Երեքշաբթի, 25 սեպտեմբերի

Պետական գնումներից օգտվում են պաշտոնյաները. Լոռու մարզի ճանապարհաշինարար Վանաձորի քաղաքապետը



Վանաձորի քաղաքապետը Սամվել Դարբինյանի ընկերությունները Լոռու մարզի ճանապարհների շինարարություններ իրականացնելու համար պետական բյուջեից ամեն տարի գումարներ են ստանում:  Ընդ որում՝ առանց մրցույթի:  

Լոռու մարզի առաջնահերթ լուծում պահանջող խնդիրների լուծման ուղղությամբ իրականացվելիք աշխատանքների համար ՀՀ կառավարության որոշմամբ Լոռու մարզպետարանին 2014թ. հատկացվել է 747 մլն դրամ: Աշխատանքների և ծառայությունների գնումներն իրականացվել են «Բանակցային ընթացակարգ առանց հայտարարության» եղանակով:

Այդ գումարից համայնքային նշանակության ճանապարհների վերանորոգման համար հատկացվել է 443 մլն 450 հազար դրամ: 2014 թվականին իրականացված 10 համայնքի ճանապարհների շինարարության և ասֆալտապատման նախագծերից վեցն իրականացրել են Վանաձորի քաղաքապետ Սամվել Դանիելյանի ընկերությունները՝ «Արգիշտի-1» ՍՊԸ-ն և «Լոռիի ճանապարհների շահագործման և շինարարական» ՓԲԸ-ն («Լոռիի ՃՇՇ»):

Համաձայն Արդարադատության նախարարության պետական ռեգիստրի տվյալների՝ 1996 թվականին հիմնադրված «Արգիշտի-1» ՍՊԸ-ում Սամվել Դարբինյանը 50 % մասնաբաժին ունի, մնացյալ 50 %-ն էլ քաղաքապետի եղբորն է պատկանում՝ Սեյրան Դարբինյանին: Այս ընկերությունը տարիներ շարունակ սնվում է պետական բյուջեից և առանց մրցույթների ստանում շինարարություն իրականացնելու նախագծերի ֆինանսավորումը:

«Արգիշտի-1» ՍՊԸ-ն գրանցված է Վանաձոր քաղաքի Շիրակի խճուղի 6 հասցեում: Նույն հասցեում է գրանցված նաև «Լոռիի ճանապարհների շահագործման և շինարարական» ՓԲԸ-ն:  ՓԲԸ-ում իր փայատեր լինելու փաստը չի ժխտել քաղաքապետ Դարբինյանը, սակայն թե որքան է իր մասնաբաժինը, չի ցանկացել հայտնել հանրությանը: «Ես փայատեր եմ, դա ի՞նչ կապ ունի, թե որքան եմ փայատեր»,- «Հետքի» հետ զրույցում ասել է Սամվել Դարբինյանը:

Լոռու մարզպետ Արթուր Նալբանդյանը, մեր հարցման ի պատասխան, տրամադրել է իրականացված ծրագրերի ու հատկացված գումարի շրջանակներում կատարված աշխատանքների վերաբերյալ տեղեկությունը: Եվ այսպես, 2014 թվականին քաղաքապետի մասնակցությամբ ընկերություներն իրականացրել են Տաշիր համայնքի ճանապարհների նորոգում և ասֆալտապատում, որի համար պետբյուջեից տրամադրվել է 33 մլն դրամ:

20 մլն 800 հազար դրամ արժեցել է Հոբարձ համայնքի ճանապարհի նորոգումն ու ասֆալտապատումը:

Գյուլագարակ համայնքի ճանապարհի նորոգման և ասֆալտապատման համար ընկերությանը տրվել է 26 մլն դրամ:

Վանաձորի քաղաքի ճանապարհների նորոգումն ու ասֆալտապատումը (120 մլն դրամ), ինչպես նաև Վանաձորի բազմաբնակարան շենքերի բակերի ասֆալտապատման աշխատանքները (36 մլն 680 հազար դրամ) «Արգիշտի-1» ՍՊԸ-ն կիսել է «Լոռիի ՃՇՇ» ՓԲԸ-ի հետ:

«Արգիշտի-1» ընկերությանը նաև ավելի քան 3 մլն դրամ էլ տրամադրվել է Քարաբերդ համայնքի կամրջի նորոգման համար:

Այս աշխատանքների կատարման համար Վանաձորի քաղաքապետն ու եղբայրը պետական բյուջեից ստացել են շուրջ 248 մլն դրամ՝ ավելի քան կես մլն դոլար: 

Սամվել Դարբինյանը, սակայն, այս ընկերություններից ստացած շահաբաժինը չի հայտարարագրել:

Նա 2014թ. հայտարարագրել է 4.2 մլն դրամ, որից 3.2 մլնը կազմել է պաշտոնյայի աշխատավարձը: 2013թ.-ին նա փոքր-ինչ ավել գումար է հայտարարագրել՝ 6.5 մլն դրամ: Մինչդեռ 2012թ. հայտարարագրում երևում է, որ քաղաքապետ Դարբինյանը երկու ընկերություններից շահաբաժին է ստացել՝ համապատասխանաբար 16,3  և 28,3 մլն դրամի սահմաններում: 


Գլխավոր էջ


Տես նաև՝

ավելին



Մեկնաբանություններ (1)
1. scsbo18:57 - 28 հունիսի, 2015
Everybody knows this, can you report something new?
Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ