«Ոչ թալանին» նախաձեռնության անդամներին անհայտ անձինք հետապնդում են
«Ոչ թալանին» քաղաքացիական նախաձեռնությունն այսօր հայտարարություն է տարածել, որ որոշ կասկածելի անձինք սկսել են հետապնդել նախաձեռնության անդամներին և խաղաղ հավաքի մասնակիցներին։ Նրանք հրավիրում են իրավասու կառույցների ուշադրությունը և հորդորում չսպառնալ իրենց և գործել բացառապես օրենքի շրջանակներում:
«Հետքը» կապվեց նախաձեռնության անդամ Մաքսիմ Սարգսյանի հետ, ով հաստատեց վերոնշյալ լուրը՝ նշելով, որ քիչ առաջ երկու քաղաքացիական հագուստով անձինք իրենց տան բակում լուսանկարում էին իր մեքենան:
«Հեռախոսվ նաև հասցես էին նշում, ես լսեցի այդ ամենը: Մեր ընկերները նույնպես պատմել են, որ իրենց հետապնդում էին: Նաև նախաձեռնության անդամ Արթուր Քոչարյանին են հետևել, մանրամասներին տեղյակ չեմ իր հետ կապված: Հիմա պիտի գնամ, մանրամասն իմանամ, թե ինչ է եղել»,- պատմում է Մաքսիմ Սարգսյանը:
«Ոչ թալանին» քաղաքացիական նախաձեռնության հայտարարությունում նշվում է, որ բողոքի ակցիան կրում է խաղաղ բնույթ և իրականացվում է օրենքի շրջանակներում։ Ակցիայի մասնակիցները չեն օգտագործում ալկոհոլ խաղաղ հավաքի ժամանակ, սադրանքների չեն տրվում, աչալուրջ են և պահպանում են հանգստություն։ «Մենք պատասխանատու չենք այն կարգազանց անձանց արարքների համար, ովքեր գտնվում են խաղաղ հավաքի տարածքում»,- նշում են նրանք։
Մեկնաբանություններ (3)
Մեկնաբանել