Երկուշաբթի, 24 սեպտեմբերի

Ալավերդու ծերացած բարդիները թեթև քամիներից ընկնում են. վարորդները անհանգստանում են դրանց վտանգներից



Ալավերդի  քաղաքի  Երիտասարդական փողոցի եզրերին  գտնվող  ծերացած հսկա  բարդիներից մեկն այսօր  ժամը 15:00-ի  սահմաններում  ընկել է: Երջանիկ  պատահականությամբ բարդու ընկելու հետևանքով  տրանսպորտային երթևեկությամբ  ծանրաբեռնված փողոցում դժբախտ պատահար չի գրանցվել: Այս փողոցի մեկ տասնյակից ավելի ծերացած բարդիների  վտանգների մասին  ալավերդցի  վարորդները  վաղուց են ահազանգում:

«Այս բարդիները տրանսպորտային երթևեկության համար  ահավոր վտանգներ են  ներկայացնում:  Ես ուզում էի նույնիսկ քաղաքապետին ասել, որ մի օր կազմակերպենք, միացյալ ուժերով  այս ճանապարհը փակենք, գործարանից մի հատ կռան բերենք ու էս ամբողջը  կարգավորենք: Այս ծառերը շատ փխրուն են,  վաղը մյուս օրը  ուժեղ քամիներին բարդիները խայտառակ վիճակի առաջ են կանգնեցնելու վարորդներին: Եթե բարդիներից մեկն էլ ընկնի մեքենայի վրա, մեքենան կջարդի, կարող է և մահացու դեպք լինի» ,- դեռ ձմռանը  մեզ հետ զրույցում զգուշացնում էր  Ավետ Թամազյանը:

Շատերը   մտածում էին, որ   քաղաքի փողոցների  ծառերի գարնանային էտման շրջանում «Ալավերդու բարեկարգում»  ՍՊԸ-ն կհատեր Երիտասարդական փողոցի ծերացած բարդիները:

Սակայն պարզվում է Ալավերդու քաղաքապետարանի պատասխանատուները , այդ թվում նաև  քաղաքապետարանի «Բարեկարգում» ՍՊԸ-ի տնօրեն Համլետ Միրզոյանը ի տարբերություն  վարորդների,  չեն նկատել վտանգը, կամ ուղղակի զլացել են կատարել իրենց պարտականությունները :  Բանուկ փողոցի ծերացած ծառերի տրանսպորտային միջոցներին սպառնացող  վտանգների մասին քաղաքապետարանին չի ահազանգել նաև  ճանապարհային ոստիկանությունը: Քաղաքապետ Արտավազդ Վարոսյանը «Հետքին» հայտնեց, որ Երևանում է, սակայն  տեղյակ է   կատարվածին: Նա  խոստացավ վերադառնալուց հետո  զբաղվել  փողոցի ծերացած  բարդիների  հարցով:


Գլխավոր էջ



Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ