Կաշառք վերցնելու կասկածանքով Ջավախքում հայ պաշտոնյա է ձերբակալվել
Վրաստանի Ներքին Գործերի նախարարության հակակոռուպցիոն գործակալությունը կաշառք ստանալու փաստով ձերբակալել է Ախալքալաքի շրջանի վարչության ճարտարապետության և շինարարության հսկողության ծառայության ավագ մասնագետին: Այս մասին հայտնում է ջավախքյան www.jnews.ge լրատվական կայքը:
Ինչպես հաղորդում է Վրաստանի ներքին գործերի նախարարությունը, օպերատիվ-որոնողական և քննչական աշխատանքների արդյունքում, կաշառք ստանալու կասկածանքով ձերբակալվել է ենթակառույցների, բարեկարգման, ճարտարապետության և շինարարության ծառայության, ճարտարապետության և շինարարության հսկողության բաժնի ավագ մասնագետ Հարություն Իրիցյանը:
Քննչական աշխատանքների արդյունքում պարզվել է, որ աշխատանքային պարտականությունների կատարման ժամանակ, մինչ համապատասխան շինարարական աշխատանքների պաշտոնական թույլտվությունը, Հարություն Իրիցյանը քաղաքացուն թույլ է տվել սկսել աշխատանքները՝ վերցնելով 1200 դոլար: Իրավապահ մարմինները Հարություն Իրիցյանին ձերբակալել են կասկածյալի կարգավիճակով:
Կաշառք ստանալու փաստով, Վրաստանի քրեական օրենսգրքի 338 հոդվածի 1-ին մասով տարվում է հետաքննություն: Օրենքը նախատեսում է 6-ից մինչև 9 տարի ազատազրկում: Հետաքննությունը վարում է Վրաստանի ներքին գործերի նախարարության հակակոռուպցիոն գործակալությունը:
Մեկնաբանել