ՈՒրբաթ, 21 սեպտեմբերի

«Եթե ազնիվ լինես բիզնեսում, առաջ կգնաս»,- ասում է 20-ամյա ձեռներեց Հռիփսիմեն



Հռիփսիմե Բարսեղյանը 20 տարեկան է (հոկտեմբերին կլրանա 21-ը): Նրան հանդիպեցի «Արտադրված է Հայաստանում» ցուցահանդեսի ժամանակ: Ներկայացնում էր մաշկի խնամքի միջոցներ, որոնք բնական հումքից են պատրաստված` օճառներ, քսուքներ, բալզամներ, դիմակներ: Արտադրությունն այդպես էլ անվանել են` «Բնատուր»: Հռիսփիմեն բացատրում է յուրաքանչյուր օճառի հատկությունը: Որոշեցինք հանդիպել օճառագործության արտադրամասում:

Հռիփսիմեն սովորում է Երևանի պետական համալսարանի ռոմանոգերմանական ֆակուլտետի երրորդ կուրսում, ֆրանսերենի թարգմանչուհի է: Դասերին զուգահեռ ղեկավարում է փոքրիկ արտադրամասը: Ասում է` երևի հիմա կհարցնեմ, ինչու որոշեցին զբաղվել օճառագործությամբ: Ժպտում եմ: Պատմում է, որ հարազատներից մեկը (խնդրում է չնշել նրա անունը) պսորիազ ուներ: Նշանակված դեղորայքային բուժումն օգուտ չէր տվել, և այդ կինը սկսել էր բնական միջոցներով քսուքներ, օճառներ պատրաստել: «Պսորիազն անբուժելի հիվանդություն է համարվում: Բնական հումքից պատրաստած միջոցներով նա հանգստացրել է քորը, մաշկը հանգիստ է հիմա: Այդպիսով` նա գտավ իրեն օգնելու ճանապարհը»,- բացատրում է երիտասարդ անհատ ձեռներեցը:

Այդ ժամանակից էլ սկսել են կատարելոգործել մաշկի խնամքի միջոցների ստացումը: Սկզբում դրանք պատրաստում էին բացառապես հարազատների համար: Տեսնելով միջոցների օգտակարությունը` որոշել են այն զարգացնել իբրև բիզնես: 5 ամիս առաջ Հռիփսիմեն գրանցվել է որպես անհատ ձեռներեց, իսկ արտադրանքին էլ տվել են «Բնատուր» ապրանքանիշը: Արդեն հասցրել են մասնակցել 11 էքսպո-ցուցահանդեսների: 20-ամյա ձեռներեցը պատմում է, որ նախորդ տարի Արագածոտնի մարզում մի քանի ամիս մասնակցել է բիզնես դասերի: Այդտեղ էլ նրանց օգնել են վարկ ձեռք բերել:

Դեմքի 9 տեսակի քսուքներ, 10-ից ավելի օճառներ են պատրաստում: Հռիփսիմեն ասում է, որ օճառը կամ քսուքը վաճառքից հանելուց առաջ սկզբից հենց իրենք են փորձում, եթե դրական փոփոխություն չեն զգում, շուկա չեն հանում: «Եթե ազնիվ լինես բիզնեսում, առաջ կգնաս: Ինձ միշտ ասում են` ձեր աչքերից զգացվում է` ազնիվ եք, առաջ կգնաք: Ազնվությունն ու ռիսկայնությունը շատ մեծ դեր ունեն բիզնեսում»,-նշում է զրուցակիցս:

Մեր զրույցը շարունակում ենք օճառագործության փոքրիկ արտադրամասում: Ցածր, նեղ դռնով ներս ենք մտնում: Մեր առջև փոքրիկ սենյակ է, որտեղ անմիջապես զգացվում է օճառների սուր հոտը: Հռիփսիմեն ցույց է տալիս յուղերի, խոտաբույսերից, մրգերից ստացած հումքով տարաները: Ասում է, որ օճառներին գույն ու հոտ չեն ավելացնում: Դրանք պատրաստում են բնական հումքից: Բաղադրության մեջ եթերային, բնական յուղեր են` խաղողի կորիզի, զեյթունի, կտավատի և այլն: Հումքի մեծ մասը ձեռք են բերում հայկական շուկայից, որոշներն էլ, օրինակ, մանգոյի, ավոկադոյի, կակաոյի յուղերը, ներկրում են Գերմանիայից: Գույնի համար ևս օգտագործում են բնությունից ստացածը, ասենք, կանաչ գույնի համար կարող են օգտագործել մաղադանոս: «Օճառների գույների աշխարհը շատ հետաքրքիր է: Կարող է կարմիր բույսը վերցնես` մտածելով, որ կարմիր օճառ ես ստանալու, բայց ստացվի մեկ այլ գույն` կապույտ»,- նշում է Հռիփսիմեն:

Օճառներն ունեն հայկական անվանումներ` «Չիչխան», «Հրատ», «Այգ», «Արենի», «Թավիշ», «Կավուտ», «Փափուկ», «Հուրի-Փերի», «Նուրի», «Ճերմակ», «Նաիրի», «Վարսեր»: Դրանցից ամեն մեկն ունի իր նշանակությունը: Օրինակ, յուղոտ դեմքին խորհուրդ են տալիս «Կավուտը»: «Սրա բաղադրության մեջ կան կավային խառնուրդներ, որոնք նպաստում են  կորյակների, սև կետիկների, յուղոտության անցկացմանը, իսկ չիչխանի յուղը նպաստում է վերքերի ապաքինմանը»,- ասում է երիտասարդ ձեռներեցը:

Հիշում է, որ մանկության տարիներին միշտ երազում էր դառնալ գործարար, թեև երբ Ֆրանսիա էր գնացել, մտածել էր դեսպան դառնալու մասին, բայց հիմա նորից վերադարձել է մանկության երազանքին: Այս մասին պատմելիս ժպտում է:

Արտադրությունը փոքր է, բայց, Հռիսիմեի խոսքով, հույս ունեն, որ առաջիկայում կընդլայնվի: Խանութ դեռ չեն բացել. ֆինանսական միջոցներ են պետք: Վաճառքն առայժմ իրականացնում են «Ֆեյսբուքով»: Պատին փակցված մրցանակն է ցույց տալիս. այս տարվա ապրիլին 7-ին արժանացել է վարչապետի «Լավագույն երիտասարդ կին գործարար» պատվոգրին:

«Մենք ազնիվ ենք աշխատում: Դա մեր արտադրության հիմքում է: Եթե այս օճառը չի օգնում, չենք ասում` գիտեք ինչ, սա հաստատ տարեք, կօգնի, ասում ենք ` կնպաստի, չենք ասում` բուժիչ է և այլն: Մենք դեղ չենք պատրաստում, այլ  օճառ»,- դարձյալ շեշտում է 20-ամյա ձեռներեցը`ավելացնելով, որ ֆրանսերենն էլ գուցե օգնի հետագայում ավելի մեծ բիզնես կապեր ստեղծելուն:


Գլխավոր էջ



Այս թեմայով

  • «Հայկական չրեր №1». Եղեգնաձորի նոր այցեքարտը
    Սիլվա Եղոյանն ասում է, որ չիրը պատրաստման փուլեր ունի, պետք է իմանաս, թե ինչքան պիտի մնա արևի տակ, ու երբ պիտի տեղափոխես հով տեղ: Եթե ամբողջապես մնա արևի տակ, և՛ որակն է փոխվելու, և՛ գույնը: Փաթեթավորումից առաջ չիրը պարտադիր լվանում են, տիկին Սիլվան խորհուրդ է տալիս՝ եթե չեք հոգնում, գնելուց հետո մի անգամ էլ դուք լվացեք:
  • «Զաբել». դիվանագետի ասելիքը՝ գինու տեսքով
    «Հիշեք, դիվանագիտությունը պրոտոկոլի ու ալկոհոլի արանքում է» (Remember that diplomacy happens between protocol and alcohol). այս խորհուրդը դիվանագետ Իրինա Ղափլանյանը լսել է Լոնդոնում սովորելու տարիներին իր դասախոսներից մեկից:
  • «Պիաֆչիկ». ասեղնագործություն մետաղի վրա
    Լինայի փոխանցմամբ՝ զարդը մանրանկարչական աշխատանք է պահանջում: Արույրի (լատուն) ու պղնձի վրա ասեղով նուրբ աշխատանք է անում:
  • Վանի արևը՝ Սասունիկում. գինեգործությունը Հայաստանում մեծ ներուժ ունի
    «Գինին վերևից ներքև են գնահատում՝ աչք, քիթ, բերան: Սկզբից գույնն ենք գնահատում, հետո՝ հոտը, ապա՝ համը: Ամեն մարդ կարող է համն ու հոտը յուրովի զգա, ուղղակի խաղողի տեսակներին հատուկ համեր կան, որոնք չես կարող շփոթել: Սա, օրինակ, արենի է (մեզ գինի է հյուրասիրում անմիջապես ռեզերվ տակառներից- հեղ.), մեզ մոտ աճող արենի է: Այն թյուր կարծիքը, թե արենին միայն Վայոց ձորում է աճում, ճիշտ չէ, Աշտարակում էլ է աճում, որով մենք ոսկե մեդալներ ենք շահում»,- նշում է Վ. Մուրադյանը:
  • Տրիկոտաժե հագուստ արտադրող հալեպահայ ընտանիքի երկրորդ սերունդը. «Մոսինի»
    Մովսեսն ասում է, որ Սիրիայում մեծ շուկա կար, իսկ Հայաստանում գործարարների դժվարություններից մեկը փոքր շուկան է, ինչը Երևանում բիզնես հիմնելուց առաջ նաև իրենց մտահոգություններից մեկն էր:
... կարդացեք ավելին «Made in Armenia» թեմայով
Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ