Մարտուն Հակոբյան․ «Մենք երկիր ենք շենացնում, դուք էլ գրում եք, թե բնություն ենք փչացնում»
«ՄԱՍԿՕ ՄԱՅՆ» ՓԲԸ-ին պատկանող Ախթալային լեռնահարստացման կոմբինատի տնօրեն Մարտուն Հակոբյանը հուլիսի 13-ին հրաժարվեց մեր հարցերին պատասխանելուց. «Մենք երկիր ենք շենացնում, դուք էլ գրում եք, թե բնություն ենք փչացնում»,- հեռախոսով զայրացած պատասխանեց նա:
Հիշեցնենք, որ ԼՀԿ-ի Նահատակ ձորում գտնվող Ճոճկանի պոչամբարի ջրի շրջանառու համակարգը տարիներ շարունակ չի աշխատում: Կոմբինատը լեռնահարստացուցիչ ֆաբրիկայի թունավոր պոչանքերը Ախթալայի բնակելի թաղամասերով անցնող առուներով տարիներ շարունակ ուղղում է դեպի Դեբեդ:
Ախթալայի նախկին պահածոների գործարանի մոտով անցնող առվի հարևանությամբ ապրող բնակիչները դժգոհում են, որ իրենց երեխաների համար լուրջ վտանգ է ներկայացնում հոսող պոչանքները:
«Երեխեն որ ընկնի էս կանավի մեջը, ով ա տերը: Երեկ իրիկուն կանավի կեսով մեկ, պոչանքը վարար գներ, ինչ ենք անելու»,- հայտնեց թաղամասի բնակիչ Միշա Ամիրջանյանը:
«Ամբողջ թաղամասը տհաճ հոտ է ընկնում: Մեր տունը հենց էս կանավի մոտ ա: Թող բերեն ծածկեն էս կանավը, կամ ցանցապատեն, որ երեխեքը չընկնեն մեջը»,- ասում է Միշայի որդին` Գարիկը:
Այսօր Ալավերդիում գտնվող բնապահպանության նախարար Արամայիս Գրիգորյանը և Լոռու մարզպետ Արթուր Նալբանդյանը խոստացան լուծել պոչանքային առվի մոտ խաղացող երեխաների անվտանգության խնդիրը: Այս տարի մարտի 17-ին ԼՀԿ-ում բանվորների նախաձեռնությամբ ստեղծվել է արհեստակացական կազմակերպություն:
«Ստեղծվելուց հետո երկու անգամ տնօրեն Մարտուն Հակոբյանին նամակ ենք ուղարկել` հանդիպելու համար: Նամակին կցել ենք Արդարադատության նախարարությունում մարտի 18-ին գրանցված կազմակերպության լիցենզիան և կանոնադրությունը: Երկու անգամն էլ մեզ չեն պատասխանել: Երկու անգամ էլ փորձել ենք մտնել տնօրենի մոտ, մեզ չեն թողել: Տնօրենի օգնական Սևակ Բաղդասարյանը մեզ պատասխանում է, թե այդպիսի կազմակերպություն իրենք չեն ճանաչում»,- այսօր մեզ հայտնեց արհեստակացական կազմակերպության նախագահ, Ախթալայի ավագանու անդամ Սասուն Վարդումյանը:
ԼՀԿ-ն հումքի լուրջ խնդիրներ ունի: Դեռ այս տարվա հունվարին Մ.Հակոբյանը «Հետքին» հայտնել է, որ ընկերության հանքերը համարյա ավերված են` ճիշտ չշահագործելու պատճառով: Տարեսկզբին կոմբինատում պլանավորել է մշակել ամսական 50 հազար տոննա հանքաքար: Պլանային առաջադրանքերը ամեն գնով կատարելու և հումքի հեռանկարային խնդիրները լուծելու համար «ՄԱՍԿՕ ՄԱՅՆՆ» այս տարի 60 մլն. դրամ է հատկացրել` Շամլուղի բաց և ընկերության 3 փակ հանքերում վերջնահաշվարկ կատարելու համար. «Այդտեղից կերևա ամեն ինչ: Բայց արդեն գիտենք, որ 3 տարվա պաշար կա: Ճիշտ շահագործման դեպքում նորից կարող ենք երկարացնել Շամլուղի բաց հանքի կյանքը: Այս պահին մեր հաշվարկներով դեռ մի 5-10 տարվա հանքային պաշարներ ունենք»,- հավաստիացրնում էր Մ.Հակոբյանը: Հանքային պաշարները կանոնակարգելուն զուգահեռ դեռ նախորդ տարվանից ընկերությունը նախապատրաստական աշխատանքեր էր կատարում ֆրանսիացիների կողմից օգտագործված փակ հանքերը վերագործարկելու համար: Արդեն հանքային պաշարների հետախուզում է սկսվել Շամլուղի բաց հանքավայրի հարակից տարածքներում: Շամլուղի քաղաքապետ Լենդրուշ Բեժանյանը երեկ մեզ հայտնեց, որ իր տեղեկություններով փակվում է Շամլուղի բաց հանքը և ընկերության փակ հանքերը: Արդեն մի քանի ամիս է՝ շահագործվում է ֆրանսիացիների օգտագործած փակ հանքը:
«Շամլուղի հանքի պաշարների մասին ես ինքս նույնպես լսել եմ: Շամլուղում այնքան պաշարների, որքան հանքանյութի մեջ պղնձի և ոսկու ծավալների նվազելու խնդիր կա, որը միջազգային շուկայում պղնձի գների անկման հետ ԼՀԿ-ի համար ֆինանսական խնդիրներ է ստեղծել: Հիմա ուսումնասիրություններ են կատարվում, ինձ թվում է ուսումնասիրություններից հետո արդեն պարզ կլինի հանքանյութի մեջ ոսկու և պղնձի քանակի նվազելու պատճառներն ու բաց հանքի ճակատագիրը»,- այսօր բացատրեց Լոռու մարզպետ Արթուր Նալբանդյանը:
Հանքափորներ Մերուժան Գալստյանը և Վարուժան Ադամյանը հանքային 3-րդ հոսքում պայթեցողներ են աշխատում. «Լավ չի հանքում վիճակը: Կրճատումներ է նախատեսվում: Մեզ` 215 հոսքագծի հանքափորներիս մինչև օգոստոսի 4-ը ժամկետ են տվել, որ մեզ կրճատելու են գործից: Սամվել Դավիթավյանի հոսքագծում ենք աշխատում»,- ասաց Մերուժանը:
Սամվել Դավիթավյանը հրաժարվեց պատասխանել մեր հարցերին. «Գնացեք կանտորա, էնտեղ կպատասխանեն ձեր հարցերին»,- ասաց նա:
Մերուժանի ասելով փակ հանքում ծանր է աշխատանքը. «Ուղղակի հանքից մենք ուշ ենք դուրս գալիս, գործը շատ է: Վեց հատ զաբոյա, 6 հոգի ծակում են, մենք` ես ու Վարուժանը, պայթեցումներն ենք անում: Վտանգավոր աշխատանք է պայթեցնողի աշխատանքը, ամեն րոպե քար կարող է ընկնել»,-բացատրեց Մերուժանը:
Հանքափորները դժգոհեցին, որ 90 հազար դրամ աշխատավարձ են ստանում, վարկի տակ են, չեն կարողանում ապրել: «Եթե ես 150 հազար դրամ աշխատավարձ ստանայի, կյանքում վարկ չէի վերցնի: Համարյա 1մլն. դրամ վարկ եմ վերցրել»,- ասաց Մերուժանը: Վարկ է վերցրել նաև Վարուժանը: Վերջիններիս զարմացնում էր, որ փակ հանքում իրենց հետ նույն աշխատանքը կատարող որոշ մարդիկ ստանում են 300-400 հազար դրամ աշխատավարձ, իսկ իրենք նույն աշխատանքի համար ստանում են 90 հազար դրամ: Արհեստակցական կազմակերպության նախագահ Սասուն Վարդումյանի ասելով` ԼՀկ-ի տնօրինությունը օգոստոսի 4-ին աշխատանքից ազատվելու մասին նախազգուշական գրություն է ուղարկել փակ հանքի 50 աշխատողների. «Դրանցից մի քանի հոգու են տեղավորել աշխատանքի, մնացածները սպասում են օգոստոսի 4-ին»,- հայտնեց Ս. Վարդումյանը:
Մեկնաբանել