Էլեկտրաէներգիայի թանկացման դեմ բողոքի եւ իրազեկման ակցիաների ակտիվ մասնակից ,Տնտեսագիտական համալսարանի Գյումրու մասնաճյուղի դասախոս,  «Կոմպասս» ՀԿ խորհրդի անդամ, տնտեսագիտության թեկնածու, դոցենտ Կարեն Պետրոսյանի նկատմամբ քրեական հետապնդումը դադարեցնելու որոշում է կայացվել հուլիսի 31-ին: «Քննիչը քննել, քննել էր ու ի վերջո հասկացել էր, որ ես խուլիգան չեմ, -Կարենի դեմքին ժպիտ է հայտնվում, -գործը հարուցելու պահից ասել էինք, որ շինծու է, սարքած է, պարզապես սպասում էինք տեսնեինք, թե արդյո՞ք էդքան կամք կունենան իրենց սխալն ուղղելու»:

Հիշեցնենք, որ Կարեն Պետրոսյանի նկատմամբ խուլիգանության մեղադրանքով քրեական գործը հարուցվել էր հունիսի 23-ի լուսաբացին նրան եւ եւս 12 գյումրեցի նստացուցարարների Գյումրու ոստիկանական բաժանմունք ապօրինի բերման ենթարկելուց հետո: Կարեն Պետրոսյանը նախ ներգրավվել էր որպես կասկածյալ, այնուհետեւ հունիսի 30-ին մեղադրանք էր առաջադրվել քրեական օրենսգրքի 258-րդ հոդվածի 2-րդ մասով՝ խուլիգանություն, որը պատժվում է ուղղիչ աշխատանքներով առավելագույնը մեկ տարի ժամանակով կամ ազատազրկմամբ՝ առավելագույնը երեք տարի ժամանակով:

Քրեական այս գործով Կարեն Պետրոսյանի դեմ ցուցմունք են տվել երեք ոստիկաններ: Գործը հարուցելիս հիմք է ընդունվել նրանցից մեկի՝ մեղադրվողի կողմից իբրեւ թե վրաերթի ենթարկվելու ցուցմունքը:

«Մեղադրանքն այնպես էր կազմվել, որ ես իբրեւ թե ցանկացել եմ վրաերթի ենթարկել ոստիկաններից մեկին: Միջադեպը գրանցվել էր ավտոերթի ժամանակ, երբ ցանկանում էինք գնալ մարզպետարան: Քաղաքացիական հագուստով մեկը պարզապես թռավ իմ մեքենայի դիմաց: Մենք իհարկե դանդաղ էինք ընթանում, բայց դա չի նշանակում, որ ում խելքին փչի, պիտի հայտնվի փողոցի բանուկ մասում եւ որոշի իր մարմնով փակել մեքենայի ճանապարհը: Նախ՝ որովհետեւ վտանգավոր է եւ հետո՝ շարժառիթն է անհասկանալի: Տվյալ անձը չի եղել ոստիկանի համազգեստով, որ մտածեինք, թե հրամանի չենք ենթարկվել: Եթե համարենք, որ սովորական, շարքային քաղաքացին է նման բան անում՝ ապա ուր է նայում մեր ոստիկանությունը »,- նկատում է Կարեն Պետրոսյանը:

Զրուցակիցս ասում է, որ իրենք մի քանի անգամ ազդանշան են տվել, հետո տեսնելով, որ անձը խնդիրներ ունի լսողության հետ, ինքն արգելակել եւ իջել է մեքենայից: «Հետո իմ դեմ տված ցուցմունքից եմ իմացել, որ այդ անձը վնասվածք է ստացել, չնայած, երբ նայում ես բժշկական փորձաքննության արդյունքները եւ տեսնում ես, թե որ հատվածում է ստացել վնասվածքը, մեքենայի հնարավոր հարվածի կետը հասկանում ես, արդեն ծիծաղելի է դառնում,-ասում է Կարենը,- ուղղակի ուզում ես հասկանալ, թե էդ խեղճի ոտքին հետո ով է խփել, որ էդ ցուցմունքը գրել է»:

Զրուցակիցս արադարացիորեն նկատում է, որ ոստիկանը արգելակման մետաղյա նշան կամ բետոնյա արգելապատնեշ չէ, որ անձնազոհաբար հայտնվում է բանուկ փողոցում ու մարմնով փակում մեքենայի ճանապարհը՝ վտանգելով իր կյանքը: «Բա որ ես իրեն չնկատեի ու մեքենայի տակ գցեի, կամ կտրուկ շարժում անեի ու խփեի այլ մեքենայի, ստեղծեի վթարավտանգ իրավիճակ: Ինքը փոխանակ ապահովի մեր անվտանգությունը՝ հավելյալ խնդիրներ է առաջացնում: Գուցե այդ մարդը հոգեբանի կարի՞ք ունի: Ամեն դեպքում, լավ կլիներ, որ մենք այդ նյութերը փոխանցեինք  ճանապարհային ոստիկանությանը, որ տվյալ անձին վարչական պատասխանատվության ենթարկեն՝ չթույլատրված հատվածում վթարավտանգ իրադրություն ստեղծելու համար»,- ասում է Կարեն Պետրոսյանը:

Ըստ զրուցակցիս, այս ամենի մեջ իհարկե նաեւ դրական բան էլ կար՝ դա հունիսի 23-ից հետո ոստիկանության վարքագծի կտրուկ փոփոխությունն էր դրական առումով: Նախորդ երկու օրերին իրենց բավական ագրեսիվ պահած ոստիկաններն հետագայում այլ վարքագիծ են դրսեւորել՝ ավելի հանգիստ, հավասարակշռված եւ հանդուրժող են եղել:

«Սակայն այս ֆոնին շատ ուշագրաֆ է Շիրակի մարզի ոստիկանապետ Ամիրխանյանի պահվածքը: Եթե երկրի գլխավոր ոստիկանապետը կարող է ներողություն խնդրել էն մարդկանցից, որոնց նկատմամբ ապօրինի գործողություններ են իրականացվել, ապա ինչու նրա ենթական չի կարող դա անել իր սխալ պահվածքի համար: Եթե նա մեզ անտեսում է կամ համարում է, որ կարեւոր չենք, այդ դեպքում ինչու էր վերաբերմունք ցույց տալիս, պատռում մեր պաստառը, հրմշտում 18-20 տարեկան երեխաներին: Ամիրխանյանին մի քանի անգամ հորդորել ենք կարծիք հայտնել, սակայն դեռ արդյունք չունենք: Մենք ուզում ենք, որ իր այդ օրվա պահվածքին գնահատական տրվի,- ասում է Կարեն Պետրոսյանը, -մեր պահանջը իրավական չէ, մեր պահանջը բարոյական հարթության վրա է: Իմ կարծիքով չպետք է որեւէ մի պաշտոնյա իրեն նման ձեւով պահի, նման վարքագիծ ունենա ու պատասխան չտա դրա համար»:

լուսանկարները` Կարեն Պետրոսյանի ֆեյսբուքյան էջից