Տակաւին 10 երկար օրեր Քամփ Արմէնի համար
Քամփ Արմէնի հետ Զօրակցութիւն» խմբակը նախորդ Ուրբաթ, Մայիս 22-ի երեկոյեան երթ մը կազմակերպած է, Իսթիքլալ պողոտայի վրայ, Թիւնէլէն մինչեւ Կալաթասարայի հրապարակ։ Երթի ընթացքին զանազան հայերէն եւ թրքերէն կարգախօսերու շարքին, կը հնչէր նաեւ «Դիմադրելով է որ պիտի յաղթենք» բացագանչութիւնը։ Հարիւրաւոր մասնակիցներէ բաղկացած ամբոխը երբ հասաւ Կալաթասարայի հրապարակ, այնտեղ, քանի մը հայերէն երգերու կողքին, կ՚արտասանուի նաեւ զօրակցութեան խօսքը, Նոր Զարթօնքի ներկայացուցիչ Սայաթ Թեքիրի կողմէ։
Մինչ Ուրբաթ օր, օրուան ընթացքին լուրեր տարածուած էր որ Քամփ Արմէնի այժմու սեփականատէր Ֆաթիհ Ուլուսոյ կալուածը պիտի վերադարձնէ Կէտիկփաշայի Հայ Աւետարանական եկեղեցւոյ հիմնարկին։ Երթը ամբողջովին նոր ընթացք մը կը ստանար, ոչ թէ սահմանափակուելով յատկապէս այս կալուածին, այլ վերածուելով ընդհանրական պահանջատիրական կեցուածք ցուցաբերող հաւաքի մը։ Բնականաբար սակայն, վերադարձնելու լուրը ազդեցութիւն ունեցած էր երթին մասնակիցներու թիւին վրայ, ուստի շատեր մտածելով որ խնդիրը այլեւս լուծուած է, հարկ չէին նկատած նման երթի մը մասնակցիլը։
Միւս կողմէ, ջանք չեն խնայեր Զօրակցութեան տղաքը ալ աւելի ուշադրութիւն գրաւելու, աւելի մարդ հաւաքելու ճամբարի տարածք եւ բարձրաձայնելու այն հանգամանքը, որ այս պայքարը սոսկ մէկ տարածքի համար չէ, այլ սկիզբ մըն է ամբողջ նորոգուած կեցուածքի մը, մօտեցումի մը եւ պահանջատիրութեան ալիքի մը։ Քամփ Արմէնի հսկումի առաջին օրէն ի վեր սովորութիւն դարձած աշխոյժ շաբաթավերջերու կարգին, գալ շաբաթավերջին ծրագիրը կը մնայ անյստակ։ Մէկ կողմէն կայ յաղթական դուրս գալու հեռանկարը, միւս կողմէն այս յաղթանակին շոշափելի փաստերը կը մնան բացակայ։
Երկուշաբթի օր տարածուած լուրի մը համաձայն, այժմու սեփականատէրը կալուածագիրը պիտի չյանձնէ յառաջիկայ տասը օրերու ընթացքին, ինչ որ ճամբորդական-անձնական պատճառաբանութեամբ մը։ Այս վիճակը մտահոգութիւն պատճառած է Զօրակցութեան եւ ընդհանուր հանրութեան մօտ, յառաջ բերելով տեսութիւններ, թէ կրնայ ըլլալ հաշիւներ ըլլան, որուն անտեղեակ կը մնայ հանրութիւնը։
Երեսփոխանական ընտրութիւններու մթնոլորտին մէջ անցնող ամբողջ պայքարը անկասկած առարկայ պիտի ըլլար զանազան կուսակցութեանց ընտրարշաւներուն։ Իշխող կառավարական կուսակցութիւնը կը թուի ըլլալ հետամուտ խնդրին, եւ ստեղծել այն տպաւորութիւնը, թէ ինք արդարամիտ կը մօտենայ խնդրին, ու այդպիսով շահիլ հայերու եւ համակրողներու քուէն։ Սակայն պէտք է յիշեցնել որ վերոնշեալ տասը օրէն ետք, 7 Յունիսի ընտրութիւնները անցած պիտի ըլլան, եւ բնականաբար անկէ ետք շատ աւելի դժուար պիտի ըլլայ շահագրգռել թէ իշխանութիւնը եւ թէ միւս կուսակցութիւնները։
Ասիկա փաստ մըն է, որ զօրակցութիւնը տակաւին չէ հասած իր վերջին նպատակին, եւ թէկուզ խնդրին մօտէն ծանօթ չեղողներ եւ կամ այլ նպատակ հետապնդող մամուլը կը հնչեցնեն յաղթական շեփորներ -պէտք չէ բոպիկնալ առանց ջուրը տեսնելու։
Մեկնաբանություններ (1)
Մեկնաբանել