Փաշինյանը հետաքրքրվում է` ի վերջո Հովիկ Աբրահամյանը բամփե՞լ է Գագիկ Ծառուկյանին, թե՞ ոչ
Պատգամավոր Նիկոլ Փաշինյանը խորհրդարանում կառավարության անդամներին հարց ուղղեց` ակնկալելով պատասխան, թե ինչ արդյունքներ են ստացվել փետրվարին ՀՀԿ-ի կուսակցական ժողովի ժամանակ Սերժ Սարգսյանի հայտարարությունների վերաբերյալ, որը վերաբերում էր Գագիկ Ծառուկյանին: Պատգամավորը հնչեցրեց ինչպես Սերժ Սարգսյանի, այնպես էլ վարչապետ Հովիկ Աբրահամյանի հայտարարություններից հատվածներ, որոնք վերաբերում էին հարկերը թաքցնելուն, հանցագործություններ իրականացնելու մասին տարածված լուրերին: Հովիկ Աբրահամյանն ասել էր, որ այն մարդիկ, ովքեր մեկ, երկու, երեք անգամ ասելով չեն հասկանում, պետք է մի քանի անգամ նրանց ասել ու մի հատ էլ բամփել:
Նիկոլ Փաշինյանն ուսումնասիրել է օրենսդրությունը և այնտեղ վարչապետի կողմից «բամփելու» կետ չի գտել, բայց, այնուամենայնիվ, պատգամավորը հետաքրքրվեց` արդեն երեք ամիս է անցել, ի վերջո վարչապետը բամփե՞լ է Գագիկ Ծառուկյանին, թե՞ ոչ:
Հ. Աբրահամյանը, պատասխանելով պատգամավորի հարցին, տեղեկացրեց, որ Սերժ Սարգսյանի հորդորից հետո եղել է վարչապետի հանձնարարական` ուղղված ֆինանսների նախարարությանը և տրվել է մի շարք ձեռնարկությունների ցանկ, որպեսզի իրականացվեն ստուգումներ:
«Երևի մեկ շաբաթ առաջ, այդ հարցի պատասխանն ակնկալելով, ֆինանսների նախարարն ինձ խոստացել է մինչև մայիսի վերջ, հունիսի 5-ը վերջնական տեղեկանք ներկայացնել արդյունքների մասին»,- ասաց վարչապետը:
Ինչ վերաբերում է կուսակցական նիստի ժամանակ Սերժ Սարգսյանի ու Հովիկ Աբրահամյանի երկխոսությանը, ապա վարչապետը նշեց, որ դա ասվել է ընդհանուր կոնտեքստով և վերաբերել է բոլոր այն մարդկանց, բիզնեսով զբաղվողներին, ովքեր հարկերը չեն վճարում:
Նիկոլ Փաշինյանը նշեց, որ խոսքը գնացել է կոնկրետ անձի` պատգամավորի մասին, և վարչապետը չնշեց՝ 3 ամիս անց հանցագործությունները թաքցնելու մեխանիզմների մասին լուրերը, որը ևս ասվել է կուսակցական նիստի ժամանակ, ճի՞շտ էին, թե՞ ոչ: Բացի դրանից՝ հետաքրքվեց, թե ասվածի վերաբերյալ ինչ քայլեր են ձեռնարկել ԱԱԾ-ն և ոստիկանությունը, քանի որ «ահասարսուռ» ձևով է այդ ամենը նկարագրվել:
«Մենք որևէ մեկին ահաբեկելու ցանկություն չենք ունեցել»,- ասաց վարչապետը՝ հավելելով, որ Գագիկ Ծառուկյանի վերաբերյալ անհրաժեշտ տեղեկատվությունը անպայման կներկայացվի հանրությանը, քանի որ վերջինս սպասում է այդ ստուգումների արդյունքներին:
«Մենք թաքցնելու որևէ բան չունենք, ես խնդիր չեմ տեսնում: Ուզում եմ համոզվեք, որ մայիսի վերջ, մինչև հունիսի սկիզբ անպայման դրա մասին բարձրաձայն կխոսեն բոլոր պատկան մարմինները, ովքեր այդ ստուգումներն իրականացրել են»,- հավելեց վարչապետը:
Մեկնաբանել