կենտրոնի ստեղծումը լավագույն հնարավորություններից մեկն է տնակային ավանների եւ անապահով ընտանիքների երեխաներին գորշ միջավայրից կտրելու համար, ուր նրանք կստանան նաեւ հոգեբանական եւ առողջապահական աջակցություն»,-նշեց կենտրոնի ղեկավար Աիդա Խաչատրյանը:
Կենտրոնի բացման հանդիսավոր արարողությանը մասնակցում էին «Փարոս» հիմնադրամի եւ «Դեպի առաջ» բարեգործական ՀԿ-ի ներկայացուցիչները, մարզպետ Ֆելիքս Ցոլակյանը եւ քաղաքապետ Սամվել Բալասանյանը:
Մեկնաբանել