Հունաստանի ճգնաժամի խիստ կարևոր դասը Հայաստանի համար
Շվեդ-ամերիկյան գիտնական Մաքս Թեգմարկը (Max Tegmark) տնտեսագիտությունը ժամանակին անվանել է «ինտելեկտուալ մարմնավաճառություն». և ոչ առանց հիմքի: Ի՞նչու. որովհետև տնտեսագիտության վրա քաղաքականության ազդեցությունը չափից մեծ է, որպեսզի այն «չեզոք գիտություն» լինի կամ մնա :
Քիմիայի կամ ֆիզիկայի պարագայում լաբորատորիայում փորձեր կարելի է անել: Տնտեսագիտությունում գերակշռում են ենթադրակա՛ն մոդելները: Տնտեսագիտությունը, իհարկե, օգտակար գիտություն է, բայց մարդիկ պիտի հասկանան, որ տնտեսագիտական մոդելներն իրականում մնում են միայն մոդելներ:
Հունաստանի ճգնաժամն էլ ասածիս ճիշտ սահմաններում է: Հոդվածս երկար չի լինի, որովհետև հունական ճգնաժամի իրական պատճառն էլ ընդամենը մե՛կ բառ է... «եվրո»:
Հունաստանում էլ, իհարկե, կոռուպցիա ու հարկերի չվճարում կար. ու հունական կառավարությունը «խաղացել» է թվերի հետ ( իմիջիայլոց՝ «Goldman Sachs» բանկի օգնությամբ): Բայց հունական ճգնաժամի հիմքային պատճառը բնավ էլ սա չէր:
Իրական պատճառը եվրոն է: Հունաստանը պարզապես շղթայի ամենաթույլ օղակն էր. այն միշտ եղել է (համեմատաբար) աղքատ երկիր: Նույն կերպ՝ ԱՄՆ-ում «Lehman Brothers» բանկն անգամ եթե չընկներ, միևնույնն է՝ կրեդիտային ճգնաժամ (credit crisis) լինելու էր:
Եվրոյին անցնելիս կատարվեց հետևյալը. հույներն իրենց արտադրանքով այլևս չկարողացան մրցել միջազգային շուկայում: Հունաստանից արտահանվող (հիմնականում ագրարային) ապրանքները դարձան չափից ավելի զգայուն գների հանդեպ. այսինքն՝ արտահանվող ապրանքների գները հնարավոր չէր իջեցնել ու այն դարձնել մրցունակ: Սա Հունաստանը կարող էր անել միայն ազգային արժույթի փոխանակման կուրսի միջոցով (exchange rates). բայց երկիրն արդեն անցել էր միասնական եվրոյի և ազգային արժույթ (դրախմա) այլևս չուներ:
Այսպես և այսպիսով Հունաստանը պարզապես դուրս մղվեց շուկայից՝ նաև Չինաստանի կողմից, որի հետևանքով հունական կառավարության եկամուտները նվազեցին: Ու հարցը լուծվեց... պարտքեր վերցնելով:
Հիմնականում հյուսիսային Եվրոպայի բանկերը՝ ստեղծված իրավիճակից փող աշխատելու նպատակով՝ սկսեցին պարտքեր տալ Հունաստանին, մտածելով որ իրե՛նց փողը չի կորչի, քանի որ իրենց երկրների կառավարությունները դա թույլ չեն տա: Հակառակ դեպքում նույն այդ հյուսիսային երկրների տնտեսություններն անկում կապրեն. իսկ դա այդ երկրների քաղաքական գործիչների համար կնշանակի մեկ բան... չվերընտրվել:
Ահա հունական միֆոլոգիայի նորագույն «միֆի» ողջ «առեղծվածը»:
Հունաստանից փոքր Հայաստանը այս ամենից խի՛ստ կարևոր դաս ունի սովորելու. այն է՝ երբեք և ո՛չ մի պարագայում չհրաժարվել ազգային արժույթից՝ դրամից:
Վարազ Սյունի
Ամստերդամ,10.08.2015
Մեկնաբանություններ (2)
Մեկնաբանել