Երեկ Գերմանիայի Բունդեսթագում տեղի է ունեցել գերմանահայկական ֆորումի հիմնադրման հանդիսավոր արարողությունը: Գերմանահայկական ֆորումի նպատակը, համաձայն արտաքին գործերի նախարարության պաշտոնական հաղորդագրության, հայ-գերմանական քաղաքական, տնտեսական, մշակութային, գիտական կապերի ընդլայնումն ու խթանումն է:

Միջոցառմանը ներկա են եղել ՀՀ ԱԺ հայ-գերմանական միջխորհրդարանական բարեկամության խմբի ղեկավար Արտակ Դավթյանը, Գերմանիայում ՀՀ դեսպան Աշոտ Սմբատյանը, Գերմանիայի Բունդեսթագի պատգամավորներ, հասարակական-քաղաքական գործիչներ, հայ համայնքի ներկայացուցիչներ, լրագրողներ:

Միջոցառման սկզբում ընտրվել է ֆորումի կանոնադրությունը: Կազմակերպության նախագահ է ընտրվել Բունդեսթագի պատգամավոր Ալբերտ Վայլերը, փոխնախագահ` Բունդեսթագի պատգամավոր Քարսթեն Քյորբերը: Ֆորումի վարչության անդամներ են ընտրվել ՀՀ-ում Գերմանիայի նախկին դեսպան Հանս-Յոխեն Շմիթը, Բեռլինի Եվրոպական ակադեմիայի նախագահ Էքարթ Շթրաթենշուլթեն, իրավաբան Էրիկ Ֆոգթը:

Միջոցառմանը ողջույնի խոսքով հանդես են եկել Արտակ Դավթյանը, Աշոտ Սմբատյանը, Ալբերտ Վայլերը: